စီၤပၤ​စီလူး​အ​ဖိခွါ​ဝဲၢ်ကိ​န့ၣ် အ​မံၤ​မ့ၢ်​စီၤယိနၤသၣ် ဒီး​အဝဲ​မ့ၢ်​ပှၤသုးဖိ​လၢ အိၣ်ဒီး​တၢ်သးဒူ​တဂၤ​လီၤ. စီၤ​ဒၤဝံး​တဲဝဲ​လၢ စီၤယိနၤသၣ်​ဃ့ၢ်​ချ့​န့ၢ်ဒံး​လံာ်​ကြီ​ကြၣ် ဒီး​အ​ဂံၢ်ဆူၣ်​န့ၢ်ဒံး​ခ့ယုၢ်​လီၤ. ဘၣ်​တနံၤ​န့ၣ် စီၤယိနၤသၣ်​ထံၣ်ဝဲ ပှၤ​ဖလ့ၡသး​အ​သုးဖိ​အဂၤ ၂၀ အိၣ်​လၢ​တၢ်လူၢ်ခိၣ်​လီၤ. ဒီး​စီၤယိနၤသၣ်​တဲဘၣ် အ​သုးဖိ​လၢ အ​စိာ်​အ​စုကဝဲၤ​တဂၤ​လၢ– ‘ယဟိဝၤ​ယွၤ​မ့ၢ်​ဟ့ၣ်​ပှၤ​တၢ်​ပနီၣ်​န့ၣ် ပ​က​လဲၤ​ဒုး​အဝဲသ့ၣ်​လီၤ. အဃိ ပှၤ​ဖလ့ၡသး​ဖိ​တဖၣ်​မ့ၢ်​တဲ​ပှၤလၢ ဟဲထီၣ်​ဒုး​ပှၤ​န့ၣ် ပ​သ့ၣ်ညါ​လၢ ပ​က​ဘၣ်​လဲၤထီၣ်​ဒုး​အဝဲသ့ၣ်​လီၤ.’ ဒီး​ပှၤ​ဖလ့ၡသး​ဖိ​တဖၣ် ကိးပသူ​ထီၣ်​လၢ– ‘ဟဲထီၣ်​ဒုး​ပှၤ​သၢၣ်.’ လၢတၢ်န့ၣ်​အဃိ စီၤယိနၤသၣ်​ဒီး​အ​ပှၤသုးဖိ​တဂၤ​န့ၣ် လဲၤထီၣ်​လၢ​တၢ်လူၢ်ခိၣ် ဒီး​ဒုး​နၢၤဝဲ​ပှၤ​ဖလ့ၡသး​အ​သုးဖိတဖၣ်​န့ၣ်​လီၤ.

ခီဖျိ​လၢ​စီၤယိနၤသၣ်​မ့ၢ် စီၤ​စီလူး​အ​ဖိခွါ​ဝဲၢ်ကိ​အဃိ အဝဲ​အိၣ်ဒီး​တၢ်ခွဲး​တၢ်ယာ်​လၢ က​ကဲထီၣ်​ဘၣ်​ဝဲ စီၤပၤ​လၢခံ​တဂၤ​လီၤ. ဘၣ်ဆၣ် စီၤယိနၤသၣ်​သ့ၣ်ညါ​ဝဲ​လၢ ယဟိဝၤ​ယွၤ​ဃုထၢ​ထီၣ် စီၤ​ဒၤဝံး​ဒ်သိး​က​ကဲထီၣ်​စီၤပၤ​လၢ စီၤ​စီလူး​အလီၢ်လီၤ. ဘၣ်ဆၣ်​သနာ်က့ စီၤယိနၤသၣ်​တ​သးက့ၣ် စီၤ​ဒၤဝံး​ဘၣ်. လၢတၢ်န့ၣ်​အလီၢ် စီၤယိနၤသၣ်​ကဲထီၣ်​ဝဲ စီၤ​ဒၤဝံး​အ​တံၤသကိး​တံၢ်နီၢ်​တဂၤ​လီၤ. အဝဲသ့ၣ်​အၢၣ်လီၤ​အီလီၤ​အသး​လၢ  က​တီလိာ်အသး ဒီး​က​ကဟုကယာ်​လိာ်အသး​တဂၤ​ဒီး​တဂၤ​လီၤ. မ့ၢ်​လၢ​စီၤယိနၤသၣ်​အဲၣ်ဝဲ​စီၤ​ဒၤဝံး ဒ်​အ​တံၤသကိး​တံၢ်နီၢ်​အဃိ အဝဲ​ဟ့ၣ်လီၤ​စီၤ​ဒၤဝံး​လၢ အ​ဆ့ကၤ, နး, ချံၣ် ဒီး​အ​ယီၢ်တကိး​လီၤ.

ခီဖျိ​လၢ စီၤ​စီလူး​လူၤ​မၤသံ​စီၤ​ဒၤဝံး​အဃိ စီၤ​ဒၤဝံး​ဘၣ်​ဃ့ၢ်​ပူၤဖျဲး​အသး​လီၤ. မ့မ့ၢ်​စီၤယိနၤသၣ်​န့ၣ် လဲၤ​ထံၣ်​လိာ်သး​ဒီး​စီၤ​ဒၤဝံး ဒီး​တဲဘၣ်​အီၤ​လၢ– ‘ပာ်စၢ်လီၤ​န​ဂံၢ်​န​ဘါ​တဂ့ၤ, ပာ်​န​သး​ဒူဒူ​မီၤ. ယဟိဝၤ​ယွၤ​ဃုထၢ​ထီၣ်​နၤ​လၢ​စီၤပၤ, ယ​ပၢ်​သ့ၣ်ညါ​ဝဲလံ.’ မ့ၢ်​န​အဲၣ်ဒိး​အိၣ်ဒီး တံၤသကိး​လၢ​အဂ့ၤ​ဒ် စီၤယိနၤသၣ်​အသိး​စ့ၢ်ကီး​ဧါ.

စီၤယိနၤသၣ် ဟ့ၣ်လီၤ​အသး​လၢ က​မၤစၢၤ​စီၤ​ဒၤဝံး​န့ၣ် အိၣ်ဝဲ​အါ​ဘျီ​လီၤ. စီၤယိနၤသၣ်​သ့ၣ်ညါ​ဝဲ​လၢ စီၤပၤ​စီလူး​အဲၣ်ဒိး​မၤသံ စီၤ​ဒၤဝံး​လီၤ. အဃိ အဝဲ​တဲဘၣ်​အ​ပၢ်​လၢ– ‘စီၤ​ဒၤဝံး​တ​မၤ​ကမၣ်​တၢ်​နီတမံၤ​ဘၣ်. န​မ့ၢ်​မၤသံ​အီၤ​န့ၣ် မ့ၢ်ဒၣ်​န​မၤ​တၢ်ဒဲးဘး​လီၤ.’ လၢတၢ်န့ၣ်​အဃိ စီၤ​စီလူး​သးပှံၢ်​ထီၣ်ဝဲ စီၤယိနၤသၣ်​ဒိၣ်မး​လီၤ. ပူၤကွံာ်​တဘျုး​နံၣ်​ဝံၤ​အလီၢ်​ခံ စီၤ​စီလူး​ဒီး​စီၤယိနၤသၣ်​သံဝဲ​လၢ တၢ်ဒုးပျီ​အ​ပူၤ​ဒ်သိး​သိး​လီၤ.

ဖဲ​စီၤယိနၤသၣ်​သံ​ဝံၤ​အလီၢ်​ခံ​န့ၣ် စီၤ​ဒၤဝံး​ဃုကွၢ်​ဝဲ စီၤယိနၤသၣ်​အ​ဖိခွါ​စီၤမဖံဘိၤၡ့း​လီၤ. ဖဲ​စီၤ​ဒၤဝံး​ထံၣ်ဝဲ​စီၤမဖံဘိၤၡ့း​အခါ စီၤ​ဒၤဝံး​တဲဘၣ်​အီၤ​လၢ– ‘ခီဖျိ​လၢ​န​ပၢ်​မ့ၢ် ယ​တံၤသကိး​လၢ​အဂ့ၤ​တဂၤ​အဃိ ယ​က​ကွၢ်ထွဲ​က့ၤ​နၤ တစိၤ​လၢ​န​သးလီၤ. န​ကအိၣ်​လၢ​ယ​နီ​ပူၤ ဒီး​န​က​အီၣ်တၢ်​ဒီး​ယၤ​လၢ ယ​စီၢ်နီၤခိၣ်​လီၤ.’ စီၤ​ဒၤဝံး​တ​သးပ့ၤနီၣ် အ​တံၤသကိး​စီၤယိနၤသၣ်​နီတဘျီ​ဘၣ်.