လၢ​ပ​တၢ်​ကရၢကရိ​အ​ပူၤ​န့ၣ် ပ​တအိၣ်​ဒီး​သရၣ်​တဖၣ်​လၢ ဒိးန့ၢ်​ဘၣ်​ဝဲ​အဘူး​အလဲ​ဘၣ်. ဖဲ​ခရံာ်ဖိ​တၢ်​အိၣ်ဖှိၣ် စးထီၣ်​သူၣ်​လီၤအသး​အခါ ပှၤ​ကွၢ်ထွဲ​တၢ်​လၢ အ​တုၤထီၣ်​ထီၣ်ဘး​တဖၣ်​န့ၣ် ဘၣ်​တၢ်​ဃုထၢ​ပာ်လီၤ​အီၤ​လၢ “ကအံး​က့ၤ​ကွၢ်က့ၤ ယွၤ​အ​တၢ်​အိၣ်ဖှိၣ်” အဂီၢ်​ဒီး​ပဝဲ​စ့ၢ်ကီး ပ​မၤ​ဒ်​န့ၣ်​အသိး​လီၤ. (မၤတၢ် ၂၀:၂၈) တၢ်​အိၣ်ဖှိၣ်​သးပှၢ်​တဖၣ်​အံၤ မ့ၢ်​ပှၤ​ဒိၣ်တုာ်ခိၣ်ပှဲၤ​လၢ​နီၢ်သး​တခီ လၢ​က​ပၢဆှၢ​ရဲၣ်ကျဲၤ​ဝဲ​တၢ်​အိၣ်ဖှိၣ်​ဒီး ‘ကွၢ်​အီၤ​လၢ တၢ်​မၢဆူၣ်​အဃိ​တမ့ၢ်​ဘၣ်, မ့ၢ်​လၢ​တၢ်​သးအိၣ်​အဃိ, လၢ​စ့​ဘၣ်ဃး​ဒီး တၢ်​မဲာ်ဆှး​အဃိ​တမ့ၢ်​ဘၣ်, မ့ၢ်​လၢ​တၢ်​သးအိၣ်​သပှၢ်တၢၢ်​အဃိ’ လီၤ. (၁ ပ့းတရူး ၅:၁-၃) အဝဲသ့ၣ် မၤ​တၢ်မနုၤ​လၢ​ပဂီၢ်​လဲၣ်.

တၢ်​အိၣ်ဖှိၣ်​သးပှၢ်​တဖၣ်​န့ၣ် အံးထွဲ​ကွၢ်ထွဲ​ပှၤ​ဒီး ကဟုကယာ်​ပှၤ. တၢ်​အိၣ်ဖှိၣ်​သးပှၢ်​တဖၣ်​အံၤ သိၣ်လိ​မၤယုၤ​ပှၤ​ဒ် လံာ်စီဆှံ​အ​တၢ်သိၣ်​တၢ်သီ​အိၣ်ဝဲ​အသိး ဒီး​မၤစၢၤ​တၢ်​အိၣ်ဖှိၣ်​ဖိ​တဖၣ်​လၢ က​ဘူးထီၣ်​ဒီး​ယဟိဝၤ​ယွၤ​န့ၣ်​လီၤ. တၢ်​အိၣ်ဖှိၣ်​သးပှၢ်​တဖၣ် သ့ၣ်ညါ​ဝဲ​လၢ ကစၢ်​ယွၤ​ဟ့ၣ်လီၤ​မူဒါ​လၢ​အရ့ဒိၣ်​အံၤ​အဃိ အဝဲသ့ၣ်​တကဲ​ကစၢ်​လၢ တၢ်​အိၣ်ဖှိၣ်​ဖိ​အဖီ ခိၣ်ဘၣ်. လၢတၢ်န့ၣ်​အလီၢ်, အဝဲသ့ၣ်​မၤ​အါထီၣ်​ဝဲ ပ​တၢ်​သူၣ်ဖှံ​သးညီ​လီၤ. (၂ ကရံၣ်သူး ၁:၂၄) ဒ်​ပှၤကွၢ်သိ​တဂၤ အံးထွဲ​ကွၢ်ထွဲဝဲ အသိ​တဒု​စုာ်စုာ်​အသိး တၢ်​အိၣ်ဖှိၣ်​သးပှၢ်​တဖၣ်​စ့ၢ်ကီး ဂုာ်ကျဲးစၢး​မၤ​သ့ၣ်ညါ​အသး​ဒီး တၢ်​အိၣ်ဖှိၣ်​ဖိ​တဂၤ​စုာ်စုာ်​စ့ၢ်ကီး​လီၤ.—ကတိၤဒိ ၂၇:၂၃.

တၢ်​အိၣ်ဖှိၣ်​သးပှၢ်​တဖၣ်​န့ၣ် သိၣ်လိ​ပှၤလၢ ပ​က​မၤ​ယွၤ​အ​တၢ်​ဘၣ်သး. တၢ်​အိၣ်ဖှိၣ်​သးပှၢ်​တဖၣ်​န့ၣ် တီ​ခိၣ်​ရိၣ်​မဲ​ဝဲ တၢ်​အိၣ်ဖှိၣ်​ရိဖှိၣ်​ကိးနွံဒဲး ဒ်သိး​ပ​တၢ်စူၢ်​တၢ်နာ် က​ဂၢၢ်ကျၢၤ​ထီၣ်​အဂီၢ်​လီၤ. (မၤတၢ် ၁၅:၃၂) တၢ်​အိၣ်ဖှိၣ်​သးပှၢ်​လၢ အ​ဟ့ၣ်လီၤ​အသး​တဖၣ်​အံၤ တီ​ခိၣ်​ရိၣ်​မဲ​ဝဲ တၢ်​စံၣ်တဲၤ​တဲလီၤ​တၢ်မၤ တကးဘၣ် သိၣ်လိ​မၤယုၤ​ပှၤ​ဒီး မၤ​သကိး​ဃုာ်​တၢ်​ဒီး​ပှၤလၢ တၢ်သးခု​ကစီၣ်​တၢ်မၤ​ကိး​သနၢၣ်​ဒဲး​အ​ပူၤ​လီၤ.

တၢ်​အိၣ်ဖှိၣ်​သးပှၢ်​တဖၣ်​န့ၣ် ဟ့ၣ်ဂံၢ်​ဟ့ၣ်ဘါ​ပှၤ. ပဝဲ​တဂၤ​စုာ်စုာ် ပ​တၢ်​ရ့လိာ်သး​ဒီး ယဟိဝၤ​ယွၤ က​ဂၢၢ်ကျၢၤ​အဂီၢ် တၢ်​အိၣ်ဖှိၣ်​သးပှၢ်​တဖၣ်​လၢ ပ​လီၢ်ကဝီၤ​ပူၤ​န့ၣ် ဟဲ​အိၣ်သကိး​ပှၤလၢ​ပဟံၣ် မ့တမ့ၢ် ထံၣ်​လိာ်သး​ဒီး​ပှၤလၢ ဘီမုၢ်ဘျီၣ်ဒိၣ်​အ​ပူၤ​လီၤ. အဝဲသ့ၣ်​ဟ့ၣ်ဂံၢ်​ဟ့ၣ်ဘါ​ပှၤလၢ လံာ်စီဆှံ​အဆၢ​တဖၣ် ဒ်သိး​ဒီး​ပ​သး​ကမုာ်​ထီၣ်​အဂီၢ်​လီၤ. —ယၤကိာ် ၅:၁၄, ၁၅.

တၢ်​အိၣ်ဖှိၣ်​သးပှၢ်​တဖၣ်​န့ၣ် တီ​ခိၣ်​ရိၣ်​မဲ​တၢ်​လၢ တၢ်​အိၣ်ဖှိၣ်​အ​ပူၤ​တကးဘၣ်​အမဲာ်​ညါ, အဝဲသ့ၣ်​ဘၣ်​ဖံး​ဘၣ်​မၤ​လၢ နီၢ်ခိ​တၢ်​လုၢ်အီၣ်​သးသမူ​အဂီၢ်​စ့ၢ်ကီး​လီၤ. ဒီး​ဘၣ်​ဟ့ၣ်​ဝဲ​တၢ်​ဆၢကတီၢ်​လၢ က​အံးထွဲ​ကွၢ်ထွဲ အဟံၣ်​ဖိ​ဃီဖိ​အဂီၢ်​လီၤ. ဒီပုၢ်ဝဲၢ်​ခွါ​တဖၣ်​လၢ အ​ဂုာ်ကျဲးစၢး​ဟ့ၣ်လီၤ​အသး​လၢာ်​လၢာ်​ဆ့ဆ့​လၢ တၢ်ဖံး​တၢ်မၤ​အံၤ​အ​ပူၤ​န့ၣ် ကြၢး​ဒိ​န့ၢ်ဘၣ်​ဝဲ ပ​တၢ်​ယူးယီၣ်​ပာ်ကဲ​အီၤ​လီၤ.—၁ သ့းစၤလနံ ၅:၁၂, ၁၃.

• တၢ်​အိၣ်ဖှိၣ်​သးပှၢ်​တဖၣ် အ​မူဒါ​မ့ၢ်​မနုၤ​လဲၣ်.

• တၢ်​အိၣ်ဖှိၣ်​သးပှၢ်​တဖၣ် ပာ်ဖျါ​ထီၣ်ဝဲ အ​တၢ်​သးအိၣ် တၢ်​အိၣ်ဖှိၣ်​ဖိ​တဖၣ်​လၢ​ကျဲ​ဒ်လဲၣ်.