ဖဲ ခ.န ၃၃ ပှၤယူဒၤဖိတဖၣ်မၤဝဲ ဘူၣ်ယဲၢ်ဆံမူးပွဲအခါ ယ့ၣ်ၡူးအပျဲၢ်အဘီၣ် ၁၂၀ ဃၣ်ဃၣ် အိၣ်ဖှိၣ်ဝဲလၢ ဟံၣ်တဖျၢၣ်အပူၤလၢ ဝ့ၢ်ယရူၤၡလ့ၣ်န့ၣ်လီၤ. ဖဲအဝဲသ့ၣ်အိၣ်ဖှိၣ်အဆၢကတီၢ်န့ၣ် ယ့ၣ်ၡူးက့ၤထီၣ်ဆူမူခိၣ် အိၣ်လံအသီတဆံလံန့ၣ်လီၤ. တၢ်ကလုၢ်သီၣ်ထီၣ်သတူၢ်ကလာ် ပှဲၤဟံၣ်ဒီဖျၢၣ် ဒ်ကလံၤဟဲသဖှိအသိးန့ၣ်လီၤ. ဒီးလၢတၢ်လီၤလိၢ်လီၤလးအပူၤ အပျဲၢ်အဘီၣ်တဖၣ် စးထီၣ်ကတိၤကျိာ်လၢ အဝဲသ့ၣ်ကတိၤဝဲတဘၣ်ဘၣ်န့ၣ်လီၤ. တၢ်လီၤလးတဖၣ်အံၤန့ၣ်ပာ်ဖျါထီၣ်ဝဲလၢ ကစၢ်ယွၤဟ့ၣ်လီၤဝဲအပျဲၢ်အဘီၣ်တဖၣ်လၢ သးစီဆှံန့ၣ်လီၤ.

လၢတၢ်ချၢန့ၣ် ပှၤတမှံၤအိၣ်ဝဲအါအါဂီၢ်ဂီၢ် လၢအဟဲလၢတၢ်လီၢ်အါတီၤ လၢမူးပွဲအံၤအဂီၢ်န့ၣ်လီၤ. အဝဲသ့ၣ်ကမၢကမၣ်ဝဲလၢ နၢ်ဟူဘၣ်ဝဲယ့ၣ်ၡူးအပျဲၢ်အဘီၣ်တဖၣ် ကတိၤအဝဲသ့ၣ်အကျိာ်သ့ဘျ့ဘျ့ဆှီဆှီအဃိလီၤ. ဖဲစီၤပ့းတရူးတဲဖျါထီၣ်ဝဲ တၢ်မၤအသးအံၤအဂ့ၢ်န့ၣ် အဝဲယၢၤဖျါထီၣ်ဝဲဝံယိၤအ့လးအတၢ်စံးပာ်လၢအစံးဝဲဒၣ် ကစၢ်ယွၤက “လူလီၤဂၢ်လီၤ” အသးစီဆှံဒီးပှၤလၢအဒိးန့ၢ်ဘၣ်အီၤတဖၣ်ကမၤတၢ်လီၤလးန့ၣ်လီၤ. (ယိၤအ့လး ၂:၂၈, ၂၉) တၢ်အုၣ်အသးတဖၣ်အံၤလၢအဟဲခီဖျိသးစီဆှံန့ၣ် ပာ်ဖျါထီၣ်ဝဲလၢ တၢ်ဆီတလဲလၢအရ့ဒိၣ်တခါ ကဲထီၣ်အသးလံ. တၢ်ဆီတလဲအံၤမ့ၢ်ဝဲ ပှၤအံၣ်စရ့လးဖိတဖၣ် တဒိးန့ၢ်ဘၣ် ယွၤအတၢ်ဘၣ်သးလၢၤဘၣ်. ဒီးခရံာ်ဖိတၢ်အိၣ်ဖှိၣ်လၢ တၢ်သူၣ်ထီၣ်အီၤသီသီအံၤ ဒိးန့ၢ်ဘၣ်ဝဲယွၤအတၢ်ဘၣ်သးလံန့ၣ်လီၤ. စးထီၣ်ဖဲန့ၣ်အခါ ပှၤလၢအဲၣ်ဒိးဘူၣ်ထီၣ်ဘါထီၣ် ယွၤလၢကျဲလၢ ယွၤဘၣ်သူၣ်ဘၣ်သးန့ၣ် ကဘၣ်ကဲထီၣ်ခရံာ်အပျဲၢ်အဘီၣ်န့ၣ်လီၤ.

ဖဲန့ၣ်အဆၢကတီၢ် တၢ်တြီမၤတံာ်တာ်တဖၣ်အါထီၣ် ဒီးဒုၣ်ဒါတဖၣ်န့ၣ် ဒၢနုာ်ကစၢ်အပျဲၢ်အဘီၣ်တဖၣ် လၢဃိာ်ပူၤလီၤ. ဘၣ်ဆၣ် လၢမုၢ်နၤခီအဆၢကတီၢ်န့ၣ် ယဟိဝၤယွၤအမူခိၣ်ကလူးအိးထီၣ်န့ၢ်အဝဲသ့ၣ် ဃိာ်အပဲတြီဒီးမၤလိာ်အဝဲသ့ၣ်လၢ ကလဲၤစံၣ်တဲၤတဲလီၤတၢ်ဆူညါန့ၣ်လီၤ. တုၤမုၢ်ဆ့ၣ်ဝါထီၣ်ဒီး အဝဲသ့ၣ်လဲၤနုာ်ဆူတၢ်လုၢ်ဟံၣ်ပူၤဒီး စံၣ်တဲၤတဲလီၤကဒီး တၢ်သးခုကစီၣ်လၢ ဘၣ်ဃးဒီးယ့ၣ်ၡူးအဂ့ၢ်န့ၣ်လီၤ. တၢ်ဘူၣ်တၢ်ဘါခိၣ်နၢ်လၢ အထီဒါတၢ်တဖၣ်န့ၣ် အသးထီၣ်ဖးဒိၣ်ဒီး မၤလိာ်အဝဲသ့ၣ်လၢတဘၣ်လဲၤစံၣ်တဲၤတဲလီၤတၢ်လၢၤတဂ့ၤ. ဘၣ်ဆၣ် တၢ်မၢဖိတဖၣ် တဲဆၢက့ၤဝဲလၢတၢ်သးဒူအပူၤလၢ “ပဘၣ်စူၢ်ယွၤ အါန့ၢ်ပစူၢ်ပှၤကညီ တက့ၢ်လီၤ.”—မၤတၢ် ၅:၂၈, ၂၉.

တၢ်မၤနးမၤဖှီၣ် ဆူၣ်ထီၣ်ဝဲလီၤ. ပှၤယူဒၤဖိတနီၤ ပာ်တၢ်ကမၣ်လၢစီၤစတ့းဖၣ်အလိၤဒီးစံးဝဲလၢ အဝဲမ့ၢ်ပှၤလၢအကတိၤကမၣ်ယွၤအဃိ အဝဲသ့ၣ်ကွံာ်သံအီၤလၢလၢၢ်န့ၣ်လီၤ. ဖဲပှၤမၤသံအီၤအခါ ပှၤတၢ်စူးဖိလၢအသးစၢ်တဂၤ အမံၤမ့ၢ်စီၤစီလူးန့ၣ် ဆၢထၢၣ်ခိးကွၢ်ဝဲ ဒီးဘၣ်ဝဲအသးလီၤ. တၢ်န့ၣ်အလီၢ်ခံ စီၤစီလူးလဲၤဝဲဆူဝ့ၢ်ဒၤမ့ၤစ့း ဒ်သိးကဖီၣ်ဝဲကယဲၢ်ပှၤလၢ အပိာ်ခရံာ်အခံကိးဂၤဒဲးန့ၣ်လီၤ. ဘၣ်ဆၣ်ဖဲအဝဲလဲၤလၢကျဲအအခါန့ၣ် တၢ်ကပီၤလၢမူခိၣ်ကပီၤထီၣ်ဝဲ ဝးတရံးအီၤလီၤ. ဒီးအဝဲနၢ်ဟူဘၣ်ဝဲတၢ်ကလုၢ်သီၣ် “စီၤစီလူးဧၢ, စီၤစီလူးဧၢ, ဘၣ်မနုၤလၢ နမၤအၢယၤလဲၣ်.” လၢတၢ်ကပီၤအံၤအဃိ စီၤစီလူးအမဲာ်တထံၣ်တၢ်လၢၤဘၣ်. ဒီးသံကွၢ်ဝဲ “ကစၢ်ဧၢ, နမ့ၢ်မတၤတဂၤလဲၣ်.” ဒီးတၢ်ကလုၢ်န့ၣ် စံးဆၢက့ၤအီၤလၢ “ယမ့ၢ်ယ့ၣ်ၡူးလၢ နမၤအၢအီၤလီၤ.”—မၤတၢ် ၉:၃-၅.

ပူၤကွံာ်သၢသီဒီး ယ့ၣ်ၡူးမၢလီၤအပျဲၢ်အဘီၣ် စီၤအနၤနံလၢကလဲၤမၤဘျါက့ၤ စီၤစီလူးအမဲာ်ချံန့ၣ်လီၤ. စီၤစီလူးဒိးဘျၢအသးလၢထံဒီး စးထီၣ်စံၣ်တဲၤတဲလီၤ ယ့ၣ်ၡူးအဂ့ၢ်လၢတၢ်သးဒူအပူၤလီၤ. လၢခံန့ၣ် စီၤစီလူးဘၣ်တၢ်သ့ၣ်ညါက့ၤအီၤလၢ တၢ်မၢဖိစီၤပီလူးလီၤ. ဒီးအဝဲကဲထီၣ်တၢ်အိၣ်ဖှိၣ်ဖိတဂၤလၢ အသူၣ်ဆူၣ်သးဆူၣ်လၢ ခရံာ်ဖိတၢ်အိၣ်ဖှိၣ်အပူၤန့ၣ်လီၤ.

လၢအခီၣ်ထံးန့ၣ် ယ့ၣ်ၡူးအပျဲၢ်အဘီၣ်တဖၣ် စံၣ်တဲၤတဲလီၤယွၤအဘီမုၢ်တၢ်သးခုကစီၣ်ထဲလၢ ပှၤယူဒၤဖိဒီး ပှၤၡၤမရံဖိတဖၣ်အကျါန့ၣ်လီၤ. ဘၣ်ဆၣ် မူခိၣ်ကလူးတဂၤ လီၣ်ဖျါထီၣ်အသးလၢ စီၤကန့လံးအမဲာ်ညါလီၤ. အဝဲမ့ၢ်ရိမ့ၤအသုးခိၣ်တဂၤလၢ အယူးယီၣ်ယွၤဒီးပျံၤယွၤန့ၣ်လီၤ. ဒီးမူခိၣ်ကလူးတဂၤအံၤ စံးဘၣ်အီၤလၢ အဝဲကဘၣ်ပျဲလီၤပှၤဂၤလၢ ကလဲၤကိးတၢ်မၢဖိစီၤပ့းတရူးအဂီၢ်န့ၣ်လီၤ. ပှၤအဂၤစ့ၢ်ကီး လဲၤဃုာ်ဒီးစီၤပ့းတရူးလီၤ. စီၤပ့းတရူး စံၣ်တဲၤတဲလီၤဝဲ စီၤကန့လံးဒီးအဟံၣ်ဖိဃီဖိတဖၣ်လီၤ. ဖဲစီၤပ့းတရူး စံၣ်တဲၤတဲလီၤတၢ်အခါ ယွၤအသးစီဆှံ ဟဲလီၤလၢပှၤတခီဘီမုၢ်ဖိလၢ အစူၢ်က့ၤနာ်က့ၤတၢ်တဖၣ်န့ၣ်အလိၤလီၤ. ဒီးစီၤပ့းတရူးနဲၣ်လိအဝဲသ့ၣ်လၢ ကဒိးဘျၢအသးလၢထံလၢ ယ့ၣ်ၡူးအမံၤန့ၣ်လီၤ. ဖဲန့ၣ်အဆၢကတီၢ် ကျဲလၢအဆှၢပှၤဆူ တၢ်မူအထူအယိာ်အံၤ အိးထီၣ်အသးလၢ ပှၤကိးကလုာ်ဒဲးအဂီၢ်န့ၣ်လီၤ. တၢ်အိၣ်ဖှိၣ်အံၤအိၣ်ကတဲာ်ကတီၤအသးလၢ ကစံၣ်တဲၤတဲလီၤတၢ်သးခုကစီၣ် သကုၤဆးဒးန့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ မၤတၢ် ၁:၁-၁၁:၂၁ န့ၣ်လီၤ.