Bazuzi nionso ya tribinale ya Europe yina ketadilaka yinsua ya bantu bakaka nzengolo kaka mosi na kumonisaka ti guvernema ya Belgique niokolaka Bambangi ya Yehova ntangu balombaka bimvuka 9 yina kele na kizunga ya Bruxelles-Capitale samu bafuta mpaku. Nzengolo yina kele na Assemblée chrétienne des Témoins de Jéhovah et autres contre Belgique, yina bimisamaka na kilumbu ya 5 Avril 2022, lenda tanina kimpuanza na beto ya kusambila kaka na Belgique ve kasi mpe na babuala yankaka ya Europe.

Mabundu nionso yina kele na kizunga ya Bruxelles-Capitale bandaka kufuta ntalu ya fioti ya mpaku na bisika na bau ya nsambudulu tii na 2018. Na mvula yango, kizunga yango sobaka bansiku na yau na diambu metadila kufuta mpaku mpe babakaka nzengolo ti mabundu 6 kaka “yina mezabana” lendaka futa mpaku yango ya ntalu ya fioti. Lokola basobaka bansiku, yavuandaka lomba Bambangi ya Yehova ya Bruxelles futa mbongo mingi ya mpaku, yina vuandaka na ntalu ya badolare 49 025.

Tribinale ya Europe yina ketadilaka yinsua ya bantu bakaka nzengolo ti na kukitisaka ntalu ya mpaku kaka samu na mabundu 6 “yina mezabana” na Leta, kizunga ya Bruxelles-Capitale niokolaka Bambangi ya Yehova mpe babukaka nguizani ya Europe yina metadila yinsua ya bantu.

Na nzengolo yango, tribinale ya Europe yina ketadilaka yinsua ya bantu tubaka diaka ti guvernema ya Belgique vunaka ntangu batubaka ti Bambangi ya Yehova lendaka lomba bazabana na Leta. Tribinale ya Europe yina ketadilaka yinsua ya bantu monisaka ti kaka ministre de la Justice kele na kilendo ya kubanda kulomba dibundu zabana na Leta mpe diambu metadila kupesa to ve kimpuanza yango metadila guvernema.

Na nzengolo yango, tribinale ya Europe yina ketadilaka yinsua ya bantu tubaka ti mutindu Belgique kena kulomba ti dibundu zabana na Leta “kele kivonza na diambu metadila kimpuanza,” yabuelaka diaka ti “yalomba ve kuvingila ti mabundu zabana na Leta, diambu yina kele ndanga ya fioti kaka na diambu metadila lunungu . . . tekila bakitisila bau mpaku.” Tribinale lombaka buala ya Belgique basadila mabundu, na kifuani Bambangi ya Yehova mambu kondua kupona bilungi.

Nzengolo ya tribinale ya Europe yina ketadilaka yinsua ya bantu bambulaka bamfumu ya Leta ti bakele ve na yinsua ya kubaka nzengolo kana bindimeli ya dibundu mosi kele ya mbote to mutindu bantu fueti sadila nsambudulu na bau. Nzengolo yango kesadisa diaka samu babuala yankaka ya Europe lemba kutula bansiku yina lenda niokola nkubukulu na beto.

Beto kena kupesa Yehova matondo samu na bansambusulu nionso yina beto kena kununga, yakena kupesa beto nzila ya kukokisa nsatu na beto ya kukumisa nkumbu na yandi.—Kusonga 15:4.