Diambu ya kiadi, tii na kilumbu ya 29 mars 2022, bampangi na beto ya babakala mpe ya banketo kuluta 7 kufuaka na mbanza ya Marioupol. Bampangi na beto 17 ya babakala mpe ya banketo mekufua deja na buala ya Ukraine.

Bakomite samu na kupesa lusadusu yina kele na Ukraine kena kusala kisalu ya ngolo kondua kulemba samu na kupesa lusadusu, bakena kutula ata mpe luzingu na bau na kivonza samu na kusosa bampangi na bau yina kele na bisika yina mvita kele.

Na kifuani, bampangi yina kena kusala kintuadi na komite yango kena kununga kukabula bima ya kudia, bilongo, mpe bima yankaka ya mfunu na bambanza yina bebisamaka ngolo na mvita, lokola Kharkiv, Kramatorsk mpe Marioupol. Mpangi mosi yina kele na komite samu na kupesa lusadusu kesalaka vuayaje ya bakilometre kuluta 500 konso kilumbu, yandi kelutaka na bisika yina basoda metulaka bandilu, samu na kukuenda bikila bansamuni kana 2 700 madia mpe bilongo.

Bakomite samu na kupesa lusadusu kebongisaka diaka bantomabilu samu na kubimisa bampangi na bisika yina mvita kele. Mpangi mosi ya komite samu na kupesa lusadusu ya Tchernihiv metuba: “Ntangu basoda bandaka kubula babombi na bayinzo, yamonanaka puelele ti kubikana na mbanza yango vuandaka kivonza. Lokola kuran mpe Internet vuandaka ve, ntangu babombi vuandaka bula, bankutulutu vuandaka tambula na mbanza samu na kuzabisa bansamuni yina suamaka na yinsi ya ntoto ti bantomabilu mebongisama samu na kubimisa bau na mbanza yango.”

Mfumu ya kompani mosi ya bantomabilu ndimaka kupesa bantomabilu na yandi mpe yandi salaka bavuayaje 9 samu na kubimisa bampangi na beto ya babakala mpe ya banketo 254 yina katukaka na mbanza ya Chernihiv. Na diluaku mosi, yandi sadilaka mashini mosi samu na kubongisa kisika mosi yina vuandaka ya kubeba na nzila samu bantomabilu na yandi luta. Bampangi na beto monisaka mpenza butondi samu na lusadusu yango.

Beto kena kudila kintuadi na bampangi yina mefuila bantu yina bavuandaka zola na ntangu ya mvita yayi kele na Ukraine. Beto nionso beto kena kuvingila na nsatu nionso kukokisama ya kivuvu yina kele na Mpova ya Nzambi, Biblia, ntangu lufua mpe bidilu kevuanda diaka ve.—Kusonga 21:3, 4.

Tii na kilumbu ya 29 mars 2022, beto bakaka bantalu yayi melanda na Ukraine. Bantalu yango mekatuka na balopolo yina beto bakaka na bampangi ya Ukraine. Kasi bantalu ya kedika lenda vuanda mingi kuluta, samu beto kele na mukakatano ya kusolola na bampangi yina kele na bizunga nionso ya buala yango.

• Bansamuni 17 kufuaka

• Bansamuni 35 lualaka

• Bansamuni 36 313 tinaka bayinzo na bau samu na kukuenda na bisika yina mekondua bivonza

• Bayinzo 114 kubuaka

• Bayinzo 144 bebisamaka ngolo

• Bayinzo 612 bebisamaka ngolo ve

• Yinzo ya Kimfumu 1 kubuaka

• Bayinzo ya Kimfumu 7 bebisamaka ngolo

• Bayinzo ya Kimfumu 23 bebisamaka ngolo ve

• Bakomite samu na kupesa lusadusu 27 kena kusala na Ukraine

• Bakomite samu na kupesa lusadusu sadisaka bansamuni 34 739 samu babaka bisika ya kuvuanda yina kele ve na bivonza

• Bansamuni 16 175 tinaka na babuala yankaka mpe bampangi na bau Baklisto kena kupesa bau lusadusu