Diambu ya kiadi, bampangi na beto mingi ya babakale mpe ya banketo mekufua na mvita yina kena kusalama na Ukraine. Bambangi ya Yehova 28 mekufua.

Na kutadila lapolo ya bansangu ya yinza ya mvimba, bamvita vuandaka ngolo na bambanza yina kele penepene ya mbaza ya Kiev na ebandeli ya basabala ya ntete ya mvita yango. Kati na bansamuni kana 4 900 yina kezingaka na kizunga yango, bansamuni 3 500 tinaka na bisika ya lutanunu.

Masolo kena kumonisa ti bampangi na beto yina kele na kizunga yango kena kutatamana kutanina kiminu ya ngolo na Yehova atako bakena kukutana na mambu ya mpasi.

Oleksandr, nkulutu yina vuandaka vuanda na mbanza ya Makariv, tinaka na kisika ya lutanunu na katikati ya Ukraine. Kasi, yandi vuandaka ve na dikoki ya kusolola na bampangi 4 ya grupe na yandi ya kisalu ya kusamuna. Na yau, yandi vuandaka kukitungisa samu na bau mpe yandi bakaka nzengolo ya kuvutuka na kizunga yango, atako mvita vuandaka ngolo kuna. Yandi tubaka: “Munu bakusaka ti samu na Yehova, bisadi na yandi kevuandaka na mfunu mingi na meso na yandi. . . . Ntangu munu kumaka na ntuala ya yinzo ya mosi ya bansamuni, munu monaka ti balozilaka yau bombi. Porte ya shambre ya yinsi ya ntoto ya yinzo yango vuandaka ya kukangama, mpe muntu mosi ve vuandaka ndima ntangu munu vuandaka bokila. Yabangisaka munu.” Oleksandr panzaka porte ya shambre yango ya yinsi ya ntoto mpe yandi monaka grupe ya bantu yina vuandaka tala yandi. Yandi monaka bansamuni yango, buela diaka finangani na bau yina vuandaka Mbangi ya Yehova ve yina suamaka kisika mosi na bau.

Mosi ya bansamuni yina vuandaka kuna, Yaroslav, tubaka ti basuamaka na kisika yango yameluta bilumbu 8. Yandi tubaka: “Beto vuandaka kudia kaka babiskui mpe vere mosi ya maza na konso muntu. Kasi beto vuandaka tanga Biblia mpe mikanda na beto, beto vuandaka sambila, mpe kukindasana. Ntangu munu kuwaka mpangi Oleksandr vuandaka bokila nkumbu na munu, munu kanisaka ti basoda kuizaka baka munu. Munu kanisaka ti mukezola kufua. . . . [Kasi,] yandi vukisaka beto nionso. Beto kele na butondi na Yehova samu na dibuta yayi ya nzola ya kimpeve, beto kele na diaka na butondi samu na bampangi yina kena kusambila samu na beto mpe kena kutula luzingu na bau na kivonza samu na kuvukisa beto.”

Pylyp mpe mpangi mosi ya bakala bakaka nzengolo ya kunata madia na bampangi yina bikanaka na Borodianka. Na kilumbu ya 17 Mars, ntangu bavuandaka kuenda na ntomabilu na mbanza yango, basoda bakaka ntomabilu ya Pylyp mpe madia yina bavuandaka na yau. Na manima, basoda kangaka bampangi yango zole, bakangaka bau maboko mpe meso, mpe banataka bau na shambre mosi ya fioti yina vuandaka na yinsi ya ntoto kisika yina babakala 7 yankaka vuandaka. Bilumbu zole na manima, bagarde nataka bau na kisika mosi mpe babandaka kubula bau na mpipa. Pylyp tubaka: “Munu ndimaka ve ti munu kevuka. Munu sambilaka samu munu bikana ya kukuikama.”

Ntangu bavuandaka bula Pylyp, yandi bandaka kusambila na ndinga ya ngolo samu na bampangi mosi ya banketo ya biboba yina vuandaka ve na madia, samu na lutanunu ya dibuta na yandi, mpe yandi pesaka Yehova matondo samu na bamvula ya kiese yina yandi mesala samu na kusadila Yandi. Garde yango vutulaka yandi na shambre yango ya fioti kuna yandi tatamanaka kusambila samu na basoda babakusa ti bampangi vuandaka ve kivonza. Bampangi yango zole bandaka kusamunina basoda yango yina vuandaka sunga bau. Bilumbu zole, basamuninaka konso soda yina vuandaka kuiza sunga bau. Katula yau, mosi ya babakala yina bakangaka vuandaka sepela na nsangu ya Biblia. Yandi pesaka bampangi matondo. Na kilumbu ya 27 Mars, babikaka bampangi na beto mpe bakala yango yina vuandaka sepela na Biblia.

Svitlana, mpangi mosi ya nketo ya mpupa ya mbanza ya Bucha, vuandaka ve na dikoki ya kutina kisika mvita vuandaka samu na basabala zole. Yandi tubaka: “Bubu yayi, munu mebakusa mfunu ya kiyenge yina Yehova kepesaka. Kuvuanda na kiyenge ya Nzambi zola monisa ve ti beto kezabaka ntangu nionso mambu yina beto fueti sala. Kasi kana beto kena kumona ve diambu ya kusala samu na mambu na beto ya mpasi, beto tudilaka Yehova ntima na beto ya mvimba.”

Ntangu Svitlana vuandaka kuenda na kisika ya lutanunu na kizunga ya Ukraine, yandi samuninaka nketo mosi mpe muana nkazi na yandi. Bau nionso kumaka na kisika ya lutanunu mpe bayambaka bau na dibuta mosi yina vuandaka Bambangi ya Yehova. Dibuta yango pesaka mpangi Svitlana, nketo yango, mpe muana nkazi na yandi kisika ya kuleka samu na mpipa yina. Kilumbu yina landaka, nketo yango lombaka yandi kutakana na lukutakanu ya kimvuka mpe yandi lombaka Biblia mpe mikanda na beto. Svitlana kena kutatamana kusolola na nketo yango.

Kubanda na kilumbu ya 12 Avril 2022, beto bakaka bantalu yayi melanda yina katukaka na Ukraine. Bantalu yango mesimbama na masolo ya bampangi yina kele kuna na Ukraine. Kasi, bantalu yayi kele awa lenda buelama, lokola beto kele na mukakatano ya kusolola mbote na bampangi na beto yina kele na bizunga nionso ya buala yango ya Ukraine.

• Bansamuni 28 kufuaka

• Bansamuni 48 lualaka

• Bansamuni 40 778 tinaka bayinzo na bau samu na kukuenda bisika lutanunu kele

• Bayinzo 278 bebaka

• Bayinzo 268 bebaka ngolo

• Bayinzo 746 bebaka ngolo ve

• Yinzo ya Kimfumu mosi (1) bebaka

• Bayinzo ya Kimfumu 9 bebaka ngolo

• Bayinzo ya Kimfumu 26 bebaka ngolo ve

• Bakomite samu na kupesa lusadusu (DRC) 27 kena kusala na Ukraine

• Bansamuni 41 974 kena kupesa mbala mosi maboko na bampangi ya komite ya kupesa lusadusu samu na kusosa bisika ya lutanunu

• Bansamuni 18 097 yina tinaka na babuala yankaka mpe bakena kubaka lusadusu na bampangi na bau Baklisto