DILONGI 7
Yinki yina Kimfumu ya Nzambi?
1. Yinki yina Kimfumu ya Nzambi?
Yinki mesala Yesu vuanda Mfumu yina mefuana?—MARKO 1:40-42.
Kimfumu ya Nzambi kele guvernema ya dizulu. Yau kebaka kisika ya baguvernema nionso ya nkaka mpe yau kesala ti luzolo ya Nzambi salama na dizulu mpe awa na ntoto. Nsangu yina metala Kimfumu ya Nzambi kele nsangu mosi ya mbote. Ntama ve, Kimfumu ya Nzambi kekokisa nsatu yina bantu kevuandaka na yau ya kuvuanda na guvernema ya mbote. Yau kesala ti bantu nionso vuanda na bumosi awa na ntoto.—Tanga Daniele 2:44; Matayo 6:9, 10; 24:14.
Kimfumu nionso kevuandaka na mfumu na yau. Yehova mepona Muana na yandi Yesu Klisto vuanda Mfumu ya Kimfumu na yandi.—Tanga Kusonga 11:15.
Tala video Yinki kele Kimfumu ya Nzambi?
2. Samu na yinki Yesu kele Mfumu yina mefuana?
Muana ya Nzambi kele Mfumu yina mefuana samu yandi kele na kimpombo mpe yandi kekangamaka na yina kele mbote. (Matayo 11:28-30) Katula yau, yandi kele na ngolo mpenza ya kusadisa bantu samu yandi keyadila ntoto banda kuna na dizulu. Na manima ya kufutumuka na yandi, Yesu kuendaka na dizulu mpe yandi vuandaka na diboko ya kibakala ya Yehova samu na kuvingila. (Baebreo 10:12, 13) Nsukansuka, Nzambi pesaka yandi ngolo samu na kuyadila.—Tanga Daniele 7:13, 14.
3. Banani keyadila kintuadi na Yesu?
Nzambi mepona kimvuka mosi ya bantu mebokudulua “balongo” samu na kuyadila kintuadi na Yesu na mazulu. (Daniele 7:27) Balongo ya ntete yina ponamaka vuandaka bantumua ya Yesu ya kukuikama. Tii na bilumbu ya beto, Yehova kena tatamana kupona babakala mpe banketo ya kukuikama samu bavuanda balongo. Mutindu mosi na Yesu, balongo yango kefutumukaka na nzutu ya kimpeve.—Tanga Yoane 14:1-3; 1 Bakorinto 15:42-44.
Bantu yikua kekuenda na mazulu? Yesu bokidilaka bau “kibuka ya fioti.” (Luka 12:32, nwt) Nsukansuka bau nionso kevuanda bantu 144 000. Bau keyadila ntoto kintuadi na Yesu.—Tanga Kusonga 14:1.
4. Yinki salamaka ntangu Yesu bandaka kuyadila?
Kimfumu ya Nzambi bandaka kuyadila na 1914. * Diambu ya ntete Yesu salaka ntangu yandi kumaka Mfumu yau kele kuloza Satana na bademo na yandi awa na ntoto. Satana kumaka na nganzi ya ngolo mpe yandi bandaka kubimisa mpasi na ntoto ya mvimba. (Kusonga 12:7-10, 12) Kubanda vana, mpasi ya bantu kena kubuelama kaka. Bamvita, nsatu, maladi, kuningana ya ntoto, yakele mosi ya mambu yina kele “kidimbu” kena monisa ti ntama ve Kimfumu yango kebaka mambu nionso ya ntoto na maboko.—Tanga Luka 21:7, 10, 11, 31.
5. Yinki mambu Kimfumu ya Nzambi kena kukokisa?
Na nzila ya kisalu ya kusamuna yina kena kusalama na ntoto ya mvimba, Kimfumu ya Nzambi kena kusangisa bantu mingi ya mabuta nionso. Bamilio ya bantu ya kukikitisa bau kena ndima luyalu ya Yesu. Kimfumu ya Nzambi ketanina bau ntangu yau kebebisa yinza yayi ya yimbi. Yau yina bantu nionso yina zola baka mambote na Kimfumu ya Nzambi bafueti longuka kuzitisa luyalu ya Yesu.—Tanga Kusonga 7:9, 14, 16, 17.
Na kuzingila bamvula 1 000, Kimfumu ya Nzambi kekokisa luzolo yina Nzambi vuandaka na yau na ebandeli samu na bantu. Ntoto ya mvimba kekuma paladiso. Nsukansuka, Yesu kevutula Kimfumu na Tata na yandi. (1 Bakorinto 15:24-26) Nge mezaba muntu mosi yina nge kesepela kuzabisa nsangu metala Kimfumu ya Nzambi?—Tanga Nkunga 37:10, 11, 29.
^ par. 6 Samu na kuzaba mbotembote mutindu bambikudulu ya Biblia metuba samu na mvula 1914, tala mukanda Yinki Biblia Ke Longaka Beto? na paje 218-220.
