Nzambi ya kedika kele Mvangi ya bima nionso. Yandi kele na ntonono ve, mpe yandi kevuanda mpe na nsuka ve. (Nkunga 90:2) Bansangu ya mbote yina kele na Biblia mekatuka na yandi. (1 Timoteo 1:11) Lokola yandi pesaka beto luzingu, yandi kaka beto fueti sambila.​—Tanga Kusonga 4:11.

Ata muntu mosi ve memonaka Nzambi, samu yandi kele Mpeve. Yau memonisa ti yandi kele na mutindu ya luzingu yina meluta na ntama luzingu ya bisemua yayi kele na ntoto. (Yoane 1:18; 4:24) Ata mutindu yina, beto lenda mona bikadulu na yandi na nzila ya bima yina yandi mesalaka. Na kifuani, bambuma na bafololo mutindu na mutindu kemonisaka ti Nzambi kele nzola, mpe yandi kele na nduenga. Bunene ya luyalanganu kemonisaka beto ngolo na yandi.​—Tanga Baroma 1:20.

Beto lenda kutu kulonguka mambu mingi yina metala bikadulu ya Nzambi ntangu beto kena kutanga Biblia. Na kifuani, yau ketubilaka beto yina Nzambi kezolaka mpe yina yandi kemangaka, mutindu yandi kesadilaka bantu mambu mpe mutindu yandi kemonaka kana beto mesala diambu mosi.​—Tanga Nkunga 103:7-10.

Yesu tubaka: “Tata na beto kele na zulu, zina na nge ya santu kuvanda ya lukumu.” (Matayo 6:9) Atako Nzambi kele na batitre mingi, kansi yandi kele na nkumbu mosi kaka. Nkumbu yango kebokuduluaka mutindu mosi ve na bandinga mutindu na mutindu. Na Kikongo, yau kebokuduluaka mbala mingi “Yehova,” mpe bayankaka kebokidilaka yau “Yave.”​—Tanga Nkunga 83:18.

Babiblia mingi mekatulaka nkumbu ya Nzambi mpe na kisika na yau, bametulaka batitre lokola Mfumu to Nzambi. Kasi ntangu Biblia sonamaka, nkumbu ya Nzambi vuandaka mbala kana 7 000. Yesu monisaka bantu nkumbu yango ntangu  yandi vuandaka longa bau mambu ya Nzambi.​—Tanga Yoane 17:26.

Tala video Nzambi kele na nkumbu?

Lokola bantu mingi kena kumona mpasi, yau zola tuba ti Nzambi kekipeke beto ve? Bantu yankaka ketubaka ti Nzambi kebikaka beto beto mona mpasi samu na kumeka kiminu na beto, kansi, yau kele diambu ya kedika ve.​—Tanga Yakobo 1:13.

Mutindu Nzambi mepesaka beto kimpuanza ya kupona, yau memonisa ti yandi kepesaka beto lokumu. Beto kesepelaka ve na kimpuanza yayi beto kele na yau ya kupona kusadila yandi? (Yozue 24:15) Kasi bantu mingi keponaka kusadila bayankaka yimbi, yau yina bampasi mefuluka. Yehova kemonaka mpasi na ntima mutindu yandi kemonaka kukondua lunungu ya mutindu yina.​—Tanga Kuyantika 6:5, 6.

Yehova kele Nzambi yina kekipeke beto. Yandi kezolaka beto sepela na luzingu. Yau mebikana kaka fioti yandi kekatula mpasi nionso na bantu yina kebimisaka yau. Kasi na kilumbu ya bubu, Nzambi kele na mfunu yina yandi mebikila bampasi samu na mua ntangu. Beto kezaba mfunu yango na dilongi 8​—Tanga 2 Piere 2:9; 3:7, 13.

Yehova kena kulomba beto beto pusana penepene na yandi na nzila ya lusambulu. Yandi kekipeke mosimosi na beto. (Nkunga 65:2; 145:18) Yandi kendimaka kulemvukila beto, mpe yandi kemonaka mutindu beto kesalaka ngolo samu na kuyangidika yandi, atako na bantangu yankaka, beto kesalaka masumu. Yau yina, ata beto kele bantu ya kukondua kulunga, beto lenda vuanda na nguizani ya mbote na Nzambi.​—Tanga Nkunga 103:12-14; Yakobo 4:8.

Lokola Yehova mepesaka beto luzingu, beto fueti zola yandi kuluta muntu nionso. (Marko 12:30) Mingi nge kemonisina yandi nzola na kulongukaka kuzaba yandi mpe na kusalaka mambu yina yandi kena lomba nge, mingi nge kepusana penepene na yandi.​—Tanga 1 Timoteo 2:4; 1 Yoane 5:3.