Yehova mepesaka bantu ntoto. Ntoto kele buala na beto. Na yau, bibuti na beto ya ntete, Adamu na Eva, basalamaka ve samu na kuvuanda na dizulu; Nzambi manisaka sala bambasi samu bau vuanda na dizulu. (Yobi 38:4, 7) Nzambi tulaka nde bakala ya ntete na paladiso mosi ya kitoko, yina bavuandaka bokidila bilanga ya Edene. (Kuyantika 2:15-17) Yehova pesaka yandi mpe nkuna na yandi kivuvu ya kuvuanda na luzingu mekondua nsuka awa na ntoto.​—Tanga Nkunga 37:29; 115:16.

Na ntonono, kaka bilanga ya Edene vuandaka paladiso. Nketo na bakala ya ntete fuanaka fulusa ntoto na bana yina bakebuta. Na manima, bafuanaka tula ntoto ya mvimba na yinsi na bau mpe kukumisa yau paladiso. (Kuyantika 1:28) Ntoto kesala kufua ata kilumbu mosi ve. Yau kevuanda ntangu nionso buala yina bantu fueti vuanda.​—Tanga Nkunga 104:5.

Tala video Samu na yinki Nzambi salaka ntoto?

Adamu na Eva bazitisaka Nzambi ve; yau yina Yehova bimisaka bau na bilanga ya Edene. Paladiso zimbanaka, mpe muntu ata mosi ve menunga kuvutula yau. Biblia metuba ti: “Ntoto mepesamaka na maboko ya muntu ya yimbi.”​—Yobi 9:24.​—Tanga Kuyantika 3:23, 24.

Yehova zimbakanaka nde luzolo yandi vuandaka na yau na ebandeli samu na bantu? Ve! Yandi kele Nkua-Ngolo-Nionso. Yandi kezanga ve kukokisa yau. (Yezaya 45:18) Yandi kesala ti bantu zinga diaka mutindu yandi zodilaka na ebandeli.​—Tanga Nkunga 37:11, 34.

Ntoto kevutuka diaka paladiso ntangu Yesu, Mfumu yina Nzambi metula, keyadila. Na mvita ya Armagedoni, Yesu ketuadisa bambasi ya Nzambi samu na kufua bantu nionso yina  kena kutelemina Nzambi. Na manima, Yesu ketula Satana na boloko bamvula 1000. Bisadi ya Nzambi kevuka na mvita yango samu Yesu ketuadisa bau mpe yandi ketanina bau. Bau kevuanda na luzingu ya mvula na mvula na paladiso awa na ntoto.​—Tanga Kusonga 20:1-3; 21:3, 4.

Yinki ntangu Nzambi kekatula mambu ya yimbi awa na ntoto? Yesu pesaka “kidimbu” kemonisa ti nsuka mekuma pene. Mambu yina kena kuluta na yinza mpe yina kena sosa kuzimbisa luzingu ya bantu memonisa ti beto mekuma na “nsuka ya mambu ya ntangu yayi.”​—Tanga Matayo 24:3, 7-14, 21, 22.

Ntangu Yesu keyadila ntoto bamvula 1000 banda kuna na dizulu, yandi kemanisa bampasi nionso awa na ntoto. (Yezaya 9:6, 7; 11:9) Katula kuvuanda Mfumu, Yesu kevuanda Nganga-nzambi ya Nene, mpe yandi kekatula masumu ya bayina nionso kezolaka Nzambi. Na yau, na nzila ya Yesu, Nzambi kekatula kimbevo, kununa, mpe lufua.​—Tanga Yezaya 25:8; 33:24.

Bantu yina kezitisaka Nzambi bakevuanda na Paladiso. (1 Yoane 2:17) Yesu tindaka balongoki na yandi basosa bantu ya kukikitisa mpe balonga bau yina bafueti sala samu Nzambi ndima bau. Bubu yayi, Yehova kena bongisa bamilio ya bantu samu na kuvuanda na Paladiso awa na ntoto. (Sofonia 2:3) Na Bayinzo ya Kimfumu ya Bambangi ya Yehova, bantu kelongukaka kuvuanda babakala mpe batata ya mbote, banketo mpe bamama ya mbote. Bana na bibuti na bau kesambilaka kisika mosi mpe bau kelongukaka mutindu ya kubaka mambote na nzila ya nsangu ya mbote.​—Tanga Mishe 4:1-4.