Beto metonda nge mingi na mutindu nge mebaka ntangu ya kutadila mua mukanda yayi samu nge zaba beto Bambangi ya Yehova mbote, mambu yina beto kesalaka, mpe mutindu nkubukulu ya beto ketambudilaka. Beto kele na kivuvu ti mua mukanda yayi mesadisa nge nge mona ti beto kele mpenza bantu yina kena kusala luzolo ya Yehova bubu yayi. Beto mekindisa nge nge tatamana kubaka nzayilu ya Nzambi, nge zabisa bantu ya dibuta ya nge mpe bankundi ya nge mambu yina nge kena kulonguka, mpe nge kutakanaka mbala na mbala na beto na balukutakanu na beto.​—Baebreo 10:23-25.

Ntangu nge kena kutatamana kulonguka mambu metadila Yehova, nge kemona ti yandi kezolaka nge mingi. Yau ketinda nge nge sala nionso samu nge monisa ti nge diaka nge kezolaka yandi. (1 Yoane 4:8-10, 19) Kasi yinki mutindu nge lenda monisa na luzingu na nge ya kilumbu na kilumbu ti nge kezolaka Nzambi? Samu na yinki bansikudukusu na yandi kele samu na mambote ya nge? Mpe yinki kesadisa nge kesepela kusala luzolo ya Nzambi kintuadi na beto? Muntu yina kelongukaka na nge Biblia kesepela kumonisa nge bamvutu samu nge na dibuta na nge beno ‘bikana na kati ya nzola ya Nzambi, . . . samu na luzingu ya mvula na mvula.”​—Yude 21.

Samu nge kuenda na ntuala na nzila ya kedika, beto kena kukindisa nge nge longuka diaka mukanda yai “Mutindu ya Kubikana na Nzola ya Nzambi”.