Kinkesi ya bantu ya politiki kena kumonana mingi na yinza.

•    Na ntangu ya bavoti yina salamaka na Mexique na mvula 2023-2024, bantu ya politiki 39 yina pesaka bankumbu na bavoti kufuaka, buela diaka mambu yankaka ya kinkesi ya bantu ya politiki.

•    Ntama mingi ve na Europe mambu mingi ya kinkesi ya bantu ya politiki salamaka kuna, na kati na yau bazolaka kufua premier ministre ya buala Slovaquie na kilumbu ya 15 mai 2024.

•    Na États-Unis, na kilumbu ya 13 juillet 2024 bazolaka kufua Donald Trump yina vuandaka prezidan na bau ya ntama.

 Samu na yinki kinkesi ya bantu ya politiki mekuma mingi? Kilumbu yankaka yakemanisa? Yinki Biblia metuba?

 Biblia samunaka ti na ntangu na beto, yina yamebokidila “bilumbu ya nsuka,” bantu mingi kevuanda na bikadulu yina kesalaka ti kinkesi mpe bukabuani vuanda.

•   ‘Na bilumbu ya nsuka bantangu ya mpasi mpe ya mikakatano kevuanda. Samu bantu kevuanda . . . bantu yina mekondua butondi, bantu yina mekondua kukuikama, . . . bantu yina kezolaka ve kusala na nguizani, . . . bantu ya nko, . . . bantu yina ketekaka bayankaka, bantu ya yintu ngolo, bantu yina mefuluka na lulendo.’—2 Timote 3:1-4.

 Biblia samunaka diaka ti kinkesi kevuanda, na kifuani kunuana mpe kinkesi ya bantu ya politiki kele kidimbu yina memonisa ti beto mekuma na ntangu yango. (Luka 21:9, noti na yinsi ya paje) Nzokande, kinkesi mpe bukabuani ya bantu ya politiki ketatamana ve samu na mvimbamvimba.

 Biblia sasilaka ti Nzambi ketula guvernema na yandi ya dizulu na kisika ya baguvernema ya bantu.

•    “Nzambi ya dizulu ketula kimfumu mosi yina . . . ketololatolola bimfumu yango nionso [yankaka] mpe yakesukisa yau.”—Daniele 2:44.

 Kimfumu ya Nzambi kesangisa mpenza bantu mpe yaketula kiyenge na yinza ya mvimba.

•    Bamebokidila Yesu Klisto, N’yadi na yau, “Ntinu ya kiyenge,” mpe yandi kesalaka ti ‘kiyenge . . . vuanda na nsuka ve.’—Yisaya 9:6, 7.

•    Ata bubu yayi, bantu yina Kimfumu yango keyadila kena kulonguka mutindu ya kuvuanda na kiyenge. Yau yina Biblia metuba: “Bakekumisa mipanga na bau bima ya kutimunina ntoto mpe makonga na bau makuangola ya kuzengila matiti. Dikanda mosi kenanguna ve mopanga samu na kunuana na dikanda yankaka, bakelonguka diaka ve mvita.”—Yisaya 2:3, 4.

 Samu na kulonguka mambu yankaka, tanga disolo “Bokonzi ya Nzambe ekosala nini?” mpe tala video Bokonzi ya Nzambe ezali nini?