MUNA Nkand’a Nzambi, muna kapu kia 22 kia nkanda Etuku, Nzambi wavovesa Abarayama vo kenda kuna zunga kiakala vala ye nsi andi mu kele kimenga. Tutanganga vo: ‘O Abarayama obongele nkuni za lukau, osidi zo vana vembo dia Isaki wa mwan’andi; onatini mpe vana koko kwandi tiya ye mbele; bele kwau, yau ewole kumosi.’—Etuku 22:6.

Nkand’a Nzambi ke usasilanga ko una o wantu kuna nz’ankulu bakwikilanga tiya. Nga Abarayama yo Isaki sinza kia tiya banata? Nkwa ngangu mosi osasilanga oma ma Nkand’a Nzambi wavova vo wau vo nkangalu wanda wakala, “e sinza kia tiya mu nzila kiadi zimina.” Nanga Abarayama yo mwand’andi bakubika lekwa yawonso bavua o mfunu muna kwika o tiya.

Kansi, akaka bevovanga vo muna lumbu yayina, diampasi diakala mu kwika tiya. Muna kuma kiaki, nanga wantu kala dia tiya banatanga. Dilenda kala vo ku nzo a muntu ankaka babakilanga dio. Akwa ngangu ayingi bekwikilanga vo Abarayama makala ma tiya kanata muna nkangalu. Nanga wasia makala mama ma tiya muna kinzu kiakala yo nsinga wa natina yo nata kio muna nkangalu. (Yesaya 30:14) I bosi, avo tiya kazolele kwika, wasianga kala dia tiya vana nkuni zakete-kete zayuma.