1, 2. (a) Aweyi e nza yayi inina nze kimpumbulu ona ovondwa ke kolo ko? (Tala e fwaniswa va ntandu.) (b) Aweyi bemona awonso bena kuna zulu yo va ntoto vava e nza yayi yambi ifwaswa?

YINDULA e diambu edi: Muntu mosi una vo kimpumbulu okangalanga vana yanzala kia pelezo, ayingidi bakazidi vo “Tala mvumbi okangalanga.” Ekuma bavovele e mvovo miami? Kana una vo kimpumbulu moyo kena yo vimpi wambote, wazengelwa kala e tumbu kia lufwa ye ke kolo ko ovondwa. Kuna kwa yau, dina nze yandi wafwa se kolo. *—Tala e mvovo vana yand’a lukaya.

² E nza yayi yambi tuzingilanga ina nze kimpumbulu ndioyo ovondwa ke kolo ko. Nkand’a Nzambi uvovanga vo: “E nza mu vioka yina.” (1 Yoane 2:17) Ke kolo ko Yave ofwasa e nza yayi. Muna kuma kiaki, ke tuna ye lukatikisu ko vo fwaswa kikilu ifwaswa. Kansi, vena ye nswaswani vana vena mbaninu a nza yayi ye nzengo za vonda kimpumbulu  kiakina. Akaka balenda mona vo e mpila ifundisilu kimpumbulu ke yansongi ko, balenda nkutu telamena afundisi kimana kalembi vondwa. Kansi, Yave mfundisi alunga, e nzengo zandi za fwasa e nza yayi zansongi. (Nsiku 32:4) Ke kolo ko e nza yayi ifwaswa. Vava e nza yayi ifwaswa, awonso kuna zulu yo va ntoto bemona vo e mfundis’a Yave yansongi. Muna kolo kiakina, tuvevoka emvimba!

3. Nkia mambu yá mefokoka vava Kintinu kia Nzambi kikwiza?

³ Nkia mambu mefokoka vava e “nza” yayi ‘ivioka’? Mawonso mambi mevangamanga o unu. Ediadi dimosi muna ‘nsangu zambote za Kintinu.’ (Matai 24:14) Mu longi diadi, tuvovela mambu yá mefokoka vava Kintinu kia Nzambi kikwiza: Wantu ambi, nkubika zivunanga wantu, mavangu mambi ye mambu mampasi. Muna konso diambu tuzaya (1) e mfwilu dikututwasilanga, (2) dina Yave kevanga mu kuma kia mambu mama ye (3) kina kevingisa vana fulu kia mambu mama.

4. Nkia mfwilu bekututwasilanga wantu ambi o unu?

⁴ Nkia mfwilu bekututwasilanga wantu ambi o unu? Paulu wa ntumwa wavova vo muna lumbu ya mbaninu “mukwiza nsungi zampasi.” I bosi, wakudikila vo: “Wantu ambi ye akwa luvunu, besakisa vanga o bi.” (2 Timoteo 3:1-5, 13) Nga omonanga e ziku kia mambu mama? Ayingi muna yeto tumueswanga e mpasi kwa wantu ambi, nze yimpumbulu ye awana besianga mpambula. Akaka muna yau ke beswekanga ko e mambu mambi bevanganga. Akaka bekuyisonganga nze wantu ambote, kinga yimpumbulu. Kansi, kana nkutu vo ke twavangilu mbi ko kwa yimpumbulu, yeto awonso tumonanga mpasi zitwasanga wantu ambi. Mpasi tumonanga mu ntima vava tuwanga una bebangikilanga wan’akete, anunu ye akaka ana ke belendanga kuyitanina ko. E yimpumbulu yayi bevangilanga mambu nze bulu ya futa yovo nkuya. (Yakobo 3:15) Tuna ye kiese wau vo Diambu dia Yave dikutuvananga vuvu kia kusentu.

5. (a) Nkia lau divewanga kwa yimpumbulu? (b) Adieyi dibwila awana ke bazolele soba ko?

⁵ Adieyi Yave kesinga vanga? O unu, Yave ovananga e lau kwa wantu ambi kimana basoba. (Yesaya 55:7) Kana una vo ke kolo ko e nza yayi ifwaswa, ke yafundisu ko. Muna kolo kia mpasi zayingi, adieyi dibwila awana ke bazolele soba ko ye awana beyikamanga e nza yayi? Yave wasia nsilu wa fwasa yimpumbulu yawonso ova ntoto. (Tanga Nkunga 37:10.) O unu, wantu ayingi beswekanga mambu mambi bevanganga, nkumbu miayingi ke bevewanga tumbu ko. (Yobi 21:7, 9) Kansi, Nkand’a Nzambi ukutusungamesanga vo: ‘Meso ma Nzambi memona nzila za muntu, ye ngyenda zandi zawonso. Ke kwina tombe ko, ngatu kini kia fwa, kuna kuswekama mimpanga-mayi.’ (Yobi 34:21, 22) Muna kuma kiaki, ke vena fulu ko balenda swekamena Yave. Omonanga mawonso mana yimpumbulu bevanganga. Vava kivioka Armangedo, tutala e fulu kina bazingilanga, kansi ke tukubamona ko. Befwaswa yakwele mvu.—Nkunga 37:12-15.

6. Aki nani bevuluka vava wantu ambi befwaswa? Ekuma zinina se nsangu zambote?

 ⁶ Nani ovuluka vava wantu ambi befwaswa? Yave wavova vo: “Alembami bevwa nza; beyangalela muna mawete mayingi.” Muna nkunga wau, tutanganga mpe vo: “Asongi bevwa nza, besikila vo yakwele mvu.” (Nkunga 37:11, 29) Aki nani i “alembami” ye “asongi”? Alembami i awana belongokanga mambu ma Yave yo kunlemvokela. Asongi i awana bezolanga vanga mambu meyangidikanga Nzambi. O unu, e nza yazala ye wantu ambi lutila asongi. Kansi, muna nza yampa, alembami kaka ye asongi bezingila mo yo kitula e nza yawonso se paradiso.

7. E nkubika zivunanga wantu nkia mpasi zikututwasilanga o unu?

⁷ E nkubika zivunanga wantu nkia mpasi zikututwasilanga o unu? Mambu mayingi mambi mevangamanga o unu ke mu kuma kia muntu mosi ko, kansi, mu kuma kia nkubika zazi. E nkubika za mabundu wantu ayingi zivunanga. Kasikil’owu, bevovanga luvunu mu kuma kia Nzambi, bevovanga vo Nkand’a Nzambi ke ulendi bundwa vuvu ko, bevunanga mpe wantu mu kuma kia dina dibwila wantu ye ntoto kuna sentu. Ayadi ambi benungununanga e mvita ye fu kia sia mpambula yo bangika asukami ye awana bakondwa asadisi. Ayadi awaya bekitukanga amvuama ye akwa tunda kadi besianga mpambula yovo tambula mbabu. Akwa loko besafulanga e nza, sanza mavua ma nza yo vuna wantu kimana yau bakituka amvuama. Kieleka, e nkubika zazi zau zisakisanga e mpasi ova nza o unu.

8. Mun’owu wa Nkand’a Nzambi, adieyi disinga bwila e nkubika zina zimonekenanga kwa wantu ayingi o unu vo ke zilendi nikunwa ko?

⁸ Adieyi Yave kesinga vanga? E kolo kia mpasi zayingi kiyantika vava ayadi benuanisa mabundu mawonso maluvunu oma meyikilwanga muna Nkand’a Nzambi vo nkembi una ye nkumbu a Babele Anene. (Lusengomono 17:1, 2, 16; 18:1-4) E nkubika zazi za mabundu zifwaswa emvimba. Kansi, adieyi dibwila e nkubika zankaka zambi? Nkand’a Nzambi utezanesanga e nkubika zazi ye miongo ye sanga kadi zimonekenanga nze zau ke zilendi nikunwa ko. (Tanga Lusengomono 6:14.) Kansi, ukudikilanga vo ayadi ye nkubika zawonso ke ziyikamanga Kintinu kia Nzambi ko, fwaswa zifwaswa. Ediadi i diambu diansuka divangama muna kolo kia mpasi zayingi. (Yeremiya 25:31-33) Ke vesinga kala diaka ye nkubika zivunanga wantu ko.

9. Ekuma tulenda kadila ye ziku vo muna nz’ampa ke mukala mvuanga ko?

⁹ Nki kivinga vana fulu kia nkubika zivunanga wantu? Kuna nim’a Armangedo, nga vekala ye nkubika ova ntoto? Nkand’a Nzambi uvovanga vo: “Mun’owu wa nsilu andi tuvingilanga e zulu diampa ye nz’ampa, i mûna mukala unsongi.” (2 Petelo 3:13) E zulu diankulu ye nz’ankulu i ayadi ambi ye wantu ana beyalanga. Vava befwaswa, nki kivinga vana fulu kiau? “Zulu diampa ye nz’ampa.” E zulu diampa, i luyalu lwampa, i sia vo, Kintinu kina kiyalwa kwa Yesu Kristu ye  144.000. E nz’ampa, i wantu ana beyalwa kwa Kintinu kia Nzambi. Yesu ye awana keyala yau entwadi besinga tanginina Yave wa Nzambi aluvuvamu. (1 Korinto 14:33) Muna kuma kiaki, muna “nz’ampa” ke mukala mvuanga ko. Mambu mawonso mambote mekala. Vekala yo wantu ambote ana besikidisa e mambu ova nza. Wantu awaya befilwa kwa Yesu Kristu ye 144.000. (Nkunga 45:16) Yindula una ukala e zingu vava e nkubika zivunanga wantu zikatulwa yo vingiswa kwa nkubika yovo luyalu lumosi kaka olu ke lusinga yiviswa ko!

10. Nkia mavangu mambi metoma vangamanga muna zunga kieno? Nkia mpasi dikunutwasilanga?

¹⁰ E mavangu mambi nkia mfwilu mekututwasilanga o unu? E nza tuzingilanga yazala ye mavangu ma zumba, akwa loko ye umpumbulu. E nsaka za nza zikitulanga e mambu mama vo mambote kwandi kana una vo mekululanga nkanikinu kasikidisa o Yave mu kuma kia dina diambote ye dina diambi. (Yesaya 5:20) Mase bafwete taninanga wan’au muna mavangu mama mambi. Akristu awonso bafwete sianga ngolo za tanina e ngwizani au yo Yave mu nza yayi ke izitisanga nkanikinu mia Nzambi ko.

11. Adieyi tulongokele mu mpila ina Yave kafwasila e mbanz’a Sodomo ye Ngomora?

¹¹ Adieyi Yave kevanga mu kuma kia mavangu mambi? Yindula dina Yave kavanga mu kuma kia mambu mambi mavangamanga muna mbanz’a Sodomo ye Ngomora. (Tanga 2 Petelo 2:6-8.) Loti nkwa kwikizi kakala. Yandi ye esi nzo andi mpasi zayingi bamonanga mu kuma kia mambu mambi mana wantu bavanganga. Yave wafwasa e zunga kiakina kiawonso mu fokola umpumbulu wavangamanga mo. Kansi, wavanga wo mpe mu ‘sikidisa mbandu’ yovo lukisa awana bevanganga oma mambi o unu. Nze una Yave kafokolwela mavangu mambi kuna nz’ankulu, diau dimosi mpe kevanga ke kolo ko vava kefwasa e nza yayi.

12. Nkia salu ozolele sala muna nz’ampa?

¹² Nki kivinga vana fulu kia mavangu mambi? Muna nz’ampa, salu kiayingi kiakiese tukala kiau. Kasikil’owu, tukitula e nza yawonso se paradiso yo tunga e nzo zeto ye za azolw’eto. Tusinga tambula mpe ulolo wa wantu ana befuluka yo kubalonga oma ma Yave ye mawonso kavanga mu kuma kia wantu. (Yesaya 65:21, 22; Mavangu 24:15) Muna kolo kiakina, tukala ye salu kiayingi kikututwasila kiese yo vana nkembo kwa Yave.

13. O ukolami muna Edene nkia mfwilu watwasa?

¹³ E mambu mampasi nkia mfwilu mekututwasilanga? Wau vo e nza yazala ye wantu ambi, nkubika zivunanga wantu ye mavangu mambi, mpasi zayingi ditwasanga kwa wantu. Yeto awonso tumonanga e mpasi mu kuma kia mvita, usukami, mpambula, mayela ye lufwa. E mpasi zazi zawonso zayantika vava Satana, Adami yo Eva bakolamena Yave. Yeto awonso tumonanga e mpasi mu kuma kia ukolami wau.

14. Adieyi Yave kevanga mu kuma kia mambu mampasi?

 ¹⁴ Adieyi Yave kevanga mu kuma kia mambu mampasi? Badika maka mambu kesinga vanga. Yave wasia nsilu vo ofokola e mvita. (Tanga Nkunga 46:8, 9.) Ofokola mayela. (Yesaya 33:24) Okatula lufwa yakwele mvu. (Yesaya 25:8) Ofokola usukami. (Nkunga 72:12-16) Yave okatula mambu mawonso mambi mekututwasilanga e mpasi o unu. Okatula mpe umpukumuni wa Satana ye nkuya miandi.—Efeso 2:2.

15. Nkia mambu mefokoka vava kivioka Armangedo?

¹⁵ Yindula una ukala e zingu vava tuzingila mu nza yakondwa mvita, mayela yovo lufwa! Ke vekala diaka masoladi ko ngatu nkele. Ke tuvua mfunu a tupitalu ko, madotolo, mfelemi, nzo za lundila e mvumbi yovo ziami. Umpumbulu ke ukala diaka ko. Muna kuma kiaki, ke tuvua diaka mfunu a mapolisia ko, ayingidi ngatu makumba yovo nsabi. Mawonso mekututwasilanga e mpasi, mefokoka emvimba.

16, 17. (a) Aweyi bemona awana bevuluka muna Armangedo? Yika nona. (b) Adieyi tufwete vanga avo tuzolele vuluka vava e nza yayi ifwaswa?

¹⁶ Aweyi ukala e zingu vava mpasi zawonso zifokoka? Ke diasazu ko mu yindula una ukala e zingu. Wau vo se mvu miayingi tumonanga e mpasi, ezak’e ntangwa ke tubakulanga nkutu ko vo mpasi twina. Muna bonga e nona, wantu ana bezingilanga lukufi ye fulu kiningamenanga makumbi, nkumbu miayingi ke bewanga diaka mazu ma makumbi ko. Ana bezingilanga lukufi ye fuku ke bewanga diaka e nsudi ko. Kansi, vava Yave kefokola mpasi zawonso, tuvevoka emvimba muna mawonso mama.

¹⁷ Nki kivinga vana fulu kia mpasi zawonso tumonanga o unu? E sono kia Nkunga 37:11 kivovanga vo: “Alembami bevwa nza; beyangalela muna mawete mayingi.” Dialufiaulwisu kikilu mu zaya vo i diau Yave kazolele mu kuma kieto. Mu lumbu yayi yampasi tuzingilanga, vanganga mawonso olenda mu toma finama Yave ye nkubik’andi. E vuvu kiaku kia kusentu kiantalu kikilu. Muna kuma kiaki, yindulanga kio yo kitula kio kiakieleka kwa ngeye. Zayisanga kio mpe kw’akaka. (1 Timoteo 4:15, 16; 1 Petelo 3:15) Muna mpila yayi, okala ye ziku vo vava e nza yayi ifwaswa, ovuluka yo zinga ye kiese yakwele mvu.