Ezak’e ntangwa, nga diampasi dikalanga kwa ngeye mu sungamena mambu mana olongokele? Ezak’e ntangwa ediadi divangamanga kwa yeto awonso. Nki kilenda kusadisa mu singika e diambu diadi? Fimpululanga mambu masina olongokele.

Ekolo olongokanga, vaulanga e ntangwa mu soneka mambu masina. Paulu wa ntumwa wasadisa awana badi tanga o nkand’andi muna wo vanga. Wavova vo: “Ediadi i mbut’a diambu.” (Ayib. 8:1) Muna mvovo miami, Paulu wasadisa atangi mu landa e ngindu zandi yo bakula una konso diambu diakadila e ngwizani ye diambu dia sina.

Avo ofokwele e longi diaku dia Bibila, olenda vaula fintangwa, dilenda kala vo miniti kumi, mu toma badika e diambu diasina olongokele. Avo kulendele dio sungamena ko, olenda tala diaka muna ntu a diambu wakete yovo muna mvovo miasina. E mvovo miasina mitoma kalanga muna nlonga wantete muna konso tini. Avo ovangidi e diadi, osadisa ntomfo twaku muna sungamena. Avo diambu diampa olongokele, teza dio sasila muna mvovo mia ngeye kibeni. O fimpululanga mambu masina disadisa ntomfo twaku mu lembi vilakana yo toma bakula una olenda sadila mambu mana olongokele muna zingu kiaku.