1, 2. (a) Nkia mambu mena muna ‘lukau lwangovo lwa Nzambi lulembi tangakana’? (b) Nkia yuvu tubadika mu longi diadi?

YAVE watuvana lukau lusundidi o mfunu lusonganga o zola kwandi vava kafila Yesu wa Mwan’andi anzolwa ova ntoto. (Yoane 3:16; 1 Yoane 4:9, 10) Paulu wa ntumwa wayikila lukau lwalu vo ‘lukau lwangovo lulembi tangakana.’ (2 Korinto 9:15) Ekuma Paulu kasadila mvovo miami?

² Paulu wazaya wo vo e kimenga kia Yesu i ziku kisonganga vo e nsilu miawonso mia Nzambi milungana. (Tanga 2 Korinto 1:20.) Ediadi disongele vo ‘lukau lwangovo lwa Nzambi lulembi tangakana,’ i kimenga kia Yesu ye mawonso mambote yo zola kekutusonganga o Yave. Ke vena ye mvovo ko tulenda sadila mu yika mawonso mena muna lukau lwalu lwantalu. Aweyi tufwete monanga mu kuma kia lukau lwalu lwamfunu? Aweyi lukau lwalu lulenda kutukasakesela ekolo tukubamanga mu kuma kia Luyindulu lwa lufwa lwa Kristu  lukala kina Kiatatu, kia 23 kia ngonde a Malusu ya mvu wa 2016?

3, 4. (a) Aweyi omonanga vava bekuvananga lukau? (b) Aweyi lukau lwamfunu lulenda sobela e zingu kiaku?

³ Avo muntu utuvene lukau, kiese kiayingi tumonanga. Tukau twankaka twamfunu kikilu kadi tulenda soba zingu kieto. Kasikil’owu, yindula vo nkanu ovolele yo zengelwa e tumbu kia lufwa. Vana vau, vavaikidi muntu ona kuzeye ko, otambulwidi vo kavondwa vana fulu kiaku. Aweyi omona mu kuma kia lukau lwalu?

⁴ O lukau lwalu lwa zola ye lwamfunu lukufila mu vanga nsobani muna zingu kiaku. Nanga lukufila mpe mu kayilanga akaka, songa o zola yo loloka ana bekuvanganga e mbi. Muna zingu kiaku kiawonso, osonga vo ovutulanga matondo mu kuma kia muntu ona wavuluza.

5. Aweyi lukau lwa kimenga kia lukûlu kavana o Nzambi lusundidi konso lukau?

⁵ O lukau lwa kimenga kia lukûlu kavana o Nzambi lusundidi lukau tuyikidi mu nona. (1 Petelo 3:18) Yindula diambu edi: Yeto awonso twasambukila e sumu dia Adami. E tumbu kia sumu i lufwa. (Roma 5:12) O zola kwafila Yave mu tuma Yesu ova ntoto kimana “kayeleka o lufwa mu kuma kia wantu awonso.” (Ayibere 2:9) Kansi, kimenga kia Yesu mayingi kivanga. Kifokola lufwa yakwele mvu. (Yesaya 25:7, 8; 1 Korinto 15:22, 26) Awonso besonganga lukwikilu muna Yesu bezinga mu luvuvamu ye kiese yakwele mvu, kiakala awana beyala yo Kristu kuna zulu yovo ana beyalwa kwa Kintinu kia Nzambi ova ntoto. (Roma 6:23; Lusengomono 5:9, 10) Nkia nsambu zankaka tuvua mu kuma kia lukau lwa Yave?

6. (a) Nkia nsambu zitwasa lukau lwa Yave olakukiluanga moyo? (b) Yika mambu matatu mana lukau lwa Nzambi lukutufilanga mu vanga.

⁶ Mu kuma kia lukau lwa Nzambi, o ntoto ukituka se paradiso, mbevo ziwukwa, awana bafwa befuluka. (Yesaya 33:24; 35:5, 6; Yoane 5:28, 29) Tuzolanga Yave yo Mwan’andi anzolwa wau batuvana lukau lwalu “lwangovo lulembi tangakana.” O lukau lwalu adieyi lukutufila mu vanga? Lukutufila mu (1) tanginina Kristu Yesu una ufwene, (2) mu zola mpangi zeto, ye (3) mu loloka akaka ye nsi a ntima.

7, 8. Aweyi tufwete mona mu kuma kia zola kwa Kristu? Ediadi difwete kutufila mu vanga nkia diambu?

⁷ Diantete, zola kwa Kristu kufwete kutufila mu sadila zingu kieto mu kembelela Yesu. Paulu wa ntumwa wavova vo: “O zola kwa Kristu kukutufilanga.” (Tanga 2 Korinto 5:14, 15.) Paulu wazaya wo vo avo tutambulwidi o zola kwa Yesu, dikutufila mu kunzola yo kunkembelela. Kieleka, avo tubakwidi mana Yave kevanganga mu kuma kieto, o zola kwandi kukutufila mu zitisa Yesu muna zingu kieto. Aweyi tulenda wo vangila?

⁸ O zola muna Yave kukutufila mu tanginina mbandu a Yesu, i sia vo, landa e ntambi zandi una ufwene. (1 Petelo 2:21; 1 Yoane 2:6) Vava tulemvokelanga Nzambi yo Kristu, tusonganga o zola kweto muna yau. Yesu wavova vo: “Konso ona una ye nkanikinu miame yo lunda mio, i yandi unzolele. Konso ona unzolele, o Se diame  mpe okunzola, omono ikunzola, ikuyisengomona kwa yandi.”—Yoane 14:21; 1 Yoane 5:3.

9. Nkia ntonta tunuananga zau?

⁹ Muna nsungi a Luyindulu, diamfunu twabadika una tusadilanga e zingu kieto. Muna kuma kiaki, ukiyuvula: ‘Mu nkia mambu itangininanga Yesu? Nkia mambu mfwete singika?’ Diambote twakiyuvulanga e yuvu yayi, kadi o wantu a nza bezolanga vo twatanginina mana bevanganga. (Roma 12:2) Avo ke tukebele ko, tulenda yantika tanginina alongi ye akwa tunda a nza yayi. (Kolosai 2:8; 1 Yoane 2:15-17) Aweyi tulenda zizidila ntonta zazi?

10. Nkia yuvu tufwete kiyuvula muna nsungi a Luyindulu? E mvutu za yuvu yayi zikutufila mu vanga nkia diambu? (Tala e fwaniswa kuna lubantiku lwa longi.)

¹⁰ Muna nsungi a Luyindulu, diambote twafimpa e mvuatu mieto, filme, miziki tuwanga, mana mena muna komputadore, telefone ye tablet zeto. Ukiyuvula: ‘Avo Yesu wizidi yo mona e mvuatu miame, nga kimona nsoni ko?’ (Tanga 1 Timoteo 2:9, 10.) ‘Nga e mvuatu miame misonganga vo i nlandi a Kristu? Nga Yesu oyangalela mana italanga muna filme? Nga wadi yangalela miziki iwanga? Avo Yesu olombele telefone ame yovo tablet, nga kimona nsoni ko mu kuma kia mana kemona mo? Nga diampasi dikala mu sasila kwa Yesu e nsaka za video game izolanga?’ O zola kweto muna Yave kufwete kutufila mu veta konso lekwa ke kina ngwizani ko ye nkanikinu miandi, kana nkutu vo ntalu ayingi twasumbila kio. (Mavangu 19:19, 20) Vava twayekola zingu kieto kwa Yave, twansia nsilu vo tusadila zingu kieto mu kembelela Kristu. Muna kuma kiaki, tufwete vengomona yawonso yilenda kutukakidila mu tanginina Yesu.—Matai 5:29, 30; Filipi 4:8.

11. (a) O zola kweto muna Yave yo Yesu adieyi kukutufilanga mu vanga muna salu kia umbangi? (b) Aweyi o zola kweto kulenda kutufidila mu sadisa akaka muna nkutakani?

¹¹ O zola kweto muna Yesu kukutufilanga mu samuna e nsangu zambote yo vema kwawonso. (Matai 28:19, 20; Luka 4:43) Nga olenda vanga e nkubika kimana wasala se mviti a nzila ansadisi muna nsungi a Luyindulu yo vana 30 yovo 50 ma ola? Mpangi mosi wafwilwa o nkento, una ye kimbuta kia mvu 84, wayindula vo kelenda sala salu kia kimviti a nzila ko mu kuma kia kimbuta yo vimpi wandi. Kansi, wavanwa lusadisu kwa aviti a nzila a zunga kiandi. Bavanga e nkubika ya kwenda kumbaka muna kalu yo sola zunga kiambote kalenda sadila. Muna kuma kiaki, o mpangi ndioyo walungisa e kani diandi dia vanga 30 ma ola. Nga olenda sadisa mpangi muna nkutakani aku kimana kasala se mviti a nzila ansadisi muna ngonde a Malusu yovo Abidi? Dialudi vo, ke awonso ko balenda sala se aviti a nzila, kansi tulenda sadila e ntangwa ye ngolo zeto mu wokesa e salu kieto kia umbangi. Avo tuvanga wo, tusonga vo tufilwanga kwa zola kwa Yesu, nze una Paulu kavanga. Nkia diambu diaka o zola kwa Nzambi kulenda kutufila mu vanga?

12. O zola kwa Nzambi kukutufilanga mu vanga nkia diambu?

¹² Diazole, o zola kwa Yave kufwete kutufila mu zola mpangi zeto. Yoane wa ntumwa wasoneka vo: “Azolwa, avo i wau o Nzambi katuzolela, ozevo, yeto mpe tufwete zolaziana.” (1 Yoane 4:7-11) Muna kuma  kiaki, avo tutambulwidi o zola kwa Nzambi, oyeto mpe tuzola mpangi zeto. (1 Yoane 3:16) Aweyi tulenda kubasongela o zola?

13. Nkia mbandu katusisila Yesu muna diambu ditadidi zola akaka?

¹³ E mbandu a Yesu ikutusonganga una tulenda songela o zola kwa akaka. Vava Yesu kakala ova ntoto, wasadisanga wantu, musungula asukami. Wawuka mbevo, avanguki, mpofo, afwa matu ye mababa. (Matai 11:4, 5) Nswaswani ye afidi a mabundu, Yesu wayangalelanga longa o nkangu mambu ma Nzambi. (Yoane 7:49) Wazolanga kikilu wantu yo vanga mawonso mu kubasadisa.—Matai 20:28.

14. Adieyi olenda vanga mu songa o zola muna mpangi zaku?

¹⁴ E nsungi a Luyindulu nsungi ambote mpe mu yindula una olenda sadisila ampangi muna nkutakani, musungula anunu. Nga olenda kingula mpangi zazi? Nga olenda kubanatinanga madia, kubasadisa mu salu ya nzo, kubanata kuna lukutakanu yovo vaika yau muna salu kia umbangi? (Tanga Luka 14:12-14.) Yambulanga vo zola kwa Nzambi kwafila mu songa o zola muna mpangi zaku.

15. Nkia diambu tufwete sungamenanga?

¹⁵ Diatatu, o zola kwa Yave kukutufilanga mu loloka mpangi zeto. Yeto awonso twasambukiswa sumu ye lufwa kwa Adami. Muna kuma kiaki, ke vena muntu ko olenda vova vo: “Kivuidi lukûlu mfunu ko.” Kana nkutu selo kia Yave kisundidi e kwikizi, lukûlu kavuidi o mfunu. Konso muntu mu yeto mfuka ampwena kayambulwilwa. Ekuma tufwete sungamenanga diambu diadi? Tubaka e mvutu muna kingana kia Yesu.

16, 17. (a) Adieyi tulenda longoka muna kingana kia Yesu kia mfumu ye ntaudi andi? (b) Wau tubadikidi kingana kia Yesu, adieyi i kani diaku?

¹⁶ Yesu watá kingana kia mfumu waloloka ntaudi wakala ye mfuka ya 60.000.000 ma denali. Kansi kuna kwalanda, o ntaudi ndioyo kazola loloka nkw’andi ntaudi ko ona wakala ye mfuk’andi ya 100 denali. E nkenda kafwilwa kwa mfumu andi zadi fila ntaudi ndioyo mu loloka o nkw’andi. O mfumu wafunga makasi vava kawá vo ntaudi andi kazola loloka nkw’andi ko ona wakala ye mfuka yakete. Wavova vo: “Ntaudi ambi, omono yayambulwidi e mfuka yawonso wau wandodokele. Ongeye, kulendi fwila ntaudi wa nkw’aku e nkenda ko nze una omono yafwila e nkenda?” (Matai 18:23-35, sinsu vana yand’a lukaya) Nze una wavanga mfumu ndioyo, Yave watuyambulwila mfuka yampwena. Adieyi o zola kwa Yave ye nkenda zandi zifwete kutufila mu vanga?

¹⁷ Ekolo tukubamanga mu kuma kia Luyindulu,  diambote twakiyuvula: ‘Nga vena ye mpangi wampanga diambu diambi? Nga diampasi kwa mono mu kunloloka?’ Avo i wau, eyayi i ntangwa yambote ya tanginina Yave, ona ‘oyambulwilanga’ yovo loloka o wantu. (Nekemiya 9:17; Nkunga 86:5) Avo tusonga luyangalalu muna nkenda za Yave, tufwila akaka e nkenda yo kubaloloka ye nsi a ntima. Avo ke tuzolanga mpangi zeto ko ngatu kubaloloka, Yave mpe ke kutuzola ko yovo kutuloloka. (Matai 6:14, 15) Dialudi vo vava tulolokanga akaka, ke disongele ko vo tuvilakene dina batuvanga, kansi dikutusadisanga mu kwamanana kala ye kiese.

18. Aweyi o zola kwa Nzambi kwasadisila mpangi mosi ankento mu lembi sia sungididi muna usumuki wa mpangi akaka?

¹⁸ Ezak’e ntangwa, dilenda kala diampasi mu loloka usumuki wa mpangi zeto. (Tanga Efeso 4:32; Kolosai 3:13, 14.) I diau diabwila mpangi Lily. ^[1] (Tala mvovo kuna nsuk’a longi.) Mpangi Lily wasadisanga mpangi Carol wakala vo nkento ansona. Kasikil’owu, wanatanga mpangi Carol konso kuna kazolanga kwenda. Wansadisanga mpe mu kwenda sumba lekwa yo sala salu yankaka. Kana una vo mpangi Lily wavanganga mawonso mama, mpangi Carol wakala ye fu kia kunkumba, ezak’e ntangwa diampasi kikilu diakalanga mu kunsadisa. Kansi, mpangi Lily wasianga e sungididi muna fu yambote ya mpangi Carol yo kunsadisa mu mvu miayingi yavana kafwa mu kuma kia kimbevo. Kana una vo diampasi diakala kwa mpangi Lily mu sadisa mpangi Carol, wavova vo: “Ivingilanga ye tima diawonso mu mona mpangi Carol vava kefuluka. Nzolele zaya kiwuntu kiandi vava kekituka se muntu alunga.” Kieleka, o zola kwa Nzambi kulenda kutufila mu lembi sia sungididi muna usumuki wa mpangi zeto yo vingila vava usumuki ufokoka emvimba.

19. O ‘lukau lwangovo’ lwa Nzambi adieyi lukufila mu vanga?

¹⁹ Kieleka, Yave watuvana ‘lukau lwangovo lulembi tangakana.’ Diambote twasonganga luyangalalu lweto muna lukau lwalu. E nsungi a Luyindulu ntangwa yambote kikilu mu badika muna mawonso Yave yo Yesu bevanganga muna wete dieto. Yambula o zola kwau kwatufila mu tanginina Yesu una ufwene, mu songa zola kwa mpangi zeto yo kubalolokanga ye nsi a ntima wawonso.