O KONDWA kwa kwikizi muna longo mpasi zayingi kutwasanga. Dialudi vo akaka bemonanga vo balenda loloka akazi au ana batele zumba yo sia e ngolo za siamisa diaka e nzola muna longo lwau. a Kansi, diakala vo longo ke lufwidi ko, awana bebakulanga vo akazi au ke akwa kwikizi ko, mpasi zayingi bemonanga muna ntima. Adieyi dilenda kubasadisa mu zizidila e mpasi zazi?

Kana una vo ntantu zayingi ditwasanga, akazi ana bena vo minkondwa kuma bevuanga lufiaulwisu muna Nkand’a Nzambi. Besungamenanga vo Nzambi obakulanga e ntantu bemonanga.—Malaki 2:13-16.

“Muna ulolo wa ngindu zame za mbundu. O fiauzi waku uyangidika moyo ame.”—Nkunga 94:19.

Bill wavova vo: “Vava itanganga e sono kiaki, imonanga nze mono ivuvikwanga kwa Yave, nze una se diankenda kevanganga vava mwan’andi kena mu mpasi.”

“Kuna kwa nkwa walakazi okusonga vo nkwa walakazi.”—Nkunga 18:25.

Carmen ona wabembolwa kwa nkaz’andi wavova vo: “O nkaz’ame wambembola. Kansi, nzeye wo vo Yave nkwa kwikizi. Kalendi kunkendeleka ko.”

“Ke nutelama ntima muna konso diambu ko, kansi muna mambu mawonso muna sambu ye ludodokelo . . . yambula ndomba zeno zazayiswa kwa Nzambi; o luvuvamu lwa Nzambi luna luviokele umbakuzi wawonso luyingila ntima mieno.”—Filipi 4:6, 7.

Sasha wavova vo: “Nkumbu miayingi yatanganga e sono kiaki. Wau vo yasambanga e lumbu yawonso, Nzambi wampana luvuvamu lwa ntima.”

Awonso bayikilu mu longi diadi, ezak’e ntangwa bayindulanga vo ke belenda zizidila ko. Kansi, babunda e vuvu muna Yave wa Nzambi yo kumikwa kwa Diambu diandi. Bill wavova vo: “Lukwikilu lwame lwansadisa kikilu vava yamonanga vo mawonso ma zingu kiame masukidi. Kana una vo yadiatila ‘muna ndimb’a kini kia lufwa’ mu fikolo, Nzambi wakala yame.”—Nkunga 23:4.