Nanga osungamene Gail ona oyikilu kala, yandi wakatikisanga kana vo olenda zizidila lukendalalu mu kuma kia lufwa lwa nkaz’andi. Kansi, una ye vuvu kia mona diaka yo nkaz’andi muna nz’ampa ina Nzambi kasil’o nsilu. Wavova vo: “E sono kia Lusengomono 21:3, 4 i kiau itoma yangalelanga.” Kivovanga vo: “O Nzambi yandi kibeni okala yau. Okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.”

Gail wavova vo: “Nsilu wau wambote kikilu! Nkenda imonanga mu kuma kia awana bafwilwa kansi ke bena ye vuvu kia mona diaka azolwa au ko.” Gail ozingilanga ngwizani ye lukwikilu lwandi muna kuyivana mu salu kia Nzambi nze mviti a nzila. Ozayisanga nsilu a Nzambi kwa mfinangani zandi vo o “lufwa ke lukala diaka ko.”

Nanga olenda vova vo o ‘nsilu wau ke waludi ko.’ Kansi, badika nona kia Yobi. Wabakama kimbevo kiangolo. (Yobi 2:7) Kana una vo Yobi walomba vo kafwa, wakwikilanga vo Nzambi una yo nkuma wankumfula kimana kavutuka zinga ova ntoto. Wavova ye ziku kiawonso vo: ‘Unsweka muna ziami . . . Okumbokela yatambulwila, osi’etima mun’evangu dia moko maku.’ (Yobi 14:13, 15) Yobi wakala ye vuvu vo Nzambi okumwena viangi yo kumfutumuna muna mafwa.

Ke kolo ko, Nzambi ofutumuna Yobi kumosi yo wantu ayingi vava kekitula ntoto se paradiso. (Luka 23:42, 43) Nkand’a Nzambi uvovanga vo: “Vekala yo lufuluku.” (Mavangu 24:15) O Yesu watuvovesa vo: “Ke nusiviki dio ko ediadi, kadi e ntangwa ikwiza, ina ikala vo awonso bena muna ziami bewa nding’andi yo vaika.” (Yoane 5:28, 29) Yobi omona e ndungan’a nsilu wau. Osinga vutukila e ngolo zandi za kileke kadi e “nitu andi isunda o wete ke mu nitu a mwana ko.” (Yobi 33:24, 25) Idiau mpe divangama kwa wantu awonso bekwikilanga muna nsilu a Nzambi wa lufuluku ova ntoto.

Avo okendalalanga kwayingi mu kuma kia lufwa lwa muntu wazolanga, nanga mambu mayikilu ke mefokola lukendalalu lwaku ko. Kansi, o badika nsilu mina muna Nkand’a Nzambi dilenda kusadisa mu kala ye vuvu yo nkuma wazizidila e ntantu.—1 Tesalonika 4:13.

Nga ozolele zaya diaka una olenda zizidila lukendalalu? Nga ozolele zaya “Ekuma Nzambi keyambulwilanga e mpasi?” Avo i wau kota muna nzil’eto ya internete, jw.org/kwy mu zaya e mvutu za lufiaulwisu za Nkand’a Nzambi.