Ku nsi a Ciudad yawutukila, muna zunga kiambote kia mbanz’a Tamaulipas, kuna México. O wantu a mbanza yayi akwa ngemba ye bezolanga kayila akwau. Kansi dia nkenda mu vova vo mu kuma kia umpumbulu, e mbanza yayi yakituka se mbanz’a vonza.

Wana yá twawutuka, mono i mwana wanzole. Muna lusadisu lwa mase mame yavubwa muna Dibundu dia Katolika. Kuna kwalanda, yakota mu buka kia ayimbidi. Yakala yo luzolo lwa sambila Nzambi, kadi wonga yamonanga wa fundiswa kwa Nzambi yo yokwa kuna bilungi.

Vava yakala ye mvu tanu, se dieto watubembola. Ediadi diantwasila ntatu zayingi yo lukendalalu lwa ntima. Oyeto twatoma kunzolanga, kansi ketwabakula ko ekuma katubembolwela. O ngudi eto wasalanga kwayingi muna kutudikila.

Muna kuma kiaki, kiatanga sikola ko, yavanga kikundi ye aleke bansunda kimbuta. Bandonga o finga, nua mfomo, yiya yo nwana. Wau vo kiazolanga sakanenwa ko, yalongoka box, luta, judo yo sika nkele. Yakituka se kimpumbulu muna kileke. Mu nkele yatoma nuaninanga, nkumbu miayingi yanongwanga yo vaika menga mayingi. Fioti fiasala nga yafwila muna nzila. O ngudi ame nkenda zayingi kamonanga vava kangwananga muna nzila yazala ye menga yo kundata ku lupitalu.

Vava yakala ye mvu 16, nkundi ame mosi nkumbu andi Jorge, watukingula kuna nzo eto. Watuvovesa vo, oyandi Mbangi a Yave nsangu za mfunu kazola kutuzayisa. Wayantika kutuzayisa mana kakwikilanga muna sadila o Nkand’a Nzambi. I lumbu kiantete yawá e nsangu zazina. Yasivika vava yalongoka e nkumbu a Nzambi ye makani mandi. Jorge watulomba vo twalongoka o Nkand’a Nzambi yo yandi. Twatambulwila.

Yavevoka vava yalongoka e ludi mu kuma kia bilungi bia tiya, yabakula vo, longi diadi ke dina mu Nkand’a Nzambi ko. (Nkunga 146:4; Kimpovi 9:5) Vava yalongoka dio, kiamonanga diaka unkuta wa Nzambi ko. Yayantika mwena Nzambi nga Se dianzodi ona ozolele wete dia wan’andi.

 Ekolo yanungunukanga muna longi diame dia Nkand’a Nzambi, yamona o mfunu wa soba e kiwuntu kiame. Diavava vo yakituka nlembami yo yambula umpumbulu. O luludiku luna muna 1 Korinto 15:33 lwatoma kunsadisa. Sono kiaki kivovanga vo, e yikundi yambi “fu yambote ifwasanga.” Yabakula vo muna soba e fu yame, mfwete vonda kikundi yo wantu bamvukumunanga. Yavanga yikundi yampa ye mpangi muna nkutakani ya Kikristu. Ana besadilanga e nkanikinu mia Nkand’a Nzambi muna singika ntatani zau.

E sono kiankaka kiansadisa i Roma 12:17-19. E sono kiaki kivovanga vo: “Ke nuvutula muntu mbi muna mbi ko. . . . Avo dilendakana, kuna dieno sambu, nukadila kuna luvuvamu yo wantu awonso. Ke nulandi kunda ko, . . . Kadi diasonama vo: “‘Diame dia landa e kunda; mono kwame nsenda,” u kavovele o Yave.’” Yakwikila vo, Yave ofokola o umpumbulu muna ntangw’andi kasikidisa. Malembe-malembe yayambula umpumbulu muna zingu kiame.

Yamu wau kivilakananga ko diambu dimosi diambwila muna nkokela vava yavutukanga kuna nzo. Buka kia matoko ma yimpumbulu bena vo mbeni a buka kina yakala, bayantika kungwanda, o mfidi a buka wankazila, oku vo, “Uyitanina.” Vana vau yavanga e sambu kiankufi, yalomba kwa Yave vo kansadisa yazizidila o luvezo lwaluna. Kana una vo yafwana kuyitanina, yavua o nkuma wa lembi vutula mbi muna mbi, yayenda kwame. Muna lumbu kialanda, yawanana yo mfidi a buka kia yimpumbulu. Yamfungila kikilu makasi, kansi yasamba kwa Yave kansadisa yavuvama. Yatoma sivika, kadi o mfidi wampovesa vo: “Undoloka mu mana yavangidi o zono muna fuku. Omono mpe, nzolele kala nga ngeye. Nzolele longoka o Nkand’a Nzambi. Ekwe e kiese yamona wau yalembi vutula mbi mu mbi! Mu kuma kia dina yavanga, twayantika longoka o Nkand’a Nzambi kumosi.

Yamuna kolo kiakina, ayingi muna yitu ame ke balongokanga diaka Nkand’a Nzambi ko. Kansi, omono yabaka e nzengo za kwamanana longoka, kiayambula ko vo muntu yovo diambu diamvutukisa manima. Yazaya wo vo, okwenda mu tukutakanu twawonso kumosi yo nkangu a Nzambi, diafwana kunsadisa mu wuka o ntima ame wabudika yo vua e kanda dina yavavanga. Yakwamanana nungunuka, muna mvu wa 1991 yavubwa yo kituka Mbangi a Yave.

Nkwa makasi yakala ye kimpumbulu. Kansi, e Diambu dia Nzambi diasoba e zingu kiame. Owau, izayisanga e nsangu za Nkand’a Nzambi kuna luvuvamu kwa konso muntu ozolele zo wá. Ngina ye lau dia sadila Yave mu salu kia ntangwa ke ntangwa se vioka 23 ma mvu.

Yasadila mpe kuna vula dia Mbangi za Yave kuna México. I kûna yazayanena yo Claudia wa nkwa zabu-zabu, twakazala muna mvu wa 1999. Ivutulanga matondo kwa Yave wau kansambula muna kumpana nkento akwikizi.

Mono yo nkaz’ame twasadila kuna Mexico muna nkutakani a ndinga a nsisu, twasadisanga mababa bazaya Yave. Kuna kwalanda, twafilwa kuna nsi a Belize muna longa wantu o Nkand’a Nzambi. Kana una vo, twavevola e zingu kieto kwaku Belize, tuvuidi yawonso ikututwasilanga e kiese muna zingu. Ke vena lekwa ko tulenda sobanesa ye salu kiaki.

Kuna kwalanda, ngudi ame wafokola e longi diandi dia Nkand’a Nzambi ye wavubwa. O mpangi ame yo nkaz’andi kumosi yo wana au bakituka mpe Mbangi za Yave. Ayingi muna akundi ame yazayisa e nsangu za Kintinu, Yave mpe besambilanga.

Diankeda vo, akaka muna yitu yame bafwa, kadi kebazola soba mavangu mau mambi ko. Kele vo yakwamanana kimpumbulu, nga yafwanga kolo nze yau. Ivutulanga matondo kwa Yave wau kansadisa yamfinama kumosi ye asambidi andi ana bandonga kuna zola yo luzindalalu lwawonso o mfunu wasadila e nkanikinu mia Nkad’a Nzambi muna zingu kiame.