Nusalaziana Kimana Nwanungunuka Muna Mwanda

SALAZIANA mfunu kwina kimana esi nzo banungunuka muna mwanda. Vava Yave kasema yakala yo nkento antete, wasonga mfunu wa salaziana. Eva wakala se “nsadisi” kuna kwa Adami. (Etu. 2:​18) Muna longo, yakala yo nkento bafwete sadisanga muntu yo nkw’andi. (Kim. 4:​9-​12) Salaziana mfunu kwina muna lungisa dina kevavanga Yave kwa mase yo wana.

Nusambilanga Nzambi Kumosi Muna Nzo

Barry yo nkaz’andi Heidi, wan’atanu bawuta. Kuna kwa yau, o salaziana mu kala y’elongi dia Nkand’a Nzambi dia esi nzo dikubasadisanga mu nungunuka muna mwanda. Barry wavova vo: “Mun’elongi dia esi nzo, nkumbu miayingi ivananga konso mwana kiyekwa kiandi. Ezak’e ntangwa ikubalombanga batanga elongi kingandi muna Despertai! yo vova dina balongokele. Tukalanga mpe ye kunku kia nsongesela, kimana konso mwana kazaya dina kevova muna salu kia umbangi.” Heidi wakudikila vo: “Konso muntu mu yeto osonekanga salu ya mwanda ina kazolele sala yo mokena dio vava tukalanga y’elongi dia esi nzo, mu zaya kana vo mu lungisa dio tuna.” Yakala diadi yo nkaz’andi bemonanga mpe vo lembi tala televizau eyaka lumbu mu fuku divananga esi nzo e ntangwa ya tanga.

Muna Lumbu kia Lukutakanu

Mike yo nkaz’andi Denise, wana yá bawuta. Nkia nluta bebakanga muna salaziananga? Mike wavova vo: “Ezak’e ntangwa diampasi dikalanga mu lwaka mu ola yambote mu lukutakanu kana nkutu tutomene kubama. Kansi, o salaziana kusadisanga mu lwaka mu ola yambote.” Denise wavova mpe vo: “Vava wana benungunukanga e ntela, konso mwana okalanga ye salu kiandi. Mwan’eto ankento Kim, okutusadisanga mu lamba yo kubika e meza.” Michael wa mwan’au eyakala osungamenanga vo: “Konso Kiazole muna fuku, lukutakanu muna nzo eto lwavangamenanga. Muna kuma kiaki, twakombanga e nzo yo kubika e kunda.” Matthew, mwana wakaka wakudikila vo: “S’eto osianga ngolo mu lwaka mu ola ambote kuna nzo, mu kutusadisa twakala twakubama muna ola lukutakanu.” Nkia nluta bebakanga?

Nluta mia Salaziana

Mike wavova vo: “Muna mvu wa 1987, mono yo Denise twayantika e salu kia mviti a nzila. Muna ntangwa yayina, wana eto atatu kuna nzo bazingilanga. I bosi, wole muna yau bakituka mpe aviti a nzila, ye akaka muna yau basala muna salu kia tunga Betele. Diambu diakaka diatuvana e kiese i sadisa wantu 40 mu kiyekola kwa Yave yo vubwa. Twakala mpe y’elau dia sala muna salu kia tunga maseka ye muna nsi za kinzenza.”

Kieleka, salaziana muna nzo nluta ditwasanga. Nga olenda vava mpila yakaka ya sadisa esi nzo aku? Kala ye ziku vo e fu kia salaziana kisadisa esi nzo aku mu nungunuka muna mwanda.

[Foto ina muna lukaya lwa 28]

O vang’e nsongesela disadisanga mu tomesa e salu kia umbangi