Nga Wavaudi e Ntangwa ya Longoka Nkand’a Nzambi?

MU mvu waviokele, Buka kia Selo Yambuta bazayisa e nsobani yavangamene mu kuma kia lumbu ya tukutakanu kimana twakala ye ntangwa yafwana ya longoka Nkand’a Nzambi kumosi y’elongi dia esi nzo. Kele vo u se, ofwete vanga e nkubika kimana nwakalanga y’elongi dia Nkand’a Nzambi yo nkaz’aku kumosi yo wana. Akazi ana ke bena yo wana ko, bafwete vaulang’e ntangwa mu longoka Nkand’a Nzambi yau awole. Ampumpa ana ke bena ye wana ko bafwete vaulang’e ntangwa mu kala y’elongi dia yau kibeni dia Nkand’a Nzambi.

Ndonga basongele luyangalalu lwau mu kuma kia nkubika ya kala ye Fuku wa Nsambila ya Esi Nzo. Kasikil’owu, Kevin una vo nkuluntu wasoneka vo: “Kina ye mvovo ko mu songa luyangalalu lw’ampangi muna nkutakani, vava twawá luzayisu lwalu. Yeto akuluntu, tumokenanga mu zaya kana vo tukalanga y’elongi dia esi nzo muna fuku una ke tukalanga diaka ye lukutakanu ko, nze una wasikidisa Buka kia Selo Yambuta.”

Jodi, una vo o nkaz’andi nkuluntu, wasoneka vo: “Wana tatu amakento tuna yau, bena ye kimbuta kia mvu 15, 11 ye 2. Ke kolo ko twayele muna nkutakani ya ndinga ya sinsu. Ediadi ngolo ye ntangwa yayingi divavanga mu kubika malongi mawonso. Owau, mu kuma kia nkubika yayi yampa, twavaula o fuku una tukalanga ye Nsambila ya Esi Nzo.”

John yo nkaz’andi Joann, bena vo aviti a nzila a ngonde ke ngonde, basoneka vo: “Wau vo salu yayingi twakalanga yau muna nkutakani, diampasi diakalanga mu vaula e ntangwa ya vanga elongi dieto dia nkand’a Nzambi. E nkubika yayi yampa i lukau lutukidi kwa Yave muna kutusadisa muna mwanda, kele vo tusadidi e ntangwa nze una wasikidiswa.”

Tony, wa mpumpa una ye tezo kia mvu 20, wavaula fuku wa Kiazole mu vanga elongi dia yandi kibeni. Osadilanga e lumbu yakaka mu kubika malongi mevewa muna nkutakani. Kansi, Tony wavova vo: “Ivingilanga e lumbu Kiazole ye kiese kiawonso.” Ekuma? “Ekiaki i lumbu yavaula mu kuma kia Yave.” Tony wasasila vo: “Vioka ola zole, ilongokanga mambu mekumikanga ngwizani ame yo Yave. Ikalanga ye ntangwa yayingi ya longoka yo badika e sono ya Nkand’a Nzambi itanganga.” Nkia nluta ditwasanga? “Owau, malongi ma Yave metoma kotanga muna ntim’ame.” Muna bonga e nona, wakudikila vo: “Muna nkanda Perspicaz, yatanga oma ma kikundi kia Davidi yo Yonatane. Mayingi yalongoka mu kuma kia nzola mvevo kasonga Yonatane. E mbandu andi yansadisa mu zaya dina divavwanga mu kala nkundi akieleka. Kieleka, ivingilanga o fuku wa Kiazole ye kiese kiawonso muna zaya diaka mambu mayingi mamfunu.”

Ka lukatikisu ko vo, e selo yawonso ya Yave bevwa nluta miayingi kele vo betoma sadila e ntangwa baveno mu kalanga y’elongi dia Nkand’a Nzambi yovo fuku wa nsambila ya esi nzo.