Muna Malundilu Meto Lunda Salanganu Yeto Yankulu

NKANGU a Yave bavwidi efwa diampwena dia mwanda. Efwa diadi i mabuku, mafoto, nkanda, tusansu twa wantu, salanganu ya nsambil’eto, salu kia umbangi yo lusansu lweto. Nkia nluta dilenda twasa muna lunda lekwa yayi yankulu ya lusansu lwa salu kieto? Mase muna Isaele y’ankulu bakanikinwa vo bazayisanga kwa wan’au e nsiku ye mavangu m’esivi ma Yave kimana ‘bakala ye vuvu muna Nzambi.’—Nku. 78:1-7.

Tuka kuna nz’ankulu, o satulula muna malundilu mankulu ditoma sadisanga mu bakula ndungan’ekani dia Yave. Kasikil’owu, vava atantu bavava ningamesa e salu kia tempelo muna Yerusaleme, nyadi mosi wasatulula malundilu makala muna Akimeta muna mvivu a Media yo solola mo nkanda mina Kurese wa Ntinu kavanina o nswa wa tungulula tempelo. (Eze. 6:1-4, 12) Muna kuma kiaki, e tempelo yatungululwa mun’owu wa luzolo lwa Nzambi. E nkanda miakala muna malundilu mia sadisa mpe Luka wa nsoneki a nsangu zambote mu ‘toma kunka mawonso tuka kuna ntete.’—Luka 1:1-4.

E Buka kia Selo Yambuta besianga e sungididi muna lusansu lwa salu kieto kia Kintinu. Muna songa o mfunu wa lunda nkanda yo zayisa lusalu  lweto lwa mwanda kw’akaka, mpangi mosi muna buka kia Selo ya Mbuta wavova vo: “Muna zaya kuna tukwendanga, tufwete zaya kuna tutukidi.” Muna kuma kiaki, e vula diasina ku Nova York diavangidi buka ki’Akubiki a Malundilu. E buka kiaki, kisalanga muna lutumu lwa Buka kia Asoneki.

“SALANGANU YE MAFOTO MA ESI NZO” ETO

Ekolo ntangwa iviokanga, ndonga mu yeto tuyangalelanga lunda lusansu lwa esi nzo zeto. Owau, e Buka ki’Akubiki a Malundilu kisalanga ye fululu kiawonso muna lunda nkanda ye salanganu yeto yankulu. Mafoto melundwanga malenda yikilwa vo “mafoto ma esi nzo eto.” Nkanda mieto miankulu, tusansu twa zingu kia wantu ye salanganu yantalu, isiwanga mpe muna Malundilu. E “salanganu” yayi ikutusadisanga mu toma zaya oma ma salu kieto kwa Nzambi yo kumika e vuvu kia kusentu kia esi nzo zeto za kimwanda.

Tala salanganu yeto yankulu mun’elongi diampa dina yo ntu a diambu vo “Muna Malundilu Meto.” Elongi diadi dikala vaika mun’Eyingidilu dia longoka. Kasikil’owu, Eyingidilu dilanda disonga yaka salanganu yo zingula lusansu luvana mvutu za yuvu eyi: Aweyi yakala e nkela yanatinwanga Aurora do Milénio? Aki nani basadilanga yo? Nkia kolo yasadilwa? Nki’ekani yasadilwanga?

Nze una mafoto mesungamesanga lusansu lw’esi nzo, e salanganu ikala sasilwa mun’elongi diadi, mambu mayingi ikutulonga mu kuma kieto, lunungunuku lwa salu kieto, lukwikilu ye unkabu basonga mpangi zeto ana bavita, kiese ye mpasi bawanana zau muna sadila S’eto ezulu anzolwa. Tusinga mona mpe vo luludiku ye lusadisu lwa Nzambi kwa nkangu andi ke lufunganga ko. (Nsi. 33:27) Tusidi e vuvu vo Yave osinga sambula ngolo tuvanganga muna lunda lusansu lwa nkubik’eto. O lusansu lwalu lusinga kutusadisa mu siamisa kintwadi kieto yo kwamanana vanga luzolo lwandi.

[Babu/​Foto ina muna lukaya lwa 31]

Toma Fimpa

Muna kubika nkanda mieto mia Kikristu, DVD ye sadilwa yakaka isasilanga oma ma Nkand’a Nzambi, asoneki, akwa umbangu ye asatuludi eto, salanganu ina muna malundilu mankulu besadilanga. Muna kuma kiaki, Akubiki a Malundilu besianga sungididi kia lungalakesa yo lunda salanganu yeto, nze nkanda mia mavula, nkanda mia nkutakani, nkanda mia wantu ye nkanda mia nkubika za nza. Tala una kisadilwanga e salu kiaki:

Una Bevwilanga Salanganu yo Toma Fimpa: Salanganu yamfunu yisiwanga muna malundilu. Yakaka muna salanganu yayi yitukanga kwa mpangi zeto bena vo yitu yau besadilanga Yave ye kwikizi kiawonso mu mvu miayingi. Ofimpa yo tezanesa salanganu yayi, dikutusadisa mu toma bakula lusansu lwa nkubik’eto ye lw’awana bayivana emvimba muna nkubika yayi.

Ndandani: Muna ulolo wa salanganu yisiwanga muna Malundilu, yakaka yankulu kikilu. Yakaka yanene, yakaka yakete, yawonso yisiwanga muna ndandani kimana yasadilwa kuna sentu.

Londa yo Vangulula: E salanganu ye nkanda miabakuka milondwanga yo vangululwa kw’akwa umbangu. Nkanda, mafoto, zulunalu, filmes ye CD zisiwanga muna komputador. Ediadi disadisanga mu toma lunda nkanda miami ye salanganu yakaka yamfunu.

Lunda yo Vutula: E nkanda ye salanganu yitoma lundwanga yo lunga-lungwa kimana yalembi via yo lembi yondalala muna maza. Muna toma lunda yo tatidila lusansu lwa nkubika eto, ampangi bakubikidi e lundilu diampwena dia komputador.

[Mvovo mia Fwaniswa mina muna lukaya lwa 32]

1. Luzayisu lwa “Fotodrama da Criação.” 2. Buku dia nkumbu z’awana balombanga Eyingidilu. 3. Kalu dia makina mawisa e ndinga. 4. Fukwa ki’Eyingidilu dia 15 kia Abidi, 1912, mu Kingelezo. 5. Luzayisu lwa pelezo ya J. F. Rutherford. 6. Microfone mia radio WBBR. 7. Fonógrafo. 8. Nkele yanatina nkanda. 9. Nkanda wa mpangi mosi. 10. Telegrama ya J. F. Rutherford.