Dimosi muna mambu mekutusadisanga, i lufiaulwisu tutambulanga kw’esi nzo zeto, akundi, ye kw’ampangi muna nkutakani.

E mvovo mia nzola mia nkundi eto milenda kala nze mazi ma nguka, malenda kutuwuka yo kutukasakesa. (Nga. 16:24; 18:24; 25:11) Kansi, Akristu akieleka ke betokanenanga kaka fiaulwiswa ko. Bevavanga mpe ‘fiaulwis’awana bena muna konso mpasi, muna mfiaulwiswa bafiaulwiswa kwa Nzambi yau kibeni.’ (2 Kor. 1:4; Luka 6:31) Antonio, una vo nkengi a mvivu kuna Mexico, wawanana ye diambu diadi.

Vava kabakama kimbevo kia câncer ya menga, Antonio wakendalala kwayingi. Kana una vo i wau, wavanga mawonso mu sunda e ngindu zalembi songa kakala zau. Mu nkia mpila? Wavavanga sungamena nkunga mia Kintinu yo yimbila mio yo badika e mvovo mia nkunga miami. O samba muna nding’angolo yo tanga Nkand’a Nzambi diakala mpe dialufiaulwisu.

Kansi owau Antonio ozeye wo vo lusadisu lusundidi katambula kwa mpangi lwatuka. Wavova vo: “Mono yo nkaz’ame vava twatokananga, twabokelanga yitu kieto una vo nkuluntu muna nkutakani mu samba yeto entwadi. Ediadi diatufiaulwisanga yo kutuvuvika.” Wakudikila vo: “Tuvulanga matondo mu kuma kia lusadisu twavewa kwa yitu yeto ye mpangi zeto muna nkutakani, ke vavioka kolo kiayingi ko twasunda e ngindu zalembi songa.” Ekwe kiese mu kala y’akundi awaya azolwa!

E diambu diakaka dilenda kutusadisa vava tukalanga mu mpasi i lombanga mwand’a velela. O Petelo wa ntumwa wavova vo mwand’ avelela a Nzambi i ‘lukau lwangovo.’ (Mav. 2:38) Ediadi dialudi mu kuma kia wantu ayingi bakuswa muna mwanda kina kia Pentikosti ya mvu a 33 wa Tandu Kieto. Kana una vo Petelo akusua kavovela, mwand’ avelela i lukau luvewanga kwa yeto awonso. Lukau lwalu ke luna nsuka ko. Muna kuma kiaki, tufwete wo lombanga ntangwa zawonso.—Yes. 40:28-31.

Paulo wa ntumwa wazizidila mpasi za mpila mu mpila, kumosi ye mpasi za lufwa. (2 Kor. 1:8-10) Kana una vo i wau, Paulu kamonanga wonga wa fwa ko. Wau kazaya vo lusadisu lwa Nzambi kakala lwau, ediadi diamfiaulwisanga. Wasoneka vo: “Okembelw’o Nzambi w’Es’andi a Mfumu eto Yesu Kristu, w’Ese dia nkenda, wa Nzambi a fiauzi wawonso; on’okutufiaulwisilanga muna mpasi zeto yawonso.” (2 Kor. 1:3, 4) Paulu kayambula ko vo e mpasi zandi zanyoyesa. E mpasi kazizidila zansadisa mu kala nkwa ngemba, yo kala wakubama mu fiaulwisa akaka muna ntwangw’a mpasi.

Vava Antonio kasasuka, wavutukila e salu kia kinkengi a zunga. Entete, kasonganga zola kwa mpangi zandi z’Akristu, kansi owau yandi yo nkaz’andi besiang’e ngolo za kingula yo kasakesa ambevo. Kasikil’owu, vava bakingula mpangi mosi wakala ye kimbevo kiangolo, Antonio wabakula vo mpangi ndiona kazolanga diaka kwenda mu tukutakanu ko. Antonio wavova vo: “Ke mu sia ko vo kazolanga diaka Yave ye mpangi zandi ko, kansi wayibadikilanga vo kena diaka mfunu ko mu kuma kia kimbevo kiandi.”

Diambu dimosi Antonio kavanga mu kasakesa mpangi wakala ye kimbevo, wanlomba vo kasamba mun’elambu bakubika. Kana una vo mpangi ndiona wakibadikilanga vo kafwana ko, watambulwila vang’e sambu. Antonio wavova vo: “Sambu kiambote kavanga. Tuka muna lumbu kiakina, wasoba ngindu zandi. Wayantika kuyimwena vo mfunu kena.”

Kieleka, yeto awonso tunwananga ye mpasi za mpila mu mpila. Kansi, nze una Paulu kavova, ediadi dilenda kutusadisa mu fiaulwisa akaka muna ntangw’a mpasi. Muna kuma kiaki, yambula twazayanga e mpasi za mpangi zeto Akristu yo tanginina Yave wa Nzambi eto muna kalanga s’etuku dia lufiaulwisu kw’akaka.