KATHERINE, kuna Estados Unidos kasansukila. Vava kakala ye kimbuta kia mvu 16 wavubwa nze Mbangi a Yave. Wasalanga yo vema kwawonso muna salu kia umbangi. Kansi, wantu akete kaka bayangalelanga e nsangu za Kintinu muna zunga kasilanga umbangi. Wavova vo: “Yatanganga e nona ya wantu ana basamba kwa Nzambi kimana kabatwikila muntu kenda kubasadisa mu kunzaya. Yakalanga ye luzolo lwa solola wantu a mpila yayi, kansi ediadi ke diavangama ko.”

Vava kasala mu mvu miayingi muna zunga kiau kimosi, Katherine wayantika yindula kwenda sadila ku zunga kiakala ye wantu ayingi bazola wá nsangu za Kintinu. Kansi, wayantika kiyuvula kana vo ke dikala diampasi ko kwa yandi. Nkumbu mosi kaka muna zingu kiandi kasisa esi nzo andi mu tumingu tole. Wamonanga e viangi kia esi nzo andi lumbu yawonso. Kansi, etima diandi dia sadisa awana bavavanga Yave diasunda. Vava kafimpanga e zunga kalenda kwenda sadila, wasonekena ampangi kuna vula dia Guam, banzayisa mawonso kavwanga o mfunu. Muna ngonde a Yuli ya mvu wa 2007, vava kakala ye kimbuta kia mvu 26, Katherine wayaluka yo kwenda kuna Saipã, sanga kia Oceano Pacífico kiakala tezo kia 10.000 ma kilometa ye mbanza kazingilanga. Nkia nluta diatwasa?

Ke vavioka kolo ko vava Katherine kalwaka kuna nkutakani yampa, wawanana ye Doris nkento mosi una ye kimbuta kia vioka mvu 40 ona watambulwila longoka Bibila. Vava balongoka kapu tatu yantete ya nkanda, Adieyi Kelonganga Nkand’a Nzambi, Katherine wayantika tokana. Wavova vo: “Doris nlongoki ambote kakala, yamona vo kiafwana ko mu longoka yandi. Kisidi kala yo nlongoki a Nkand’a Nzambi ko. Yamona vo Doris kafwete longoka yo mpangi ankento wazikuka bena ye kimbuta kimosi.” Katherine walomba lusadisu lwa Yave muna sambu kimana kasolola mpangi ankento ambote ona kalenda vana nlongoki andi a Nkand’a Nzambi. I bosi, wabaka e nzengo za zayisa Doris vo muntu ankaka keyantika longoka yandi.

Katherine wavova vo: “Vitila yanzayisa e diambu diadi, Doris wampovesa vo diambu kazolele kunzayisa. Vava yawinikina ye sungididi kiawonso, yamvovesa una Yave kansadisila mu sunda diambu diau dimosi muna zingu kiame. Doris wamvutula matondo.” I bosi, Doris wavovesa Katherine vo: “Yave usadidi muna kunsadisa. E lumbu wayiza dodela e kielo kiame, Bibila yatanganga mu ola zayingi. Dila yadilanga  yo lomba kwa Nzambi kafila muntu keza kunsadisa mu bakula Bibila. Vana vau wadodela e kielo kiame. Yave wavana e mvutu za sambu kiame!” Mansanga mavayika muna meso ma Katherine ekolo Doris kavovanga. Wavova vo: “E mvovo mia Doris i mvutu za sambu kiame. Yave wasonga vo yafwana muna longoka yandi.”

Doris wavubwa muna mvu wa 2010. Owau, olongokanga Bibila yo wantu ayingi. Katherine wavova vo: “Ivutulanga kikilu matondo wau vo etima diame dia sadisa akwa luzolo lwambote bakituka se selo ya Yave dialungana.” O unu, Katherine una ye kiese kia sala se mviti a nzil’a espesiale kuna sanga kia Pacífico, Cosrai.

Vioka mpangi nkama z’akala ye z’akento batuka mu nsi za kinzenza (bakala ye kimbuta tuka mvu 19 yakuna 79) bayenda sadila muna zunga yavavanga ateleki ayingi kuna Micronésia. Erica ona wayaluka yo kwenda kuna Guam muna mvu wa 2006 vava kakala ye kimbuta kia mvu 19, wayika una ateleki awaya avema bamona. Wavova vo: “O sala se mviti a nzila muna zunga kina yo wantu bena ye vwina, diakiese kikilu. Ivutulanga matondo wau vo Yave wansadisa mu kota mu salu kiaki. Ekiaki i mpil’a zingu kisundidi o wete!” O unu, Erica una ye kiese kia sala se mviti nzil’a espesiale kuna mbanz’a Ebeye, sanga kia Marshall. Kansi, e mambu mampasi ke mekondwanga ko ekolo tusadilanga mu nsi za kinzenza. Yambula twabadika matatu muna mambu mama yo zaya una awana bayenda sadila kuna Micronésia bazizidila mo.

Mpil’a zingu. Vava kalwaka kuna sanga kia Palau muna mvu wa 2007, Simon ona wakala ye kimbuta kia mvu 22, wamona vo e nzimbu kafutwanga zakete kikilu ke mu zina kafutwanga ko kuna nsi andi, Inglaterra. Simon wavova vo: “Yalongoka vo kilendi sumba lekwa yawonso ko yazolanga. Owau, isolanga madia mfwete sumba yo vava nzo zitekanga e lekwa mu ntalu yakuluka. Avo lekwa kifwidi, ivavanga muntu kavangulula kio.” O vevola e zingu nkia nluta diantwasila? Simon wakudikila vo: “Ediadi diansadisa mu zaya dina disundidi kikilu o mfunu muna zingu ye una ndenda zingila ye nzimbu zakete. Nkumbu miayingi imonanga una Yave kekunsadisilanga. Muna mvu nsambwadia isadilanga okwaku, kikondwanga má kia dia ko ngatu fulu kia leka.” Kieleka, Yave osadisanga awana bevevolanga zingu kiau, kadi besianga Kintinu va fulu kiantete.—Mat. 6:32, 33.

Viangi. Erica wavova vo: “Ngwizani ambote yakala yau y’esi nzo ame. Muna kuma kiaki yatokananga kana vo viangi kia esi nzo ke kikunkakidila ko mu sala e salu kiame kia umbangi.” Adieyi kavanga? “Una kiayalukidi ko, yatanga malongi mun’Eyingidilu mavovelanga e viangi. Ediadi diansadisa mu kubika ntim’ame muna zizidila e viangi. Muna longi dimosi, o ngudi wavovesa mwan’andi ankento vo ‘Yave otoma kulunga-lunga ke mu mono ko.’ E mvovo miami miankumika kikilu.” Patrick yo nkaz’andi Hannah, besadilanga kuna Majuro, sanga kia  Marshall. Muna zizidila e viangi, Hannah osianga e sungididi muna mpangi z’akala ye z’akento muna nkutakani au. Wavova vo: “Ivutulanga matondo kwa Yave mu kuma kia kintwadi kieto kia wana-ngudi mu nza yawonso, kadi oyau mpe yitu yame. Kondwa kwa lusadisu lwau, kiadi lenda sadila kuna kuvwilu ateleki ayingi mfunu ko.”

Vanga yikundi. Simon wavova vo: “Vava muntu kekwendanga ku nsi ya kinzenza, mambu mawonso maswaswana mekalanga. Ezak’e ntangwa diampasi dikalanga mu vova diambu kuna nsaka yo bakulwa kw’akaka.” Erica wavova vo: “Kuna lubantiku, kinsona yamonanga. Kansi, ediadi diansadisa mu yindula e kuma yayalukila. Kiayaluka ko mu vava wete diame, kansi mu kuyivana muna salu kia Yave.” Wakudikila vo: “Muna kolo kiakina, yavanga kikundi ye wantu ayingi ana itoma yangalelanga.” Simon wavanga ngolo za longoka nding’a Palauan, ediadi diaziula e nzila mu vanga kikundi ye mpangi z’akala ye z’akento za nkutakani andi. (2 Kor. 6:13) E ngolo kavanga za longoka ndinga yayi zafila ampangi mu toma kunzola. Kieleka, vava mpangi kelwakanga muna zunga avo ampangi za nkutakani batomene kuntambula, yau awonso bebakanga nluta mia kikundi kiambote. Nkia nluta miakaka betambulanga awana bekuyivananga kuna mvevo mu kwenda sadila mu zunga ivwidi ateleki ayingi o mfunu?

Paulu wa ntumwa wavova vo: “On’okunina kuna mvevo, kuna mvevo i kesâdila.” (2 Kor. 9:6) E nkanikinu una muna mvovo mia Paulu ulenda sadilwa kw’awana bewokesanga e salu kiau kia umbangi. Nkia nluta betambulanga muna ‘kunina kuna mvevo’ kuna Micronésia?

Kuna Micronésia, tukalanga ye malau mayingi ma yantika longoka Bibila yo wantu. Tumonanga una alongoki besadilanga e ludi kia Nkand’a Nzambi yo nungunuka muna mwanda. Patrick yo Hannah bayenda mpe sila umbangi kuna Angaur, sanga kiakete kizingilanga 320 ma wantu. Una basila umbangi mu ngonde zole, bawanana yo ngudi osansanga wana yandi mosi. Vana vau, watambulwila longoka Bibila yo vanga e nsobani muna zingu kiandi. Hannah wavova vo: “Konso ntangwa tufokolanga e longi yo manta muna mvelo mieto, tutalanga muntu yo nkw’andi yo vova vo: ‘Tutondele e Yave.’ ” Hannah wakudikila vo: “Nzeye wo vo Yave wadi sadila muntu ankaka muna tunta nkento ndioyo kwa yandi, kansi wau vo twayenda sadila ku zunga kiavwanga ateleki ayingi o mfunu, twasolola meme diadi yo kunsadisa mu zaya Yave. Owau umosi muna nluta misundidi twatambula muna zingu kieto kiawonso.” Nze una kavova Erica, “vava tusadisanga muntu kazaya Yave, kiese kiayingi dikututwasilanga.”

Muna nsi zayingi, muna ye zunga ivwidi ateleki ayingi a Kintinu o mfunu. Nga zolele kala mosi muna awana beyalukanga mu kwenda sadila kuna kuvwilu ateleki ayingi o mfunu? Samba kwa Yave kawokesa etima diaku dia wokesa e salu kiaku kia umbangi. Mokena y’akuluntu a nkutakani aku, nkengi a zunga yovo awana basadila kala muna nsi zavavanga ateleki ayingi. Vava ovanganga e nkubika ya kwenda sadila kuna kuvwilu ateleki ayingi o mfunu, sonekena e vula dilunga-lunganga e zunga kina ozolele kwenda yo yuvula konso diambu ozolele zaya.  *Nanga ongeye mpe olenda yikama ulolo wa mpangi z’akala ye z’akento, aleke ye mbuta, mpumpa yovo awana basompa, ana bekuyivananga kuna mvevo yo mona e kiese kitwasanga e salu kiaki.