Sadisa Mwan’aku Kazizidila e Ntantu

NGUDI mosi wakendalala wayenda mun’evula ditekelwanga nkanda yo vovesa nteki mu nding’angolo vo: “Oyeno luna y’evula diazala ye nkanda, kansi ke muna nkanda ulenda sadisa mwan’ame ko.” Ngudi ndioyo luludiku kavavanga lulenda sadisa mwan’andi mu zizidila e ntantu za lufwa lwa nzolw’andi.

O ngudi ndioyo wakala ye ndungidi mu tokana. Kadi, diampasi kikilu diakala kwa nleke ndiona mu zizidila lufwa lwa nzolw’andi. Zingu kia wana kitoma sikilanga vava besansukanga kumosi y’esi nzo au. Kansi, o lufwa lulenda katula muntu ona ketoma zolanga o mwana. Yeno mase, aweyi nulenda sadisila wan’eno mu zizidila e ntantu za lufwa lwa mwisi nzo?

Kieleka, vava ozizidilanga lufwa lwa nzolw’aku, olenda tokana e ngindu yo sia sungididi kiawonso muna ntantu zaku. Kansi, kuvilakani ko vo mwan’aku mpe lusadisu lwaku kavwidi o mfunu. Nkanda mosi wakaywa muna nzo ilunga-lunganga anunu kuna mbanz’a Minnesota, kuna América, uvovanga vo: “Vava wana bewanga e moko y’ambuta yo lembi bakula e moko kiaki, dilenda kubatokanesa kikilu e ngindu.” Wavova mpe vo: “O wana bevavanga vo bavoveswa e ludi.” Muna kuma kiaki, diangangu dia vova e ludi kwa wana muna tezo kia umbakuzi wau. Ediadi dilenda kala diampasi, kadi o wana ke bebakulanga diambu dibwidi mu mpila imosi ko.​—⁠1 Korinto 13:11.

Aweyi Olenda Sasila Lufwa

Afimpi akaka a mambu bevovanga vo vava mase bezayisanga diambu dia lufwa kwa wana, bafwete vengang’e mvovo nze: “Olele,” “ovididi” yovo “wele kwandi.” O sadila e mvovo miami yo lembi mio toma sia e nsasa, dilenda tokanesa e ngindu za mwana. Dialudi vo, Yesu watezanesa lufwa ye tulu. Kansi, sungamena dio vo kavovesa diambu diadi kwa yingyana-ngyana ko. Kana una vo i wau, watoma kiesesa e nona kiaki. Yesu wavova vo: “O nkundi eto Lazaro owondokele yo tulu.” Kana una vo alongoki ambuta bakala, ‘edi babanza vo owu wa lek’o tulu i kayika.’ Muna kuma  kiaki, Yesu wakiesesa e diambu diadi, wavova vo: ‘O Lazaro ofwidi kwandi.’ (Yoane 11:​11-​14) Wau vo ambuta kieseswa bavava, aweyi tuvova mu kuma kia wana? Oyau balutidi vwa o mfunu wa kieseselwa e diambu.

Mary Ann Emswiler yo James P. Emswiler asonekesi a nkanda mosi bavova vo: “O ngudi olenda sadila mvovo mia ngemba mu zayisa diambu dia lufwa kwa mwan’andi. Kansi, ediadi dilenda kotesa e ngindu zaswaswana muna ntima mwana, ezi zilenda kumwesa wonga ye mpasi.” Kasikil’owu, ozayisa mwana vo o nzolw’eto ofwidi ku tulu kena, dilenda kumwesa wonga yo kumfila mu yindula vo kele vo yandi mpe olele muna fuku, ke sikama diaka ko. Kele vo ovovese mwana vo o nzolw’eto ofwidi “wele kwandi,” dilenda fila mwana mu yindula vo obembwelo.

Mase mayingi bemonanga vo vava bezayisanga edi dia lufwa, o wana balenda bakula kele vo basadidi mvovo mialeboka ye mia kiá ke mu mvovo milembi bakulwa ko yovo kubasweka diambu. (1 Korinto 14:⁠9) Afimpi a mambu bevovanga vo amase bekasakesanga wan’au vava bekubayuvulanga e yuvu yo mokena mambu mekubatokanesanga. O mokena ntangwa zawonso yo mwana, dilenda kusadisa mu toma kunzayisa e diambu.

Nto ya Luludiku Lwasikila

Vava mwisi nzo kefwanga, mwana lusadisu ye luludiku lwaku kevwang’o mfunu, yo vava mpe vo wamvana e mvutu za yuvu yandi. Ozevo, akweyi lenda sololwela luludiku lwasikila mu diambu dia lufwa? Ulolo wa wantu bemonanga vo, Nkand’a Nzambi i nto yasikila ya lufiaulwisu ye vuvu. Nkand’a Nzambi utoma songanga etuku dia lufwa, nkal’a mafwa ye vuvu kia mafwa. Elo, “afwa ke bazeye diambu ko.” Sadisa mwan’aku mu zaya vo o nzolw’andi ofwidi, kena diaka mu mpasi ko. (Kimpovi 9:⁠5) Vana ntandu, Nzambi osianga nsilu muna Diambu Diandi vo, tusinga mona diaka azolw’eto afwa muna paradiso ova ntoto.​—⁠Yoane 5:​28, 29.

Muna sadila Sono Yavauka, lenda sadisa mwan’aku mu zaya vo Nkand’a Nzambi ufiaulwisanga yo vana luludiku lwasikila mu mambu ma mpila ye mpila ma mpasi. Mwan’aku ozaya mpe una yeno mase nusadilanga luludiku lwa Diambu dia Nzambi muna mambu mamfunu ma zingu kieno.​—⁠Ngana 22:6; 2 Timoteo 3:15.

Mvutu za Yuvu Yaku

Ekolo osadisanga mwan’aku mu zizidila e ntantu za lufwa lwa nzolw’eno, vesinga kala ye ntangwa ina kulenda zaya edi ofwete vanga ko. Adieyi ovanga? * Yambula twabadika yaka yuvu betoma yuvulanga wantu.

• Nga mfwete sweka e ntantu zame kwa mwan’ame? Luzolo lwa tanina mwana, fu kia kingutukila. Nga diambi vo mwan’aku kamona yo zaya nkenda zaku? Mase mayingi bebakulanga vo diambote dia lembi sweka e ntantu zau, bezaisanga wan’au vo, ke diambi kwandi ko mu kendalala. Mase makaka besonganga wan’au e nona ya Nkand’a Nzambi iyikanga wantu ana ke basweka ntantu zau ko. Kasikil’owu, Yesu wadila vava Lazaro wa nkundi andi anzolwa kafwa. Yesu kasweka ntantu zandi ko.​—⁠Yoane 11:⁠35.

• Nga mwan’ame ofwene kwenda kuna lufwa yovo wá elongi dia lufwa? Kele vo mwana kala kekala, diangangu mu kunzaisa dina divangama y’ekuma elongi difwete kadila. Dialudi vo, ezak’e ntangwa mase balenda kala ye kuma mu sikidisa vo wan’au balembi kwenda  kuna lufwa yovo wá mawonso mevovwa ko. O wana bekalanga mun’elongi dia lufwa lwa Mbangi za Yave, balenda baka nluta mun’elongi dia Nkand’a Nzambi. Vana ntandu, o “walakazi” ye zola besonganga awana bewanga elongi diadi dilenda fiaulwisa mpe o wana.​—⁠Roma 12:​10, 15; Yoane 13:​34, 35.

• Nga mfwete mokena yo mwan’ame oma ma lufwa lwa nzolw’eto? Afimpi akaka a mambu bevovanga vo avo kuzolanga ko vo mwan’aku kazaya diambu diadi, mwana lenda yindula vo diambu okunswekanga mu kuma kia mvumbi yovo zolele kumvunzanesa mawonso kazeye mu kuma kia mvumbi. Julia Rathkey wa nsoneki a nkanda mosi wavova vo: “Diamfunu mu sadisa mwana kazaya zizidila e ntantu za lufwa ke mu kala ye wonga ko.” Kukadi ye wonga wa mokena oma ma mvumbi ko, kumosi ye fu yandi yambote y’oma ma zingu kiandi, kadi malenda sadisa mwana mu vevola e ntantu. Mase m’Akristu befiaulwisanga wan’au mu kubazaisa e vuvu kia Nkand’a Nzambi kia lufuluku lukala muna paradiso ova ntoto, muna ke mukala diaka mayela ko ngatu lufwa.​—⁠Lusengomono 21:⁠4.

• Aweyi ndenda sadisila mwan’ame ekolo kemonang’e ntantu? Muna ntangwa nkenda, mwan’aku olenda bakama mayela. Mwana olenda kendalala, funga makasi yo yindula vo obembwelo. Kusiviki ko kele vo mwan’aku uyitumbidi mu kuma kia lufwa lwa mwisi nzo, kele vo kazolele katuka ko vana una yovo tokana avo kulweke mu ola yambote ko yovo yela oyelele. Aweyi lenda vanga mu kuma kia ntokani zazi za mwan’aku? Mwan’aku olenda yindula vo ngeye kuzeye ntokani zandi ko. Ozevo, vanga diambu mu songa vo ozeye e ntokani zandi, kumoni dio diakete ko, ngatu veza e ntantu kemonanga mu kuma kia lufwa lwa mwisi nzo. Unsong’e ziku vo zola okunzolanga, unyuvula e yuvu yilenda kunkasakesa mu vova yo kala ye mbokena zambote. Olenda kumika e vuvu kiaku ye kia mwan’aku “muna fiauzi wa sono.”​—⁠Roma 15:⁠4.

• Aweyi ndenda vutulwil’e zingu kia nzo ame una kiakala? Mfimpi mosi a mambu wavova vo: Nuvutukil’e salu yeno yawonso. Vutukil’e zingu una kiakala i diambu diamfunu muna zizidila ntantu za lufwa lwa nzolw’eno. Muna nzo za Mbangi za Yave, mase mayingi bebakulanga vo, kala ye fu kiambote kia mambu ma mwanda nze elongi dia Nkand’a Nzambi dia esi nzo ye kwenda muna tukutakunu twa Kikristu dilenda sikidisa yo kumika esi nzo.​—⁠Nsiku 6:​4-9; Ayibere 10:​24, 25.

Ekolo tuvingilang’e ntangwa ina Yave wa Nzambi kesukisa mayela ye lufwa, vesinga kala kaka ye ntangwa in’o wana bemona e nkenda ye mpasi za lufwa lwa mwisi nzo. (Yesaya 25:⁠8) E mvovo miaku mia ziku ye lusadisu lwaku lulenda sadisa wana mu zizidila ntantu zitwasanga lufwa lwa mwisi nzo.

[Mvovo Vana Yand’a lukaya]

[Mvovo mia Sina mina muna lukaya lwa 11]

Kasakesa mwan’aku kayuvulanga e yuvu yo mokenanga mana mekuntokanesanga

[Foto ina muna lukaya lwa 12]

Kala y’elongi dia Nkand’a Nzambi dia esi nzo dilenda sadisa mu vutulwisa e zingu una kiakala