Aweyi Olenda Kadila ese Diambote

“Amase, ke nutokanisa wan’eno ko, benkwa dimbula vuvu.”

—Kolosai 3:⁠21.

ESE aweyi kalenda vengela e fu kia fungisa wan’andi makasi? Diamfunu kazaya e mbebe andi nz’ese. Zulunalu mosi isonekanga mu kuma kia akwa mayela ma ngindu yavova vo: “Mase i wantu antete balenda fwasa e ngindu yo zayi wa wan’au.”

Ayeyi i mbebe y’ese? Muna nzo zayingi, ese yandi i ntu mu longa o wana. Ngudi zayingi zivovesanga mwana ovangidi edi diambi vo: ‘Vingila s’aku vava kelwaka, i bosi omona.’ Zaya wo vo wana tumbu bevwanga o mfunu kimana balongwa yo kituka ambuta zasikila. Kansi, mayingi mevavwanga muna kala ese diambote.

Diankenda kikilu vo ke mase mawonso ko besonganga mbandu ambote ifwete landwa. Akaka mu nzo zakondwa mase basansukila. Vena mpe y’awana besanswanga kwa mase ma ntima miambadi, makondw’o zola, vava bekitukanga mase, diau adimosi mpe bevanganga kwa wan’au. Ese dia mpila yayi, aweyi kalenda yambulwila e fu yambi kasansilwa yo kala ese diambote?

Vena ye malongi mamfunu malenda sadisa muntu mu kala ese diambote. Muna Nkand’a Nzambi muna ye malongi mamfunu mu kuma kia zingu kia esi nzo. Ke mpasi malongi kaka ko, ye ke malendi kututwasila mfwilu ko. Malongi ma Nkand’a Nzambi ngangu za Yave wa Nzambi mesonganga ona Wasonekesa nkanda wau una vo i Tuku dia zingu kia nzo. (Efeso 3:​14, 15) Avo u se, diangangu wafimpa dina divovanga Nkand’a Nzambi mu kuma kia mase. *

O kala ese diambote ke disadisanga kaka mwana mu nungunuka mu nitu ko ye mu ngindu, kansi ye muna mwanda mpe. Mwana on’otoma zolwanga yo kala ye ngwizani ambote yo s’andi, kekalanga ye mpasi ko mu kala ye ngwizani ambote yo Nzambi. Nkand’a Nzambi uvovanga vo Yave wa Mvangi eto yandi i S’eto. (Yesaya 64:⁠8) Yambula twafimpa mambu masambanu mana o wana bevavanga vo mase mau bavanga. Muna konso diambu, tuzaya vo o sadila nkanikinu mia Nkand’a Nzambi dilenda sadisa ese mu lungisa mambu mama.

 Wana Zola Kw’ese Bavwidi o Mfunu

Yave i mbandu ambote y’eSe. Muna songa una Nzambi kemonanga mu kuma kia Yesu wa Mwan’andi antete, Nkand’a Nzambi uvovanga vo: “O Se ozolele o Mwana.” (Yoane 3:35; Kolosai 1:​15) Nkumbu miayingi Yave wavova vo ozolanga Mwan’andi yo kunyangalela. Yesu vava kavubwa, Yave wavova tuka kun’ezulu vo: “Ongeye Mwan’ame anzolwa; omu ngeye i nyangalelanga.” (Luka 3:​22) O Yesu kekatikisanga ko vo S’andi zola kekunzolanga. Ese adieyi kalenda longoka muna mbandu yayi ya Nzambi?

Kukadi ye nsoni ko za vovesa wan’aku vo zola okubazolanga. Kelvin w’ese dia wana tanu, wavova vo: “Ntangwa zawonso isianga ngolo za songa zola kwa wan’ame. Ikubavovesanga vo zola ikubazolanga yo vwa konso mwana o mfunu. Ikubayowelesanga yo kubasoba e mvwatu.” Vana ntandu, wan’aku bafwete zayanga vo zola okubazolanga. Kukadi ye fu kia sungula wana ntangwa zawonso ko. Kansi, ubasanisinanga. Donizete w’ese diakaka una ye wana wole amakento wavova vo: “O se kafwete vavanga elau dia sanisina wan’andi.” Vava wana bezayanga vo zola okubazolanga e kiese kiau kiwokelanga. Ediadi dilenda kubasadisa mu finama Nzambi.

Wana Mbandu Ambote Bavwidi o Mfunu

O Yesu wavanganga “dina kemonanga kaka divangang’o Se,” u tutanganga muna Yoane 5:19. Ng’omwene? E sono kiaki kivovanga vo Yesu wamonanga yo vanga dina ‘kavangang’o’ S’andi. O wana diau adimosi mpe bevanganga. Muna bong’e nona, kele vo ese ozolanga yo zitisa nkaz’andi, o wana mpe diau adimosi bevanga vava bekituka se mbuta, bezola yo zitisa akento. Ke wan’amakala kaka ko balenda baka e nluta mu mbandu ambote y’es’au, kansi yo wana amakento mpe balenda kala ye nyindu asikila mu kuma kia akala.

Nga diampasi dikalanga kwa wan’aku mu lomba e ndoloki? E mbandu ambote mpe muna diambu diadi, mfunu ina. Kelvin osungamenanga e lumbu kina wan’andi amakala bafwasa makina mantalu ma bandwila foto. Wafunga kikilu makasi yo wanda vana meza, matoloka. I bosi, Kelvin wakibanza yo lomba ndoloki kwa wana ye kwa nkaz’andi mu kuma kia makasi mandi. Ediadi, diafila mpe wana mu kuyibanza yo lomba ndoloki mu kuma kia makina bafwasa.

Wana va Fulu kia Kiese Bezolanga Kala

Yave i ‘Nzambi a kiese.’ (1 Timoteo 1:​11) Kalukatikisu ko vo Mwan’andi wayangalelang’o kala vamosi yo S’andi. Muna Ngana 8:30 tusadiswanga mu bakula e ngwizani ina  vana vena Yesu yo S’andi vo: “Ngina vana ndambu [a Se nze] mbuta mbangu: . . . Yakembelang’oku ndose andi ntangwa zawonso.” Ekwe ngwizani ambote vana vena Se yo Mwana!

Wan’aku va fulu kia kiese bezolanga kala. Ovaula e ntangwa mu sakana yo wan’aku, dilenda kubatwasila e kiese. Sakana vamosi, kusiamisanga kikundi kia mase yo wana. Felix una vo ese, osansanga wana bena mu ntela kileke, okwikilanga e diambu diadi, wavova vo: “Ovaula e ntangwa mu sakana yo wan’ame kikundi kieto diwokesanga. Tusakananga kumosi y’akundi eto yo kwenda kingula e fulu yambote. Ediadi, disiamisanga ngwizani eto yo twasa kiese muna zingu kieto kia nzo.”

Wana Malongi ma Mwanda Bevwanga o Mfunu

O Yesu walongwa kw’Es’andi. Ikuma kavovela vo: ‘Mana yawa [kwa Se], mana nsamunwinang’e nza.’ (Yoane 8:​26) Kuna kwa Nzambi, o se yandi una ye mbebe ya longa wana, oma ma nkal’ambote y’oma ma mwanda. Dimosi muna mbebe aku nze se, i kotesa nsiku miansongi mia Nzambi muna ntima a wan’aku. Ofwete yantika kubalonga tuka muna kinsedia kiau. (2 Timoteo 3:​14, 15) Felix watangilanga mwan’andi tusansu twa Nkand’a Nzambi tuka muna kinsedia. Wasadilanga fwaniswa yambote kumosi ye fwaniswa ina muna nkanda Tusansu twa Nkand’a Nzambi. * Ekolo mwan’andi kakolanga, Felix wasadilanga nkand’a miakaka miafwana muna ntel’andi.

Donizete wavova vo: “Ke diambu diakete ko mu kitula elongi dia Nkand’a Nzambi y’esi nzo se diambu diakiese. Divavanga vo mase basonganga kwa wana vo mambu ma mwanda beyangalelanga, kadi o wana nzaki bebakulanga vava mase ke bevanganga ko dina bevovanga vo wana bavanga.” Carlos w’ese dia wana tatu wavova vo: “Konso lumingu, tukutakananga mu badika nsatu za esi nzo. Yeto awonso tukalanga y’elau dia sola diambu diamfunu dina tulongoka.” Kelvin osiang’e sungididi kia vovesa wan’andi oma ma Nzambi konso kuna bena ye muna konso salu besalanga. E fu kiaki kikutusungamesanga mvovo mia Mose vo: “O mambu mama, mana ikukanikin’o unu, makala muna ntim’aku: watoma mo longel’o wan’aku, wamokena mo vav’ofongele muna nzo, yovo se kiya yovo leka yovo sikama.”​—⁠Nsiku 6:​6, 7.

Wana Longwa Bevavanga

Wana bafwete longwa kimana bakituka ambuta akwa mbebe. Mase makaka beyindulanga vo muna longa mwana kafwete vangulwa, bangikwa yovo vezwa. Kansi, Nkand’a Nzambi usonganga vo ke diambote ko kwa mase dia vangul’o wana muna kubalonga. Nze Yave, mase bafwete longela kuna zola. (Ayibere 12:​4-​11) Muna Nkand’a Nzambi tutanganga vo: “Amase, ke nufungisa  wan’eno makasi ko: nubatongonona muna ndonga yo lusansu lua Mfumu.”​—⁠Efeso 6:⁠4.

Ezak’e ntangwa divavanga vo mwana katumbwa. Kansi, kafwete zaya ekuma katumbilu. E tumbu ke kifwete fila mwana ko mu yindula vo kezolwanga ko. Nkand’a Nzambi kelonganga ko vo o se kafwete wanda mwana yamu tezo kia kumvangula. (Ngana 16:​32) Kelvin wavova vo: “Vava dikalanga o mfunu mu tumba wan’ame mu kuma kia diambu diambi bavangidi, ikubasongang’e ziku vo mu wete diau mvangilanga dio, kadi zola ikubazolanga.”

Wana Taninwa Bavwidi o Mfunu

O wana bafwete taninwa muna mbi ye umpukumuni wa yimpumbulu. Diankenda kikilu vo mu nza yayi vena ye “wantu ambi” bevavanga kota wan’akete o nsoki. (2 Timoteo 3:​1-5, 13) Aweyi olenda tanina wan’aku? Nkand’a Nzambi ulukisanga vo: “O nlungaladi omwene mbi, oswekamene; atunga, lutakana, badilu o nkanu.” (Ngana 22:⁠3) Ofwete zayanga e vonza muna tanina wan’aku. Vavang’o zaya diambu dilenda sia wan’aku mu vonza yo baka zengo za kubatanina. Muna bong’e nona, avo yambwidi wan’aku basadilanga internet, vavang’o zaya kana vo mu mpil’ambote besadilanga yo. Diangangu mu sia komputador van’eseka kimana wamona mpila wana besadila yo.

O se kafwete longa yo songa e vonza yilenda bwila wan’andi mu nza yayi ya nsoki. Nga wan’aku bazeye dina balenda vanga kele vo muntu ozolele kubavanga e mbi vava bekalanga yau kaka? * Wan’aku bafwete zaya mpil’ambote ye yambi ya sadila kikento ye kiyakala. Kelvin wavova vo: “Kiyambulanga ko vo wan’ame balongwa oma ma kikento ye kiyakala kwa wantu akaka, yovo kw’alongi au a sikola. Mono kibeni ngina ye mbebe ya kubalonga e diambu diadi yo kubasonga e vonza ki’awana bevavanga leka yo wan’akete.” Owau, wan’andi awonso se ambuta, basompa yo vwa longo lwa kiese.

Vava Lusadisu lwa Nzambi

Lukau lwantalu balenda vana mase kwa wan’au i kubasadisa bakala ye ngwizani ambote yo Nzambi. E mbandu ambote besonganga mase, mfunu kikilu ina. Donizete wavova vo: “Amase bafwete songanga kwa wana una yau kibeni betatidilanga ngwizani au yo Nzambi. Bafwete wo songanga musungula vava bekalanga mu ntangw’a mpasi. Muna ntangwa yayi, o se kafwete songa vo Yave kikilu kebundanga e vuvu. O samba kumosi yo wana mu vutula matondo kwa Nzambi mu oma mambote kevanganga, dilenda sadisa wana mu vava kituka Akundi a Nzambi.”

Ayeyi ozevo i nsabi mu kala ese diambote? Vava luludiku lwa ndiona otomene zaya din’ofwete vanga muna sansa o wana​—⁠Yave wa Nzambi. Kele vo osansidi wan’aku muna luludiku lwa Nkand’a Nzambi, omona e ziku kia mvovo mia Ngana 22:6 vo: “Vava kenunuva, kekatuka mo ko.”

[Mvovo Vana Yand’a lukaya]

[Mvovo mia Fwaniswa mina muna lukaya lwa 11]

1

[Mvovo mia Fwaniswa mina muna lukaya lwa 11]

2

[Mvovo mia Fwaniswa mina muna lukaya lwa 11]

3

[Mvovo mia Fwaniswa mina muna lukaya lwa 12]

4

[Mvovo mia Fwaniswa mina muna lukaya lwa 12]

5

[Mvovo mia Fwaniswa mina muna lukaya lwa 13]

6

[Foto ina muna lukaya lwa 11]

O se kafwete kala mbandu ambote kwa wan’andi

[Foto ina muna lukaya lwa 12]

O se kafwete lungisa nsatu za mwanda za wana

[Foto ina muna lukaya lwa 13]

Wana elongi dianzodi bevwanga o mfunu