Finama Nzambi

Mvangi Ofwene Tambula Nkembo eto

Lusengomono 4:⁠11

NGA wakiyuvula kala: ‘Ayeyi i nsas’a zingu?’ Awana bekwikilanga mun’elongi dia lunungunuku ke besololanga mvutu za kiuvu kiaki ko. Kansi aya bekwikilanga muna ludi, bazeye wo vo Yave wa Nzambi, yandi i Nto a moyo. (Nkunga 36:⁠9) Bazeye wo mpe vo Yave ekani kakala diau vava katusema. Ekani diadi diasonama muna Lusengomono 4:11. Yambula twafimpa e mvovo miami miasoneka Yoane wa ntumwa twazaya una misongelang’ekuma twinina ova nza.

Yoane, buka kia vangwa ya mwanda kun’ezulu kayika yikembelelanga Nzambi oku vo: “Ofweno, e Yave, wa Nzambi eto, o tambula nkembo, yo zitu, ye ngolo: e kuma kadi, i nge wasemena lekwa yawonso, muna luzolo luaku mpe i inina, yo semwa.” Yave yandi kaka ofwene tambula nkembo wau. Ekuma? E kuma kadi yandi ‘wasema lekwa yawonso.’ E vangwa yayi ya ngangu, adieyi bafwete vanga?

Yave oyikilwanga vo wafwana “tambula” nkembo, zitu ye ngolo. Kalukatikisu ko vo Yave, yandi kaka ofwete zitiswa ye yandi kaka osundidi e ngolo muna nsema wawonso. Ndonga ke bezayanga ko vo Yave i Mvangi a lekwa yawonso. Kana vo i wau, vena y’awana bemonanga ‘oma ma Nzambi malembi monakana’ muna lekwa ina kasema. (Roma 1:​20) Bevananga Yave nkembo yo zitu ye kiese kiawonso. Besamunanga kwa wantu awonso vo Yave i wasema lekwa yawonso yambote, ozevo tufwete kunzitisa.​—⁠Nkunga 19:​1, 2; 139:⁠14.

Yave aweyi ketambulwilanga o nkuma kw’asambidi andi? Kieleka, ka vena vangwa ko kilenda vana nkuma kwa Mvangi wa mpungu-ngolo. (Yesaya 40:​25, 26) Kansi, wau vo muna mpw’a Nzambi twasemenwa, tusonganga e fu yakaka ya Nzambi nze, nkuma. (Etuku 1:​27) Avo tuyangalela mawonso kevangang’o Mvangi eto muna wete dieto, dilenda kutufila mu sadila nkuma eto mu kunzitisa yo kunkembelela. Vana fulu kia sadila e ngolo zeto mu lungisa kaka e zolela ya yeto kibeni, tufwete dio zaya vo Yave wa Nzambi ofwene tambula nkum’eto wawonso muna kunsadila.​—⁠Maku 12:⁠30.

Ekuma twinina ova nza? E tini kiansuka kia Lusengomono 4:11 kivovanga vo: “E kuma kadi, i nge [wasemena lekwa yawonso], muna luzolo luaku mpe i inina, yo semwa.” Ka yeto mosi ko twakisema. Mu luzolo lwa Nzambi twasemenwa. Muna kuma kiaki, ovava lungisa e zolela ya yeto kibeni muna zingu ke ditwasanga kiese ko. Muna kala ye luvuvamu lwa ntima ye kiese, tufwete zaya nki i luzolo lwa Nzambi yo vava lo vanga. Avo tuvangidi wo, tuzaya ekuma twasemenwa.​—⁠Nkunga 40:⁠8.

[Foto Avwe a Foto muna lukaya lwa 27]

NASA, ESA, and A. Nota (STScI)