Kuma Tanu Tufwete Vumina Nzambi Ke mu Wantu Ko

NLEKE mosi wabwilwa diambu diakiese. Ku kinsalukisa diavangamena. Mbangi zole za Yave kamokena zau, ana banzayisa diambu diampa. Tuka kolo, watokananga wau kalembi zaya ekuma Nzambi keyambulwilanga e mpasi. Wau Mbangi za Yave bansongele e mvutu za kiuvu kiaki muna Nkand’a Nzambi. Kazayanga wo ko vo mu Nkand’a Nzambi mambu mayingi mamfunu mena mo malenda yangidika ntima mia wantu.

Vioka fikolo, vava Mbangi zayenda, e mfumu a nzo ina kafutilanga, wakota mun’esuku dia nleke yo yuvula kuna makasi vo: “Wantu awaya aki nani?”

O nleke kalenda kumvana mvutu ko.

O nkento ndiona wavova vo: “Ibazeye, avo ubatambwidi diaka, ikuvaikisa mu nzo ame, wenda vava nzo yakaka.”

Wazika kielo kuna makasi yo vaika.

Alandi Akieleka a Kristu Bangikwa Bebangikwa

Dina diabwila nleke ndioyo ke dianzenza ko. Nkand’a Nzambi uvovanga vo: “Awonso, ana bazolele o kala nkal’a vumina Nzambi muna Kristu Yesu, bebangikwa.” (2 Timoteo 3:12) Akristu akieleka ke bezolwanga ko. Ekuma? Yoane wa ntumwa wavovesa Akristu akw’andi vo: ‘Tuzeye wo vo twa Nzambi twina, e nza yawonso mu wisa kia ndiona wambi ilele.’ Nkadi Ampemba wa Satana oyikilwanga mpe vo, “nkosi ankwinti ovemanga, kend’avavi ona  kevempola.” (1 Yoane 5:19; 1 Petelo 5:8) O wonga wa wantu i dimosi muna ntambu ketoma sadilanga o Satana.

Kana nkutu Yesu Kristu ona wavanga mambu mayingi mambote yo lembi sumuka, wavezwa yo bangikwa. Yesu wavova vo: ‘Bambengene nkatu ankatu.’ (Yoane 15:25) Muna fuku wavitila lufwa lwandi, wazaisa alongoki andi e mvovo emi: “Ovo nza ikunusaula, nuzeye wo vo mono yateka saula. Nuyindul’e diambu inusamunwini vo, o ntaudi kasundidi mfumu andi ko. Ovo bambangika, oyeno mpe bekunubangika.”​—Yoane 15:18, 20.

Mu kuma kia mvovo miami, ndonga ke bekalanga ye unkabu ko wakota mu nsambila yaludi. Nkand’a Nzambi uvovanga mu kuma ki’awana bakwikila muna Yesu vo: “Kansi ke vakedi muntu wanyik’e mpenza ko, muna wonga wa Ayuda.” (Yoane 7:13; 12:42) Afidi a nsambila muna lumbu yayina, bavumisanga yo vaikisa mun’esambilu konso ndiona wakwikilanga muna Kristu. O wonga wa wantu wasimbanga ayingi mu kituka s’Akristu.​—Mavangu 5:13.

Kuna kwalanda, vava nkutakani ya Kikristu yasikidiswa, tutanganga mu kuma kia “lubangamu luampasi” lwabwila e nkutakani muna Yerusaleme. (Mavangu 8:1) Kieleka, Akristu babangikwa kikilu muna luyalu lwa Roma. Afidi a nsambila z’Ayuda kuna Roma bavovesa Paulu wa ntumwa vo: “Vo i vaudi kiaki, dizayakene kwa yeto vo mwawonso kitumbwanga.” (Mavangu 28:22) Elo, Akristu akieleka babangikwanga kikilu.

Kana nkutu unu, Satana wakinu sadila wonga wa wantu mu simba ulolo wa wantu balembi kituka Akristu akieleka. Akwa ntima miansongi ana belongokanga Nkand’a Nzambi ye Mbangi za Yave bebangikwanga yovo vezwa kuna sikola, muna fulu ya salu, kwa mfinangani yovo kw’akundi au. Balenda kala ye wonga wa vezwa yovo vidisa akundi yovo lembi sadiswa kw’akaka. Muna mavata makaka, avati a nsengo balenda mona wonga vo akw’au balenda yambula kubasadisa vava kilwakanga e nsungi za vuza e mbongo, yovo lunga-lunga twelezi yau. Kana una vo i wau, ndonga bebundanga e vuvu muna Nzambi, betangininanga Yesu Kristu yo zingil’e ngwizani ye Diambu dia Nzambi. Yave okubasambulanga wau bevanganga wo.

Ekuma Tufwete Vumina Nzambi ke Mu Wantu Ko

Nkand’a Nzambi ukutuvovesanga vo twavumina Nzambi ke mu wantu ko. Muna Nkunga 111:10 tutanganga vo: “O vumi wa Yave i lubantiku lua ngangu.” O vumi wau ke wonga wa tumbwa ko, kansi wonga wa kendeleka Yave wa Mvani a mioyo mieto. O vumi wa Nzambi ngwizani una ye zola. Ekuma tufwete vumina Nzambi ke mu wantu ko? Yambula twabadika mambu matanu.

1 Yave i Mpungu-ngolo. Yave osundidi wantu e nkuma. Muna vuminanga Nzambi, tukuyisianga kuna sambu dia Mpungu, ona obadikilanga “e zula nze etonsi dia maza muna nkalu.” (Yesaya 40:15) Wau vo Nzambi mpungu-ngolo, una ye nkuma wa fwasa e ‘nwaninwa kivangilwanga’ kw’awana besikilanga ye kwikizi muna yandi. (Yesaya 54:17) Wau vo Nzambi ozeye ana bafwanukini vwa moyo a mvu ya mvu, diangangu twalembi yambula konso diambu diatusima mu longoka mu kuma kiandi yo vanga luzolo lwandi.​—Lusengomono 14:6, 7.

2 Nzambi okutusadisa yo kututanina. Muna Ngana 29:25 tutanganga vo: “O wonga wa wantu utwas’enekwa: On’obunda Yave e vuvu, ovulukidi.” O wonga wa wantu i nekwa, kadi ulenda kutuvutula manima yo lembi songa lukwikilu lweto muna Nzambi. Nzambi okutuvananga lusikidisu vo ovwidi nkuma wa kutuvuluza, oku vo: “Kumoni wonga ko, kadi ngina yaku; kuvengozioka ko, kadi omono i Nzambi aku; ikuvamisa; elo, ikusadisa; elo, ikusikidisa muna koko kwalunene kwa unsongi wami.”​—Yesaya 41:10.

3 Nzambi ozolanga awana bekumfinamanga. Paulu wa ntumwa wasoneka e mvovo emi mia lukasakeso: “Ntomene wo zaya vo ke lufwa ko, ovo moyo, ovo mbasi, ovo kuluntu, ovo ina ina wau, ovo ina ikwiza, ovo ngolo, ovo ezangu ovo sina, ngatu nsem’akaka nkutu, ulenda kutuvambula muna zolwa kwa  Nzambi, kuna muna Kristu Yesu wa Mfumu eto.” (Roma 8:37-39) Avo tubunda Nzambi e vuvu yo kunlemvokela, o zola kwa Mfumu a Nz’amvimba muna yeto ke kusuka ko. Ekw’elau tuvwidi!

4 Tuyangalelanga mawonso kevanganga Nzambi mu kuma kieto. Yave i Mvangi eto, yandi kaka ozingisanga moyo. Vana ntandu, ke lungisanga kaka nsatu zeto za zingu ko, kansi ovanganga mpe mambu mekitulanga e zingu se kiakiese. Kieleka, yandi i Nto ya konso lukau lwambote. (Yakobo 1:17) Davidi wa nkwa kwikizi ona wayangalelanga walakazi wa Nzambi wasoneka vo: “Owokesa mo, ongeye Yave wa Nzambi ame, o masivi maku ye ngindu zaku oku twina . . . Ovo nzingwidi yo samuna zo, zingi, ke zitangumukakana ko.”​—Nkunga 40:5.

5 Akaka mun’awana bekutusianga kitantu nanga balenda soba. Olenda sadisa awana bekusianga kitantu ke mu kulula nsiku mia Nzambi ko, kansi muna sikila yo vumi ye zola kwaku muna Nzambi. Badika e nona ya yitu ya Yesu. Kuna lubantiku, ke bakwikilanga muna yandi ko. Bavovanga mu kuma kiandi vo: “Ozengomokene.” (Maku 3:21; Yoane 7:5) Kuna kwalanda, vava Yesu kafwa yo fuluka, ayingi muna yau bakituka minkwikizi. Ampangi za Yesu nkutu Yakobo ye Yuda basoneka tini yakaka ya Nkand’a Nzambi. Saulu mpe ona wabangikanga Akristu, wakituka se ntumwa Paulu. Akaka mun’awana bekutubangikanga o unu nanga balenda bakula vo oyeto i twina ye ludi kia Nkand’a Nzambi, mu kuma kia sikila kweto muna kwikizi.​—1 Timoteo 1:13.

Muna bong’e nona, Aberash, nkento mosi wa mwisi África wasambanga kazaya e ludi. Vava kayantika longoka Nkand’a Nzambi ye Mbangi za Yave, wasiwa kikilu kitantu kwa yitu yandi ye kw’afidi a mabundu. Mosi muna yitu yandi walongokanga Nkand’a Nzambi wayambula longoka mu kuma kia wonga wa wantu. Kansi, Aberash wasamba kwa Nzambi kansadisa yo kunkumika. Ke kolo ko, wavubwa se Mbangi a Yave. O sikila kwandi muna ludi nkia nluta kwatwasa? Enana muna yitu yandi bakasakeswa mu kuma kia unkabu wandi, bavutuka longoka Nkand’a Nzambi, owau mu nungunuka bena muna mwanda.

Olenda Sunda Wonga wa Wantu

Muna lembi bwa muna wonga wa wantu, ofwete vanga mawonso olenda mu wokesa zola kwaku muna Nzambi. Olenda wo vanga muna longoka Nkand’a Nzambi yo sungamena e sono nze kia Ayibere 13:6 kivovanga vo: ‘Yave i nsadisi ame; kimona wonga ko: O muntu, aweyi kekumpanga?’ Kuvilakana ko ekuma ofwete vumina Nzambi, ke mu muntu ko, diansongi ye diangangu mu vanga wo.

Sungamenanga mpe malau mayingi metukanga muna lemvokela mana olongokanga muna Nkand’a Nzambi. Olenda zaya e mvutu za yuvu yamfunu iyuvulanga wantu mu kuma kia zingu. Olenda kala ye ngangu za sunda mambu mampasi mebwanga muna zingu. Olenda kala ye vuvu kiasikila kana nkutu mu nza yayi yampasi. Olenda mpe samba kwa Nzambi wa mpungu-ngolo muna konso ntangwa ozolele.

Yoane wa ntumwa wasoneka vo: “E nza mpe vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu.” (1 Yoane 2:17) Eyayi i ntangwa ya kala nangwí yo vumina Nzambi. Vana fulu kia kala yo wonga wa wantu, olenda lemvokela lulukisu kevananga Nzambi vo: “Lungalala, e mwan’ame, wamwesa ntim’ame e kiese, yavana mvutu kwa ndion’okunsemba.” (Ngana 27:11) Ekw’elau diampwena tuvwidi!

Sungamena dio vo, ke vena muntu ko olenda kuvana dina Nzambi kevananga kw’awana bekumvuminanga: “O nsendo a lulembamu, yo vumi wa Yave, umvwama yo zitu yo moyo.”​—Ngana 22:4.

[Foto ina muna lukaya lwa 14]

Mu kuma kia unkabu wa Aberash, enana dia yitu yandi beyangalelanga longoka Nkand’a Nzambi