Nani i Nzambi?

NKIA mvutu ovana mu kiuvu kiaki? Wantu akaka beyindulanga vo batomene zaya Nzambi, vo yandi nkundi au. Akaka bebadikilanga Nzambi nze yitu kiavala. Bekwikilanga vo una, kansi ke bazeye mayingi ko mu kuma kiandi. Avo okwikilanga muna Nzambi, nkia mvutu ovana muna yuvu eyi yilende?

1. Nga Nzambi muntu kieleka?

2. Nga Nzambi una ye nkumbu?

3. Nga Yesu i Nzambi wa Mpungu-ngolo?

4. Nga Nzambi okumvwanga o mfunu?

5. Nga Nzambi otondanga e nsambila zawonso?

 Avo yuvwidi e yuvu yayi kwa wantu, mvutu za mpila mu mpila bekuvana. Ke diasivi ko vo wantu ngindu zaswaswana bena zau mu kuma kia Nzambi.

Ekuma Tufwete Zayila e Mvutu za Yuvu Yayi?

Vava kamokena yo nkento wa mwisi Samaria vana sima kia maza, Yesu Kristu wasonga o mfunu wa zaya e ludi mu kuma kia Nzambi. O nkento ndiona wa mwisi Samaria, wabakula vo Yesu ngunza. Kansi, vakala ye diambu diantokanesanga. E nsambila ya Yesu yaswaswana ye nsambil’andi. Vava kamvovesa diambu diadi, Yesu watoma kunkiesesela vo: “Oyeno nusambil’owu nulembi zaya.” (Yoane 4:19-22) E mvovo miami misonganga vo Yesu wazaya wo vo ke asambidi awonso ko i bazeye kieleka Nzambi.

Nga mvovo mia Yesu misonganga vo ke vena muntu ko olenda zaya kieleka Nzambi? Ve kikilu. Yesu wavovesa nkento ndiona vo: “Asambidi aludi besambil’o Se muna mwanda ye ludi: kadi o Se, o mbaku wowo i kevavilang’asambidi andi.” (Yoane 4:23) Nga una muna buka ki’awana besambilanga Nzambi “muna mwanda ye ludi”?

Diamfunu kikilu kwa ngeye dia zaya e mvutu za kiuvu kiaki. Ekuma? Yesu wasong’o mfunu wa vwa zayi wa ludi vava kasamba kwa Nzambi vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:3) Elo, e vuvu kiaku kia vwa moyo wa kusentu, kivavanga vo wazaya e ludi mu kuma kia Nzambi.

Nga dilendakana dia zaya e ludi mu kuma kia Nzambi? Elo dilendakana. Akweyi olenda kio sololwela? Yesu wavova mu kuma kiandi vo: “Mono kwame i nzila, i ludi, i moyo mpe: ke ven’on’okwiza kwa Se ko, ovo ke mu mono ko.” (Yoane 14:6) Wavova mpe vo: “Ke ven’on’ozeye o Mwan’owu kenena ko, Ese kaka; ngatu Ese, owu kenena, Mwana kaka, konso ona mpe o Mwana kakanini kunsengomwena.”​—Luka 10:22.

Ozevo, e nsabi za zaya Nzambi, zina muna malongi ma Yesu Kristu wa Mwan’a Nzambi. Yesu watusila o nsilu vo: ‘Ovo nukalanga muna diambu diame, nu alongoki ame kieleka; nuzay’e ludi, e ludi kikunuvevola.’​—Yoane 8:31, 32.

O Yesu nkia mvutu kadi vana muna yuvu tanu ina vana ntandu?

[Foto ina muna lukaya lwa 4]

Nga osambilanga Nzambi on’olembi zaya?