Mambu Nsambwadi Malenda Kusadisa mu Baka Nluta mia Tang’o Nkand’a Nzambi

“Nswaswani ye nkanda miakaka, o Nkand’a Nzambi i nkanda utoma tekwanga konso mvu.”—MVOVO MIAMI MIASONAMA MUNA ZULUNALU YA TIME.

“Ezak’e ntangwa yatanganga o Nkand’a Nzambi, kansi yabadikilanga wo vo ke una kwandi mfunu ko.” —Ukavova KEITH, NYIMBIDI A NKUNGA WA MWISI INGLATERRA.

DIANKENDA kikilu mu zaya vo wantu ayingi bena ye Nkand’a Nzambi, kansi nluta miakete kaka bebakanga muna tanga wo. Akaka bebadikilanga mana betanganga mu Nkand’a Nzambi nze lusalu lwantalu. Muna bong’enona, nkento mosi una ye nkumbu a Nancy wavova vo: “Tuka yayantikila tanga o Nkand’a Nzambi lumbu yawonso muna mene yo badika mana itanganga, yimonanga vo yakubama ngina mu sunda konso diambu dikumbwilanga muna lumbu. E fu kiaki kikunsadisanga mu vevola konso lukendalalu inwananga lwau se vioka mvu 35.”

Kana nkutu vo kwasidi tanga Nkand’a Nzambi ko, nga kukasakeswanga ko mu zaya vo awana betanganga wo besadiswanga? Avo Nkand’a Nzambi otanganga, nga olenda baka nluta miayingi muna mana otanganga? Avo i wau sadila mambu nsambwadi mayikilu mun’elongi diadi.

■Diambu dia 1​—Tanga wo y’ekani diasikila

▪ Nanga otanganga Nkand’a Nzambi kadi obadikilanga wo vo wambote, yovo i mbebe aku muna wo vanga yovo otanganga wo mu vava luludiku lulenda kusadisa mu nza yayi yampasi. Kansi olenda baka nluta miayingi avo otangidi wo y’ekani dia zaya ludi mu kuma kia Nzambi. Vana ntandu, ovwa nsambu zayingi kele vo otangidi o Nkand’a Nzambi y’ekani dia soba e zingu kiaku.

E sono yisonganga o mfunu wa tanga Nkand’a Nzambi y’ekani diasikila vava utezanesanga wo ye pelo. Muna Nkand’a Nzambi tutanganga vo: “Ovo o muntu nwe a diambu, ke mvangi ko ondiona wina nze muntu otalang’e ndose andi a wutukila muna pelo: kayitala, yo katuka, vana vau  kavilakanw’owu kakedi. Vo i ndion’okengelelanga muna nsiku aziku a vevoka, yo sikilanga mo, ke nwe ampilakeno ko, mvangi kak’ovanganga, ondion’osambwilwa muna mpang’andi.”—Yakobo 1:23-25.

O muntu oyikwanga muna nona kiaki watala ndose andi muna mpelo, kansi kasingika mpw’andi ko. Nanga watala yo mu nzaki zawonso yovo kakala y’ekani dia tomesa mpw’andi ko. Diau adimosi mpe, ketubaka nluta miayingi ko avo tutanga o Nkand’a Nzambi mu nzaki zawonso yo lembi sadila mana tutanganga. Kansi, tulenda kala ye kiese kiakieleka avo tutanga o Nkand’a Nzambi y’ekani diakala se ‘avangi’ a diambu muna yambula vo e nyindu a Nzambi wasoba ngindu ye mavangu meto.

■Diambu dia 2​—Sola nsekola yambote

▪ Nanga vena ye nsekola zayingi za Nkand’a Nzambi muna nding’aku. Kana una vo olenda baka nluta muna konso nsekola ya Nkand’a Nzambi otanga, e nsekola zakaka zisadilanga mvovo miampasi muna bakula. (Mavangu 4:13) Asekodi akaka besobanga e y’aka sono ya Nkand’a Nzambi yo vingisa vo tusansu twa wantu. Muna bong’e nona, akaka bekatulanga e nkumbu Yave yo vingisa yo ye mazina nze “Nzambi” yovo “Mfumu.” Muna sola e nsekola ya Nkand’a Nzambi otanga, vava ina yatoma sekola o Nkand’a Nzambi mu mvovo mialeboka ina o wantu beyangalelang’o tanga.

Mazunda ye mazunda ma wantu o mu nza yawonso nsekola ya Tradução do Novo Mundo beyangalelanga tanga. * Badika e nona kia yakala dimosi dia nunu kuna Bulgária. Vava kayenda ku lukutakanu lwa Mbangi za Yave, bamvana e nsekola ya Tradução do Novo Mundo. I bosi wavova vo: “Se mvu miayingi itanganga o Nkand’a Nzambi, kansi owau i nkumbu antete ntangidi e nsekola yaleboka ke ina mpasi ko mu bakula, mambu mena mo metoma simbang’o ntima.”

■Diambu dia 3​—Samba una kwatangidi ko

▪ Muna toma bakula o Nkand’a Nzambi diambote walombanga lusadisu kwa Ndiona wasonekesa wo nze una kavanga ntozi a nkunga vava kavova vo:“Untemwen’o meso, yamona masivi muna nsiku aku.” (Nkunga 119:18) Sambanga kwa Nzambi konso ntangwa otanganga o Nkand’a Nzambi, lombanga lusadisu lwandi kimana wabakula e Diambu diandi. Olenda vutula mpe matondo mu kuma kia Nkand’a Nzambi kadi kondwa kwa nkanda wau ke twadi zaya Nzambi ko.—Nkunga 119:62.

Nga Nzambi owanga e sambu yayi? Badika dina diabwiala dumbelele yole kuna Uruguai. Bakala ye lukatikisu mu kuma kia dina kevovanga Nkand’a Nzambi muna Daniele 2:44 ye basamba kwa Nzambi kabatwikila muntu kimana kabasadisa mu bakula e sono kiaki. Ekolo batanganga o Nkand’a Nzambi, Mbangi zole za Yave badodela kielo kiau, i bosi babatangila e sono kina balomba vo Nzambi kabasadisa mu bakula kio. Basasila vo Kintinu kia Nzambi kivinga vana fulu kia ayadi a nza. * Ediadi diafila dumbelele yayi mu kwikila vo Nzambi wavana e mvutu za sambu kiau.

■Diambu dia 4​—Tanganga wo lumbu yawonso

▪ Muna nkanda umosi mwasona vo, kina kia 11 kia Setemba, 2001, vava vabwa e sumbula kiampwena kia mavangu mansoki kuna Estados Unidos, “wantu ayingi bayenda sumba o Nkand’a Nzambi.” Ndonga betanganga kaka o Nkand’a Nzambi vava bekalanga mu mpasi. O Nkand’a Nzambi ukutukasakesanga vo twatanganga wo lumbu yawonso, kadi uvovanga vo: ‘Kuyambula nkanda wau wa nsiku ko wavambana ye nu’aku, watanga wo kaka yo fuku yo mwini muna nding’a lembama, wavis’o meso muna vang’owu wawonso wasonama mo; i nsongesa osongesa ngyend’aku yo vang’owu wangangu.’—Yosua 1:8.

 O mfunu wa tanga o Nkand’a Nzambi lumbu yawonso, ulenda tezaneswa yo muntu wabaka nzengo za dia madia mambote vava kabakama kimbevo kia ntima. Nga olenda baka e nluta avo odidi kaka madia mambote muna ntangwa kelunzanga tulu? Ve. Muna baka nluta kafwete dianga madia mama lumbu yawonso. Diau adimosi mpe, o tanga Nkand’a Nzambi lumbu yawonso dikusadisa mu ‘singika ngyenda zaku.’

■Diambu dia 5​—Sadila ndekwa zakaka

▪ Ndonga vava betanganga o Nkand’a Nzambi beyantikilanga muna nkanda Etuku yakuna Lusengomono, kansi vena mpe ye ndekwa zakaka zamfunu. Tala e ndekwa zazi.

Tanga lusansu lwa muntu oyikwanga muna Nkand’a Nzambi. Tanga konso kapu yovo nkanda uyikanga lusansu lwa asambidi a Nzambi nze awaya bayikilu ova yanda:

• Yosefe: Etuku 37–50.

• Rutu: Rutu 1–3.

• Yesu: Matai 1–28; Maku 1–16; Luka 1–24; Yoane 1–21. *

Tanga diambu dimosi dimosi. Muna bong’e nona, vava otanganga diambu mu kuma kia sambu, tanga mpe luludiku lwa Nkand’a Nzambi mu kuma kia sambu kumosi ye sambu yayingi yasonama mo. *

Tanga mu nding’angolo. O tanga Nkand’a Nzambi mu nding’angolo nluta miayingi ditwasanga. (Lusengomono 1:3) Olenda wo vanga kumosi y’esi nzo aku, kayanese kwa konso muntu tini yovo kapu yivovelanga lusansu lwa wantu aswaswana beyikwanga muna Nkand’a Nzambi. Akaka bezolanga wá e ntangilu a Nkand’a Nzambi muna CD. Nkento mosi wavova vo: “Diampasi diakala kwa mono muna yantika tanga Nkand’a Nzambi, muna kuma kiaki, yayantika wá e ntangilu andi muna CD. Owau, iyangalelanga tanga o Nkand’a Nzambi ke mu tanga nkanda mia nzola ko.”

■Diambu dia 6​—Badika mana otangidi.

▪ Mpasi za zingu ye mambu mevunzanesanga e ngindu za wantu, mekitulanga o badika se diambu diampasi. Nze una tutafunanga madia kimana makumika e nitu eto, diau adimosi mpe, tufwete badikanga mana tutanganga muna Nkand’a Nzambi muna baka e nluta. Tulenda wo vanga muna fimpululanga mana tutangidi yo kiyuvula: ‘Adieyi ndongokele mu kuma kia Yave wa Nzambi? Aweyi ndenda mo sadila muna zingu kiame? Aweyi ndenda mo sadila muna sadisa akaka?’

O badika mana tutangidi muna Nkand’a Nzambi dilenda simba o ntima mieto yo wokesa luyangalalu lweto muna tanga e Diambu dia Nzambi. Muna Nkunga 119:97 tutanganga vo: “Kuna kwa nzola nzolele nsiku aku! I mpimpit’ame e lumbu mvimba.” O ntozi a nkunga wabadikanga mana katanganga mu Nkand’a Nzambi lumbu yawonso. Ediadi diansadisa mu wokesa luyangalalu lwandi muna mana katanganga.

■Diambu dia 7​—Lomba lusadisu muna bakula Nkand’a Nzambi

▪ Nzambi ke vavanga ko vo twabakula Diambu diandi muna ngangu za yeto kibeni. O Nkand’a Nzambi uvwidi “maka mambu mampimpita” mu bakula. (2 Petelo 3:16) O nkanda Mavangu uyikanga ekesa dia Ntiopia ona watanganga o Nkand’a Nzambi, kansi kabakulanga mana katanganga ko. Nzambi watuma mosi muna selo Yandi kansadisa, muna mpila yayi o Ntiopia ‘wayenda muna nzil’andi kuna kiese.’—Mavangu 8:26-39.

Ongeye mpe olenda baka nluta mia tanga Nkand’a Nzambi avo olombele lusadisu muna bakula mana otanganga. Mokena ye Mbangi za Yave muna zunga kiaku yovo soneka muna fulu yiyikilu muna lukaya lwa 4 lwa Eyingidilu diadi muna tambula elongi dia ngovo dia Nkand’a Nzambi kuna nzo aku.

[Mvovo Vana Yand’a lukaya]