Nze una ozeye o luvunu i vova diambu dina vo ke dialudi ko. Nga wavuna kala?— * Kana nkutu ambuta ana bezolanga Nzambi bavuna kala. Nanga ozeye muntu muna Nkand’a Nzambi ona wavuna. Muntu ndioyo, nkumbu andi Petelo, mosi muna 12 dia antumwa za Yesu. Owau, tuzaya ekuma kavunina.

Vava Yesu kakangwa, wanatwa kuna nzo a ngang’ambuta, muna dingidingi yovo midi mia mpimpa. Petelo, wakota vana yanzala kia nzo a ngang’ambuta lembi sungamenwa. Vava bayotelanga, o ntaudi ankento a ngang’ambuta wansungamena. Wavova vo: “Ongeye mpe wakala yo Yesu.” Mu kuma kia wonga, Petelo wavova vo ve!

O nkand’a Nzambi uvovanga vo, “ntaudi ankento akaka umwene,” yo vova vo: ‘O ndioyo mpe kakala yo Yesu.’ Petelo wavuna diaka. Ke kolo ko, akaka bamona Petelo bamvovesa vo: “ongeye mpe u nkw’au.”

Petelo o mwene wonga. Muna nkumbu tatu wavuna yo vova vo: “Kinzeye kwame ko, o muntu ndioyo.” Vana vau e nsusu ikokwele. Yesu watala Petelo, oyandi wasungamena mana Yesu kamvovesa ke kolo ko vo: “E nsusu ke ikukokwela ko yavan’okumpanina nkalu ntatu.” O Petelo, wakendalala kikilu yo bokomoka ye dilu.

Nga ediadi dilenda kubwila?—Nanga olenda kala kuna sikola yo wá akw’aku bemokenanga mu kuma kia Mbangi za Yave. Mosi muna yau olenda vova vo: “Ke bekundanga sinsu kia nsi ko,” wakaka olenda kudikila vo, “ke benwananga muna tanina nsi au ko.” O mosi olenda vova vo, “Ke Akristu akieleka ko kadi ke bekembelelanga lumbu kia luwutuku lwa Kristu ko.” I bosi, o mosi olenda kuyuvula vo: “Ongeye mpe u Mbangi a Yave?” Adieyi ovova?—

Diambote wateka kubama muna vana mvutu zambote ekolo diambu ke diabwidi ko. Petelo kakala wakubama ko. Vava kabangikwa, wavuna. Kansi, watoma kendalala mu kuma ki’esumu diandi ye Nzambi wanloloka.

Anania, mosi muna alongoki a Yesu muna tandu kiantete, wavuna mpe. Kansi, Nzambi kanloloka ko, kana nkutu Safira wa nkaz’andi. Anania wawizana yo nkaz’andi kimana bavuna. Owau, tubadika ekuma o Nzambi kalembi lolokela Anania yo Safira.

Vioka lumbu kumi vava Yesu kasisa antumwa yo vutuka kwa Nzambi kun’ezulu, 3.000 ma wantu bavubwa kuna Yerusaleme. Ndonga wantu batuka mu nsi zanda yo kwiza muna Nkinzi wa Pentikosti. Wau vo bakituka alongoki a Yesu bakala ye luzolo lwa kwamanana kuna Yerusaleme muna longoka mayingi mu kuma kia lukwikilu lwau lwampa. Akaka muna antumwa, basadila mavwa mau muna lunga-lunga wantu awaya.

Anania yo nkaz’andi bateka evwa diau mu sadisa awana bavubwa. Vava Anania kanata e nzimbu kw’antumwa, wavova vo e zazi i nzimbu zawonso katambula. Kansi, luvunu kavova kadi wasweka nzimbu zakaka! Nzambi wazayisa luvunu lwalu kwa Petelo, mu kuma kiaki Petelo wavova vo: ‘Ke wantu ko ovunini, kansi Nzambi.’ Vana vau, Anania wafwa. Vava vavioka ola tatu, nkaz’andi wayiza. Lembi zaya dina diabwila yakala diandi, yandi mpe wavuna yo fwa vava vau.

Adieyi tulongokele muna lusansu lwalu? O vova e ludi i diambu disundidi o mfunu! Yeto awonso, tufwete longoka diambu diadi diamfunu. Kansi, yeto awonso tusumukanga, musungula vava tukalanga aleke. Nga kumonanga kiese ko wau vo Yave okuzolanga ye okuloloka nze una kalolokela Petelo?— Sungamena vo, tufwete vovanga e ludi. Avo tusumukini mu kuma kia luvunu, tufwete dodokela Nzambi kimana katuloloka. I una kavanga Petelo ye walolokwa. Avo tusidi ngolo muna lembi vuna diaka, Nzambi okutuloloka mpe.