LUFULUKU lwa Yesu mfunu kikilu lwina kwa yeto o unu. Paulu wa ntumwa wayika mfunu wau vava kasoneka vo: ‘Wau kiafulwa Kristu muna mafwa, i ntomoni mun’awana balele. Wau vo muna muntu mosi i mwayizila lufwa, muna muntu mosi mpe, i mwayizila lufuluku lua mafwa. Wau vo muna Adami awonso befwanga, i una muna Kristu awonso bevaninw’e mioyo.’—1 Korinto 15:20-22.

O Yesu wafulwa muna lumbu kia 16 kia ngonde ya Nisani muna mvu a 33 a T.K. kina vo i lumbu Ayuda basunzulanga masa ye bundu yantete kwa Yave wa Nzambi muna tempelo yavauka kuna Yerusaleme. Wau vo Paulu wayikila Yesu vo ntomoni, ediadi diasonga vo vadi kala wantu akaka ana badi fuluka.

Muna mvovo mialanda Paulu wasasila vo ediadi, diadi vangama muna lufuluku lwa Yesu. Paulu wavova vo: ‘Wau vo muna muntu mosi i mwayizila lufwa, muna muntu mosi mpe, i mwayizila lufuluku lua mafwa.’ Wau vo twasambukila esumu dia Adami, yeto awonso tufwanga. Kansi, muna tambika moyo andi alunga nze lukûlu, Yesu waziula nzila kimana wantu bavevoka muna ubundu w’esumu yo lufwa. Paulu wakufika diambu diadi vava kasoneka muna Roma 6: 23 vo: “E mfutu esumu fwa, vo i lukau luangovo lua Nzambi, moyo a mvu ya mvu muna Kristu Yesu wa Mfumu eto.”

Yesu wasasila o mfunu a lufwa ye lufuluku lwandi kuna kwa yeto. Wayika muna kuma kiandi vo: ‘I una kafwete zangwilw’o Mwan’a muntu kimana konso on’okwikilanga muna yandi, moyo a mvu ya mvu kevwa. Kadi muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.’—Yoane 3:14-16.

Yindula zingu kiakwele mvu mu nza yakondwa mpasi ye ntantu! (Lusengomono 21:3, 4) Ekwe vuvu kiakiese! Nkwa ngangu mosi wasasila diambu diadi mu mpila eyi: “Ekolo ziami ikutusungamesanga o kufama kwa zingu, o lufuluku lukutusungamesanga o kufama kwa lufwa.” Elo, o lufuluku lwa Yesu lulenda kuvana moyo.