Nga okwikilanga muna Nzambi? Avo i wau, nga olenda yika ziku kisonganga vo Nzambi una? Lekwa yawonso ituzungidi isonganga vo vena yo Mvangi a ngangu, a nkuma yo zola. Adieyi disonganga e ziku kia diambu diadi? Muna zaya mvutu, badika mvovo mia Paulu wa ntumwa muna nkand’andi kw’Akristu kuna Roma.

Paulu wavova vo: “Oma ma yandi [Nzambi] malembi monakana, matomene moneka tuka kun’esemo dia nza, wau mazayakenene muna lekwa yavangwa, i nkum’andi a mvu ya mvu, yo unzambi, balembi kala ye vinza.” (Roma 1:20) Nze una Paulu kasonga, Mvangi wasia dimbu kiandi muna lekwa kavanga.

Paulu wavova vo, fu ya Nzambi imonekanga muna ‘lekwa yawonso yavangwa mu nza.’ O mvovo wa Kingerekia wasekolwa vo “nza” mu sono kiaki, ke uyikanga ntoto ko, kansi wantu uyikinga. * Paulu wasonga vo tuka wantu bavangilwa, bemonanga fu ya Mvangi muna lekwa yawonso kavanga.

E ziku kiaki kiamwangana mwawonso. Ke kiaswekama muna nsema ko kansi ‘kitoma monekanga.’ Tuka muna lekwa yampwena yamuna lekwa yakete, o nsema usonganga ziku vo vena yo Mvangi una ye fu y’esivi. E mpil’esivi yavangilwa e lekwa, nga ke ikutusonganga ko vo Nzambi nkwa ngangu? E ntetembwa z’ezulu ye mafuku mampwena ma mbu nga ke mesonganga nkum’andi ko? Nga kukwikidi ko vo swaswana kwa madia, mpaika ye ndimuk’a ntangwa kusonganga zola kwandi muna wantu?—Nkunga 104:24; Yesaya 40:26.

Nga ziku kia mambu mama kimonekanga kikilu? Elo, kadi kiamwangana emvimba, muna kuma kiaki awana ke bekwikilanga muna Nzambi ko ‘ke bena ye vinza ko.’ Nkwa ngangu mosi wasasila diambu diadi mu mpila eyi: Yindula vo nati a kalu ovezele e sinsu kisonganga vo ofinamene va “mpambu ye ofwete viluka ku lumonso.” Polisia u nkenge yo kumfutisa nzimbu. Nati a kalu ovovele vo ka mwenenge sinsu kiakina ko. Kansi, o polisia kazolele kunloloka ko kadi e sinsu kiatoma sonekwa ye mpe meso mandi metoma monanga. Kuna diaka e sambu, o nati a kalu ovwidi mbebe ya sia sungididi muna sinsu yo lemvokela yo. Diau adimosi mpe, o nsema usonganga ziku vo Nzambi una. E “sinsu” kiaki kitoma monekanga. Wau vo tuna ye ntona, tuvwidi ngangu za bakula sinsu kiaki. Ka vena kuma ko muna veza kio.

Elo, o nsema usengomonanga fu ya Mvangi eto. Kansi, Nkand’a Nzambi usengomonanga mayingi mu kuma kiandi. Muna nkanda wau tulenda baka mvutu za kiuvu kiaki kiamfunu: Adieyi i kani dia Nzambi mu kuma kia ntoto yo wantu? Ozaya mvutu za kiuvu kiaki dilenda kusadisa mu finama Nzambi una vo e ‘fu yandi yilembi moneka, imonekanga’ muna lekwa yawonso va nza.