Yave wa Nzambi ozolele vo twamokenanga yandi ntangwa zawonso kondwa kwa lukatikisu yo kunzayisa mana mekututokanesanga. (Luka 18:1-7) Yave owanga e sambu yeto kadi mfunu kekutuvwanga. Wau vo S’eto ezulu okutuwondelelanga vo twasabanga, nga ke diambote ko muna wo vanga?—Tanga Filipi 4:6.

O samba ke mpila ya lombela kaka lusadisu ko. Kansi, kukutusadisanga mpe muna finama Nzambi. (Nkunga 8:3, 4) Vava tusambanga, tukumikanga ngwizani eto yo Nzambi.—Tanga Yakobo 4:8.

Nzambi ozolele vo vava tusambanga twavenganga fu kia vutukilanga e mvovo yovo tanga mio mu nkanda. Edi disundidi o mfunu i makani mambote ma ntima, ke mpila ina ko o muntu ke kalanga vava kesambanga. Yave okutuwondelelanga vo twasambanga ye nsi a ntima. (Matai 6:7) Muna bonga e nona, o Kana kuna Isaele yankulu wasamba mu kuma kia diambu dimosi diankendelekanga. Kuna kwalanda, lukendalalu lwandi lwakituka se kiese. Kana wasamba ye nsi a ntima muna vutula matondo.—Tanga 1 Samuele 1:10, 12, 13, 26, 27; 2:1.

Ekwe lau diampwena tuna diau! Tulenda finama Mvangi eto yo kunzayisa mana mekututokanesanga. Tulenda mpe samba kwa Nzambi yo kumvutula matondo muna mana kevanganga. Ozevo, ke tufwete veza lau dia mpila yayi ko.—Tanga Nkunga 145:14-16.