Joana: E Luisa aweyi kaka? Yatoma yangalala vava yamwene kuna Luyindulu lwa lufwa lwa Yesu Kristu mu lumingu lwavioka. * Nga wayangalela mana wawidi muna lukutakanu?

Luisa: Ingeta, kansi muna vova e ludi kiabakwidi mayingi ko. Yawá kala vo wantu bekembelelanga luwutuku lwa Yesu muna lumbu kia Noele ye lufuluku lwandi muna nkinzi a Nduta, kansi kiasidi wá ko vo lufwa lwandi mpe lufwete kembelelwa.

Joana: Kieleka, e Noele ye Nduta i nkinzi mitomene zayakana mu nza yawonso. Kansi, Mbangi za Yave babakula o mfunu wa yindulanga lufwa lwa Yesu. Avo una ye fintangwa, nzolele kusonga e kuma tuvangilanga wo.

Luisa: Ka diambu ko, ngina ye fintangwa.

Joana: Mbangi za Yave beyindulanga lufwa lwa Yesu kadi yandi kibeni wakanikina alongoki andi vo bavanganga wo. Badika dina diavangama muna fuku vitila Yesu kafwa. Nga osungamene vo Yesu lambu kavangisa dina kadia ye alongoki andi?

Luisa: Nga i Nlekelo a Mfumu?

Joana: Ingeta. Muna Nlekelo wauna, Yesu wavana alongoki andi tuludiku twatoma kiá. Nga olenda tanga mvovo miandi muna Luka 22:19?

Luisa: Ok. ‘Obongele mpe mbolo, otondele, obukunwini, ubavene yo, ovovele vo: E mbolo yayi nitu ame isunzulanga, ina ivaninwa mu kuma kieno. I wau wuwu nuvanganga muna luyindulu lwame.’

Joana: Ntondele. Tala luludiku lwa Yesu kuna nsuka a tini kiaki: ‘I wau wuwu nuvanganga muna luyindulu lwame.’ Vitila kavana luludiku lwalu, Yesu wateka kiesesa dina bafwete yindula mu kuma kiandi. Wavova vo moyo andi wadi vanwa muna wete dia alongoki andi. E mvovo miami mia Yesu ngwizani mina ye mvovo mia sono kia Matai 20:28. E sono kiaki kivovanga vo: ‘Mwan’a muntu, kayiza sadilwa ko, kansi kasadila yo vana moyo andi se lukûlu lwa wantu ayingi.’ E kiaki i kuma Mbangi za Yave bekutakananga konso mvu muna yindula lufwa lwa Yesu, i sia vo yindula kimenga kia lukûlu kavana o Yesu. Lufwa lwandi lulenda vana moyo kwa wantu awonso belemvokelanga Nzambi.

Luisa: Nkumbu miayingi iwanga wantu bevovanga vo Yesu wafwa kimana twazinga. Muna vova e ludi, kibakulanga diambu diadi ko.

Joana: E Luisa, ka ngeye kaka ko. Ke diasazu ko mu bakula e diambu ditadidi kimenga kia  lukûlu lwa Yesu. Kansi, e kiaki i kimosi muna ludi kiamfunu kia Diambu dia Nzambi. Nga olenda kumpana fintangwa kimana twavovela diambu diadi?

Luisa: Ke diambu ko.

Joana: Ntondele. Yambula yateza kusasila mana itanganga mu kuma kia lukûlu.

Luisa: Ok.

Joana: Muna bakisa mfunu wa lukûlu, tufwete zaya dina diabwa vava Adami yo Eva basumuka muna mpatu a Edene. Yambula twatanga Roma 6:23. Nga olenda tanga e sono kiaki?

Luisa: Ingeta. Kivovele vo: ‘O mfutu a sumu i lufwa, vo i lukau luangovo lua Nzambi, moyo a mvu ya mvu muna Kristu Yesu wa Mfumu eto.’

Joana: Ntondele. Yambula twafimpa mvovo miami. Kuna lubantiku e sono kiaki kivovanga vo: ‘O mfutu a sumu i lufwa.’ Nzambi wayika kuna lubantiku lwa lusansu lwa wantu vo o mfutu yovo tumbu kia sumu i lufwa. Kieleka, kuna lubantiku ka vakala muntu wasumuka ko. Vava Nzambi kavanga Adami yo Eva wantu alunga bakala ye bakala ye lau dia wuta wan’alunga. Ozevo, ka vakala kuma ko kiadi fila muntu mu fwa. Adami, Eva yo wan’au bakala ye lau dia zinga yakwele mvu ye kiese. Kansi, e diambu diadi ke diavangama ko. Nga ozeye ekuma?

Luisa: Adami yo Eva badia bundu kina Nzambi kabakanikina vo ke badie ko.

Joana: Dialudi. Vava badia e bundu kiakina, Adami yo Eva bakolamena Nzambi, basumuka. Bakituka se wantu alembi lunga. E vangu diau ke diatwasa kaka mfwilu kwa yau ko, kansi diatwasa mpe mfwilu kwa wan’au awonso.

Luisa: Adieyi ozolele vova?

Joana: Yambula yabaka e nona muna toma kusasila e diambu diadi. Unzayisa eti, nga ozeye una uvangilwanga e bilikisi?

Luisa: Ingeta!

Joana: Yindula vo muntu osumbidi nkela yampa yavangila bilikisi. Kansi, vitila kasadila yo, e nkela ibwidi va ntoto yo bofoka. Aweyi obenze ikala e bilikisi ivangilwa muna nkela yayi yabofoka? Nga bilikisi ke ikala mpe yabofoka ko?

Luisa: Dialudi! Yabofoka kikilu ikala.

Joana: Diau dimosi mpe, Adami yo Eva “babofoka” vava bakolamena Nzambi. Wau vo vava basumuka ke bakiwutila ko, ozevo o wana awonso a Adami yo Eva ‘babofoka’ bawutuka, i sia vo basumuka. O mvovo “sumu” muna Bibila ke uyikanga kaka vangu dina bavanga ko, kansi uyikanga mpe e mpila zingu kiambi batusisila. Adami yo Eva batusambukisa e sumu dikutufilanga kuna lufwa kana una vo ngeye yo mono ka twavanga mbi ko ye ka twakala ko vava basumuka. Nze una tutangidi muna sono kia Roma 6:23, o mfutu a sumu i lufwa.

Luisa: Ediadi ke diansongi ko! Ekuma yeto awonso tufwete mwena e mpasi mu kuma kia sumu dia Adami yo Eva?

Joana: Kieleka, ke diansongi kikilu ko. Muna kuma kiaki, Nzambi muna unsongi wandi wabaka nzengo vo Adami yo Eva bafwa mu kuma kia sumu diau, kansi wavana e vuvu kwa yeto tuna vo i wan’au. Nzambi wateta nzila muna kutukûla mu mpasi zazi. E nzila yayi i kimenga kia lukûlu lwa Yesu. Tala diaka dina sono kia Roma 6:23 kivovanga kuna mfoko: ‘Vo i lukau luangovo lua Nzambi, moyo a  mvu ya mvu muna Kristu Yesu wa Mfumu eto.’ Ozevo, lufwa lwa Yesu lwaziula nzila kimana twakulwa muna sumu ye lufwa. *

Joana: Vena ye diambu diakaka nzolele kusonga mu sono kiaki.

Luisa: Nkia diambu?

Joana: Tala dina kivovanga e sono kiaki: ‘Vo i lukau luangovo lua Nzambi, moyo a mvu ya mvu muna Kristu Yesu wa Mfumu eto.’ Wau vo Yesu yandi wamona e mpasi yo fwa muna wete dieto, ekuma sono kiaki kivovelanga vo lukûlu i ‘lukau lwa Nzambi’ vana fulu kiavova vo i ‘lukau lwa Yesu’? *

Luisa: Hum. Kizeye ko.

Joana: Wau vo Nzambi wavanga Adami yo Eva, yandi basumukina vava bakolama muna mpatu ya Edene. O ntim’a Nzambi walwala vava wan’andi antete bankolamena. Kansi, Yave vana vau wasingika e diambu diadi. * Wavanga nkubika kimana mosi muna wan’andi a mwanda keza ova ntoto yo zinga se muntu alunga kimana kavana moyo andi se kimenga kia lukûlu. Ozevo, e nkubika ya lukûlu lukau lwa Nzambi. Vena ye kuma kiankaka kisonganga vo lukûlu lukau lwa Nzambi. Nga wayindula kala una Nzambi kamona vava Yesu kavondwa?

Luisa: Nkatu.

Joana: Lekwa ya sakanena mbwene vana yanzala, wana una au?

Luisa: Ingeta, wana wole​—ngina au.

Joana: Wau vo u ngudi, yindula una Yave wa Nzambi wa Se dia Yesu kamona vava Mwan’andi anzolwa kasiwa mu pelezo, kavezwa, kawandwa, kakomwa vana nti yo fwa lufwa lwampasi malembe-malembe!

Luisa: Kieleka, Nzambi mpasi kikilu kamona. Hum, kiasidi yindula diambu diadi ko!

Joana: Diampasi mu yika e mpila mpasi kamona mu lumbu kiakina. Kansi tuzeye wo vo Nzambi ntantu kemonanga, tuzeye mpe e kuma kayambulwila vo mwan’andi kafwa. E kuma kiaki kitoma sasilwanga muna sono kia Yoane 3:16. Nga olenda kio tanga?

Luisa: Ingeta. Kivovele vo: “Kadi muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.”

Joana: Ntondele. Tala diaka lubantiku lwa sono kiaki. Kivovele vo: “Muna nzola kazolele nza o Nzambi.” Ozevo o zola i kwafila Nzambi mu vana Mwan’andi kafwa muna wete dieto. Kieleka, o lukûlu i mpila isundidi ina Nzambi kasongela o zola kwandi muna yeto. E kiaki i kuma Mbangi za Yave bekutakananga nkumbu mosi konso mvu muna yindula lufwa lwa Yesu. Nga obakisi mana tumokene?

Luisa: Ingeta. Ntondele muna kunsasila diambu diadi.