Paul ona una yo wana wole, wavova vo: “Vava nzimbu zakuluka zitu omu nsi eto, madia mavila yo wokela e ntalu. Ola zayingi twaviokesanga mu nlonga wa sumbila madia, kansi nkumbu miayingi madia mafokokanga vitila twalwaka vana matekelwanga. Wantu batanda mu kuma kia nzala, akaka bafwanga e kiambu muna nzila. E ntalu a madia yalwaka kuna mafunda ye mafunda. Kuna kwalanda, e nzimbu muna nsi eto ke zakala kikilu mfunu ko. E nzimbu yakala zau kuna banco, za seguro ye zina yalundilwanga kwa luyalu mu kuma kia kinunu, zawonso zavila.”

Paul wazaya wo vo kafwete sadila e “ngangu” muna sadisa esi nzo andi bazinga. (Ngana 3:21) Paul wavova vo: “Salu kia kura yasalanga, kansi yayantika sala konso salu yamonanga kana nkutu ina kiabakilanga nzimbu zayingi ko. Wantu akaka madia bamfutanga, akaka lekwa ya nzo. Vava yafutwanga savo 4, yasadilanga 2 yo teka zakaka. Yasumba wan’a nsusu 40. Vava zakola, yateka zo yo sumba diaka 300 za wan’a nsusu. Kuna kwalanda, yasobanesa 50 ma wan’a nsusu ye nsaku 2 za mfumfu ya masangu. Ediadi diansadisa mu dikila esi nzo ame yo wantu akaka mu lumbu yayingi.”

Paul wazaya wo mpe vo e diambu disundidi o mfunu kafwete vanga i bunda e vuvu kwa Nzambi. Vava tulemvokelanga e nkanikinu miandi, yandi okutusadisanga. Muna diambu ditadidi nsatu zeto za lumbu ke lumbu, Yesu wavova vo: “Ke nutombi eki nudia, y’eki nunua ko, . . . kadi o Sen’o ozeye vo eyayi nuvwidi yo mfunu.”—Luka 12:29-31.

Satana ovukumunanga wantu kimana batokananga kwayingi mu kuma kia zingu. Wantu betokananga kwayingi muna lungisa e nsatu zau, mukala  ye lekwa ina ke besinga vua kwau mfunu ko, ye maka mambu mena vo ndozi kwandi. Ayingi bedianga e mfuka yo mona e ziku kia mvovo mia sono kia Ngana 22:7 vo: “O nsompi, ntaudi a nsompeki.”

Wantu ayingi bebakanga nzengo zambi. Paul wavova vo: “Ayingi basisanga akento yo wana mu kwenda vava zingu kiambote ku nsi zankaka. Akaka ke bavangisanga nkanda mia luyalu ko miadi kubasadisa mu baka e salu kuna nsi a kinzenza. Ediadi diabafilanga mu tina mapolisi yo kondwa e fulu kia leka. Ke bavavanga mpe lusadisu lwa Nzambi ko. Kansi, oyeto twabaka e nzengo za kala vamosi kana una vo twakala ye mpasi za nzimbu. Nzambi watoma kutusadisa.”

Paul wakudikila: “Yesu wavova vo: ‘Ke nutelamw’o moyo ko mu kuma kia mbazi, kadi e lumbu kia mbazi kikala ye ntokani zandi. Konso lumbu ye ntokani zandi.’ Lumbu yawonso yasambanga kwa Nzambi ‘katuvana o dia kweto kwa lumbu ke lumbu’ kimana twakala o moyo. Nzambi watusadisa nze una Yesu kavova. Ke nkumbu miawonso ko twatambulanga kina twalombanga mu sambu. Lumbu kimosi vava yakala muna nlonga, kiazaya ko nkia madia matekwanga. Vava yafinama, yamona vo iogurte kaka yakala vo. Kizolanga dia iogurte ko. Kansi, kiakala y’owu mpanga ko, iogurte twalekela o fuku wauna. Ivutulanga matondo kwa Nzambi kadi ke twasala leka nzala ko muna kolo kiakina.” *

“Owau ke dikalanga beni mpasi ko mu lenda e nzimbu. Mana matubwila matulonga vo o bund’e vuvu muna Nzambi i nsabi muna sunda konso ntokani za zingu. Yave * okutusadisa ekolo tukwamanana vanga luzolo lwandi. Tumonanga e ludi kia mvovo mia Nkunga 34:8: ‘Numika, nwatala wo vo Yave wambote: Nkwa nsambu ona otinina kwa yandi.’ Mu kuma kiaki, ke tuna ye wonga ko muna konso mpasi zilenda kutubwila muna zingu.

“Owau tutoma bakulanga vo wantu ke salu ko ngatu nzimbu bevuanga o mfunu muna zinga, kansi madia. Tuvingilanga e ntangwa ina ‘o ulolo wa madia ukala mu nsi’ nze una Nzambi kasia o nsilu. Kansi, ‘wau tuna yo dia yo vuata tuyangalela ko.’ Bibila kikutukumikanga mu mvovo emi: ‘E fu yeno, mbula yakondwa luzolo lua nzimbu; nuyangalela ina nuna yau. Kadi oyandi kibeni wavova vo: Kikuyambula nkutu ko, ngatu kusisa.’ Muna kuma kiaki tulenda kala ye kikesa yo vova vo: “Yave i nsadisi ame; kimona wonga ko.”” *

Muna ‘kangala yo Nzambi’ nze Paul y’esi nzo andi lukwikilu kikilu divavanga. (Etuku 6:9) Vava tunwananga ye mpasi za nzimbu, tulenda tanginina e nona kia Paul ona wasadila e ngangu yo bunda e vuvu kwa Nzambi.

Adieyi tuvova kele vo mambu ma zingu kia nzo mekututokanesanga?