Wantete wa Samuele 9:1-27
-
Samuele owanane yo Saulu (1-27)
9 Vakala Mbenyamini nkumbu andi Kisi,+ wa mwan’a Abiele, wa mwan’a Serore, wa mwan’a Bekora, wa mwan’a Afia, wa mwan’a Benyamini,+ mvuama kikilu kakala.
2 Wakala yo mwan’a yakala nkumbu andi Saulu,+ toko diambote-mbote—muna Aneyisaele ke mwakala muntu ko wansunda kimote—tuka muna mavembo wasunda wantu awonso o ntela.
3 Vava mabuluku* ma Kisi wa se dia Saulu mavila, Kisi ovovese mwan’andi Saulu vo: “Dodokolo, bonga selo kimosi wenda vavi mabuluku.”
4 Baviokele muna zunga kia miongo mia Eferaime yamuna nsi a Bale-salesa ke basolwele mo ko. Baviokele kuna nsi a Salimi, kwakuna mpe nkatu. Baviokele e nsi yawonso ya Benyamini, ke basolwele mo ko.
5 Vava balwaka muna nsi a Sufi, Saulu ovovele kwa selo ona wakala yandi vo: “Tuvutuka kweto, kadi se diame oyambula tokanena mabuluku,+ yo yantika tokana mu kuma kieto.”
6 Selo ovutwidi vo: “Vena yo muntu a Nzambi mu mbanza yayi, otoma zitiswanga. Mawonso kevovanga melungananga.+ Twenda kûna. Nanga okutuzayisa e nzila tufwete kwendela.”
7 Saulu ovovese selo vo: “Avo twele ko, nki tukunatina? Omu nkutu zeto ke muna diaka madia ko; katuna ye lukau ko tufwete vana kwa muntu a Nzambi aludi. Nki tuna kiau?”
8 Selo ovutwidi Saulu vo: “Tala, ngina ye tini kia yá kia sekele* ya palata va moko. Se yavana kio kwa muntu a Nzambi aludi, katuzayisa e nzila tulanda.”
9 (Muna Isaele kuna nz’ankulu, avo muntu wele yuvula Nzambi, owu kavovanga: “Twenda kwa moni.”+ Kadi ndiona oyikilwanga o unu vo ngunza, kuna nz’ankulu moni kayikilwanga.)
10 I bosi, Saulu ovovese selo kiandi vo: “Dina ovovele diambote. Twendi kweto.” Bele kuna mbanza kuna kwakala muntu a Nzambi aludi.
11 Vava batombokanga kuna mbanza, bawanane ye ndumba zavaikanga mu teka maza. Babayuvuidi vo: “Nga moni+ una mwamu?”
12 Bavutwidi vo: “Ingeta. Tala, una kwandi kûna. Nuenda nswalu, unu kalweke muna mbanza, kadi o nkangu yimenga bekela+ vana bata o unu.+
13 Vava nulwaka muna mbanza luwanana yandi, vitila kenda dila vana e bata. O nkangu ke udia ko yavana kelwaka, kadi yandi osambula kimenga. I bosi, awana babokelo bedia. Ozevo, nutomboka owau yo wanana yandi.”
14 Batombokele muna mbanza. Una bakotele muna mbanza, Samuele owanane yau vava kavaikanga mu tomboka kuna e bata.
15 Vitila Saulu kalwaka, Yave ovovese* Samuele vo:
16 “O mbazi muna ntangwa yayi, ikutumina muntu otuka kuna nsi a Benyamini.+ Unkusa se ntinu a nkangu ame Isaele,+ yandi ovuluza nkangu ame vana moko ma Afelesetia. Kadi mbwene mpasi za nkangu ame, e kazu kiau kilweke oku ngina.”+
17 Samuele vava kamwene Saulu, Yave umvovese vo: “Tala ndioyo i muntu ona yavovese, ‘Yandi oyala nkangu ame.’”+
18 Saulu ofinamene Samuele vana vitu, oku vo: “Do unzayisa, akweyi kwina nzo a moni?”
19 Samuele ovutwidi Saulu vo: “I mono kwame. Nuenda mviti kuna bata, kadi nudia yame o unu.+ Oku mene-mene ikusindika, ikuzayisa mawonso ozolele zaya.*
20 Kutokani ko mu kuma kia mabuluku mavididi mu lumbu tatu,+ kadi masolokele kala. Yawonso iyangalelwanga muna Isaele ya nani? Nga ke yaku ko ye nzo yawonso ya se diaku?”+
21 Saulu ovutwidi vo: “I Mbenyamini kwame, i kanda dilutidi okeva muna makanda ma Isaele.+ E vumu kiame i kiau kilutidi sakalala muna vumu yawonso ya kanda dia Benyamini. Ekuma umpovesele e diambu diadi?”
22 Samuele obongele Saulu ye selo kiandi ubanete muna seka dia dila, ubavuandisi vana fulu yantete mun’awana kabokelesa; tezo kia akala 30.
23 Samuele ovovese nlambi a madia vo: “Twasa kunku yavene, kina yavovese vo, ‘Lunda kio.’”
24 O nlambi obongele tó kia kulu ye kunku kiakala vâna, osidi kio vana vena Saulu. Samuele ovovele vo: “Ekiaki i kunku walundilwa. Dia kwaku, kadi kiavambulwa kimana wadia kio mu ntangwa yayi. Kadi yavova vo, ‘Nzenza mbokelese.’” Ozevo, Saulu odidi yo Samuele e lumbu kiakina.
25 I bosi, bakulumukini tuka kuna bata+ bele muna mbanza, okwamanene mokena yo Saulu vana nludi a nzo.
26 Basikamene muna mene-mene, vava kuma kuvungukidi, Samuele obokele Saulu vana nludi a nzo, oku vo: “Kubama kimana yasindika.” Saulu okubamene, yandi yo Samuele bavaikidi.
27 Ekolo bavaikanga muna mbanza yo kulumuka kuna ndimba, Samuele ovovese Saulu vo: “Vovesa selo+ kenda viti kuna ntwala,” ozevo, wele kuna ntwala. “Ngeye ningama vava, yazayisa e diambu dia Nzambi.”
Mvovo vana yand'a lukaya
^ Mvovo wa sina: “mabuluku mankento.”
^ Mvovo wa sina: “oziwidi matu ma.”
^ Mvovo wa sina: “mawonso mena mu ntim’aku.”
