Wanzole wa Paulu Kuna kwa Esi Korinto 7:1-16
7 Dianu vo, azolwa, wau tuna ye nsilu miami,+ yambula twayivelelesa muna usafu wawonso wa nitu ye wa mwanda+ kimana twazikuka muna velela muna vumi wa Nzambi.
2 Nutuvaulwila e fulu muna ntima mieno.+ Ke tuvangidi muntu mbi ko, ke tusafwidi muntu ko, ke tuvunini muntu ko muna vua nluta.+
3 Kivovele wo ko kimana yanuvana ngielele. Kadi ntekele wo vova vo nuna muna ntima mieto kimana twafwa kumosi yo zinga yeto.
4 Ngina yo unkabu wayingi wa vovana yeno. O lusanu lwame omu yeno lwayingi. Nzadidi ye lufiaulwisu; kiese kiayingi ngina kiau muna mpasi zeto zawonso.+
5 Kadi vava twalwaka muna Makedonia,+ ke twavevoka ko,* twakwamanana mweswa e mpasi za mpila zawonso—nkindu kuna mbazi ye wonga muna kati.
6 Kansi, Nzambi ona ofiaulwisanga awana bakendalele ntima,+ watufiaulwisa muna ngiz’a Tito;
7 ke mu ngiz’andi kaka ko, kansi muna mpila ina kafiaulwisilwa mpe kwa yeno, watuzayisa luzolo lweno lwa kumbona, dilu kieno, ye ntokani zeno* mu kuma kiame; ozevo ngiangalele kwayingi.
8 Kanele vo yanumwesa e ntantu muna nkand’ame,+ kikuyibanzanga ko. Kanele vo kuna lubantiku yakibanza, (wau mbwene vo o nkanda wauna ntantu wanumwesa, kana una vo mu kolo kiandwelo kaka),
9 owau ngiangalele, ke mu kuma kia ntantu nuamweswa ko, kansi mu kuma kia ntantu zeno za luviluku lwa ntima. Kadi e ntantu nuamweswa ngwizani zina ye luzolo lwa Nzambi, kimana nualembi mona e mpasi mu kuma kieto.
10 Kadi e ntantu zina ngwizani ye luzolo lwa Nzambi zitwasanga luviluku lwa ntima yamuna luvuluzu, ke za kuyibanza ko;+ kansi e ntantu za nza lufwa zitwasanga.
11 Kadi nutala nluta nutambwidi wau numwene ntantu mun’owu wa luzolo lwa Nzambi: nukivelelese, numengene mavangu mambi, nusongele vumi wa Nzambi, nusongele luzolo lwayingi lwa viluka o ntima, nusongele o vema yo singika o bi wavangama.+ Muna mambu mawonso nusongele vo nuvelele muna diambu diadi.
12 Kanele vo yanusonekena, kiavanga wo mu kuma kia ndiona wavanga diambu diambi ko,+ ngatu ndiona wavangwa e mbi, kansi yanusonekena kimana luzolo lweno lwa kutuwila lwamoneka vana ndose a Nzambi.
13 Muna diadi i tufiaulwisilu.
Kansi vana ntandu a lufiaulwisu tutambwidi, tuyangalele kikilu muna kiese kia Tito, e kuma kadi yeno awonso nuvuvikidi o ntim’andi.*
14 Kadi avo ikisanini vana ndose andi mu kuma kieno, kifusukidi nsoni ko; kadi wauna twanuvovesela mawonso muna ludi, dina twavova mpe kwa Tito kuna lusanu lwawonso, dia ludi.
15 O zola kwandi mpe muna yeno kuwokelanga vava kesungamenanga o nlemvo weno+ ye mpila nuantambulwila kuna vumi yo zitu.
16 Ngiangalele muna mawonso nuvanganga, ngina ye vuvu* omu yeno.
Mvovo vana yand'a lukaya
^ Yovo “e nitu zeto ke zavevoka ko.”
^ Mvovo wa sina: “vema kweno.”
^ Mvovo wa sina: “mwand’andi.”
^ Nanga, “ngina ye unkabu.”
