Wanzole wa Ntinu 3:1-27
3 Yorame+ wa mwan’a Akabi oyantikidi yala Isaele muna Samaria muna mvu una wa 18 wa luyalu lwa Yosafate wa Ntinu a Yuda, mvu 12 kayala.
2 Wavanga mambu mambi vana meso ma Yave, kansi ke mu tezo kia se diandi ye ngudi andi ko, kadi wabangula e lunzi diavauka dia Bale dina se diandi kavanga.+
3 Kansi, watatamena muna masumu ma Yerobame wa mwan’a Nebate mana kasumukisa Isaele.+ Kavengomoka mo ko.
4 Mesa wa ntinu a Moabe mameme katwelanga, wafutanga e mpaku ya 100.000 ma wan’a mameme ye 100.000 ma mameme ma makoko ke masakwa mika ko kwa ntinu a Isaele.
5 Vava Akabi kafwa,+ vana vau, o ntinu a Moabe otelamene ntinu a Isaele.+
6 Muna kuma kiaki, Yorame wa ntinu ovaikidi e lumbu kiakina muna Samaria, okutakese Isaele yawonso.
7 Otwikidi mpe nsangu kwa Yosafate wa Ntinu a Yuda, oku vo: “O ntinu a Moabe untelamene. Nga okwenda yame muna nuanisa Moabe?” Ovutwidi vo: “Ikwenda yaku.+ O nkangu ame ukala yo nkangu aku. E mvalu miame mikala ye mvalu miaku.”+
8 Yosafate oyuvuidi vo: “Nkia nzila tutombokela?” Yorame ovutwidi vo: “Muna nzil’a makanga ma Edome.”
9 I bosi, o ntinu a Isaele wele yo ntinu a Yuda yo ntinu a Edome.+ Vava bazietele lumbu nsambwadi, ke vakala diaka maza ko mu kuma kia makesa ye bulu ina yabalandanga.
10 O ntinu a Isaele ovovele vo: “Tuladidi kweto! Yave obokelese ntinu tatu miami kabayekola vana moko ma ntinu a Moabe!”
11 Muna kuma kiaki, Yosafate ovovele vo: “Nga kavena ngunz’a Yave ko ona tulenda yuvulwila Yave?”+ Mosi muna selo ya ntinu a Isaele ovutwidi vo: “Elesa+ wa mwan’a Safati ona wayitilanga maza muna moko ma Eliya*+ una vava.”
12 Yosafate ovovele vo: “E diambu dia Yave dina yandi.” Muna diadi, ntinu a Isaele, Yosafate yo ntinu a Edome, bakulumukini kuna kakala.
13 Elesa ovovese ntinu a Isaele vo: “Nkia diambu tuna diau ngeye yo mono?+ Wenda kwa ngunza za se diaku ye kwa ngunza za ngudi aku.”+ O ntinu a Isaele umvovese vo: “Ke wau ko, kadi Yave obokelese ntinu tatu miami kimana kabayekola vana moko ma ntinu a Moabe!”
14 Elesa ovovele vo: “Ndidi e ndofi muna Yave a vu wa Nzambi amoyo ona isadilanga,* kele vo kizitisi Yosafate wa Ntinu+ a Yuda ko, kiadi kutala ko ngatu kusia e sungididi.+
15 Nuntwasila nsiki a kokolo.”+ Vava nsiki a kokolo kayantika sika, vana vau o koko kwa Yave kwizidi kwa Elesa.+
16 Ovovele vo: “I wau wuwu kavovele o Yave: ‘Nutimuna mawulu va ndimba wau,
17 kadi i wau wuwu kavovele o Yave: “Ke numona tembwa ko ngatu mvula; kansi ndimba wau uzala ye maza+ mana lunua kumosi ye ngombe zeno ye bulu yeno yankaka.”’
18 E diambu diadi diakete vana meso ma Yave,+ kadi yekola keyekola Moabe vana moko meno.+
19 Nufwasa konso mbanza yangolo,+ konso mbanza yamfunu, nukesa konso nti wambote, nukaka nto zawonso za maza yo fwasa konso ntoto wambote muna matadi.”+
20 Muna mene-mene, muna ntangwa ya tambika lukau lwa mbwaza lwa mene,+ vana vau maza matukidi kuna ndambu a Edome, e nsi izele yo maza.
21 Esi Moabe awonso vava bawidi vo e ntinu mitombokele muna kubanuanisa, bakutakese awonso balenda nata nuaninua,* bakiatamene vana mwingilu a nsi au.
22 Vava batelama muna mene, e ntangwa yakezimanga muna maza, kansi kuna sambu dia esi Moabe, maza se mambwaki nze menga.
23 Bavovele vo: “O mama menga! Dialudi, e ntinu mivuidi vondana muna nsosolo. E Moabe, twenda bonga e sanzu!”+
24 Vava bakota muna ndo a Isaele, Aneyisaele batelamene, bayantikidi vonda esi Moabe, esi Moabe batinini.+ Aneyisaele bakotele muna Moabe, bavondele esi Moabe.
25 Bafwasidi e mbanza, konso muntu muna yau otubidi tadi dimosi muna konso ntoto wambote, bazadisi mio ye matadi; bakakidi nto zawonso za maza,+ bakesele nti miawonso miambote.+ Yaka ya matadi ma Kire-karesete+ kaka yasala vo, ana batubanga matadi muna nsinga miatubila matadi, bazungidi e mbanza, banuanisi yo.
26 Ntinu a Moabe vava kamona vo osundilu muna vita, obongele 700 za akala ana bakala ye nsosolo kimana baziula nzila muna kwenda kwa ntinu a Edome;+ kansi ke balenda ko.
27 I bosi, obongele mwan’andi antete wa yakala ona wadi vinga vana kunda kiandi kia kintinu, untambikidi se kimenga kiangioka+ vana ntandu a yaka. Bafungidi Isaele makasi mayingi, bayambwidi nuanisa Moabe, bavutukidi kuna nsi au.
Mvovo vana yand'a lukaya
^ Yovo “ona wakala selo kia Eliya.”
^ Mvovo wa sina: “ntelamene vana kena.”
^ Yovo “awonso bavuatanga mponda.”
