Wanzole wa Samuele 1:1-27
1 Kuna nima lufwa lwa Saulu, Davidi vava katuka kuna katufakesela wan’a Aneyamaleke, Davidi okedi lumbu yole kuna Sikelange.+
2 Muna lumbu kiatatu, vezidi muntu otukidi kuna ndo a Saulu ye mvuatu miandi miatiazuka ye ntoto vana ntu andi. Vava kafinamene Davidi, ofukamene, obwidi vana ntoto.
3 Davidi unyuvuidi vo: “Akweyi otukidi?” Ovutwidi vo: “Kuna ndo a Isaele ntukidi, tina ngizidi tina.”
4 Davidi unyuvuidi vo: “Nkia diambu dibwidi? Dodokolo, unzayisa.” Oyandi ovutwidi vo: “Nkangu utinini kuna vita, ayingi bafwidi. O Saulu mpe yo mwan’andi Yonatane bafwidi.”+
5 Davidi oyuvuidi toko dina dintwasidi e nsangu vo: “Aweyi ozayidi wo vo Saulu yo mwan’andi Yonatane bafwidi?”
6 Toko ovutwidi vo: “Vana Mongo a Ngileboa yakedi,+ kuna kinsalukisa mbwene Saulu oyekamene muna dionga diandi, makalu ma vita ye akwa mvalu banlakamene.+
7 Vava kavilukidi yo kumbona, umbokele. Mvutwidi vo, ‘Mon’oyu!’
8 Ungiuvuidi vo: ‘Ongeye u nani?’ Imvutwidi vo: ‘I Nyamaleke kwame.’+
9 Umpovese vo, ‘Dodokolo, wiza oku ngina, wamponda, kadi mu mpasi zayingi ngina, yakinu moyo.’
10 Ngiele vana kena, imvondele,+ kadi yazaya wo vo kalendi zinga ko wau kalwele. Mbongele kolowa* ikedi vana ntu andi ye nlunga muna koko kwandi, ntwese yo kwa mfumu ame.”
11 Davidi otiazwini mvuatu miandi, awonso ana bakala yandi bavangidi diau adimosi.
12 Babokomokene ye dilu yo fionkonona*+ yakuna masika mu kuma kia Saulu yo mwan’andi Yonatane yo nkangu a Yave ye nzo a Isaele,+ kadi bafwididi muna nsosolo.
13 Davidi oyuvuidi e toko ona untwasidi nsangu vo: “U mwisi kweyi?” Umvutwidi vo: “I mwan’a nzenza kwame, wa Nyamaleke.”
14 Davidi umvovese vo: “Ekuma kumwenene wonga ko muna lambula koko kwaku yo vonda kuswa kia Yave?”+
15 Davidi obokele toko dimosi, umvovese vo: “Finama, wamvonda.” Ozevo, umvondele.+
16 Davidi umvovese vo: “O menga maku mena vana ntu aku, kadi o nu’aku usididi kimbangi wau ovovele vo, ‘Mpondele kuswa kia Yave.’”+
17 Davidi obongele mbembo* yayi mu kuma kia Saulu yo mwan’andi Yonatane,+
18 ovovele vo nkangu a Yuda bafwete longwa mbembo yayi yayikilwa vo “Tá,” yasonama muna nkand’a Yasa:+
19 “E Isaele, o wete waku ufwididi muna miongo miaku.+
Ekwe, mbwa ibwidi makesa!
20 Ke nuzayisa wo ko muna Ngati;+Ke nusamuna wo ko muna nzila za Asekelone,Kimana wan’amankento a Afelesetia balembi yangalalaNgatu wan’amankento a mindembi zengwa bakembela.
21 E yeno miongo mia Ngileboa,+Omu yeno ke mukala diaka lowa* ko ngatu mvula,Ke mukala diaka mpatu ziyima mbongo a tukau twavauka ko,+Kadi i mûna musafulwilu e ngubu za makesa,E ngubu a Saulu ke ikuswa diaka mazi ko.
22 Muna menga m’awana bavondwa, muna mazi ma makesa,O tá wa Yonatane ke wavutukanga manima ko,+O nsosolo a Saulu ke wavutukanga nkatu ko.+
23 Saulu yo Yonatane+ batoma zolwa yo yangalelwa ekolo bakala o moyo,Kana muna lufwa, ke bavambwilu ko.+
Basunda ngo-e zulu o nswalu,+Basunda nkosi e ngolo.+
24 E yeno wan’amankento a Isaele nudila Saulu,Ona wanuvuika nlele mia se kia nduwa ye lekwa yavienga,Ona wasia lekwa ya wolo muna mvuatu mieno.
25 Ekwe mbwa babwidi makesa muna vita!
Yonatane ovondelo muna miongo!+
26 Ntantu kikilu mbwene muna ngeye, e mpangi ame Yonatane;Yatoma kuzola kikilu.+
E nzola wanzola yasivi kikilu, iviokele nzol’akento.+
27 Ekwe mbwa babwidi makesaYe mvila ivididi e nuaninua ya vita!”
Mvovo vana yand'a lukaya
^ Yovo “banda.”
^ Yovo “mina nsoki.”
^ Yovo “oyimbidi nkung’a mafwa.”
^ Yovo “dime.”
