Afundisi 12:1-15
12 Esi Eferaime balungalakene, baviokele muna Safone* yo vovesa Yefeta vo: “Nkia kuma walembi kutubokelela kimana twenda yaku vava wasaukidi mu nuanisa Aneyamone?+ Ozevo, muna nzo aku tukuyokela.”
2 Yefeta ubavovese vo: “Omono yo nkangu ame ntantani zayingi twakedi zau ye Aneyamone. Yanulomba lusadisu, kansi ke nuampuluza ko vana moko mau.
3 Vava yamona vo ke numpulwizi ko, yasia moyo ame mu vonza yo kwenda nuanisa Aneyamone,+ Yave wabayekola ova moko mame. Ozevo, adieyi nuizidi kundwanisina o unu?”
4 Yefeta okutakese Mingiladi miawonso+ mu nuanisa Eferaime; e Mingiladi batufakese Eferaime, kadi bavovele vo: “Oyeno Mingiladi nu mintayila mia Eferaime, muna Eferaime yo Manase.”
5 Ngiladi obakidi masau ma Yodani+ makala kuna ntwal’a Eferaime; konso musi Eferaime wavavanga tina yo vova vo: “Yambula yasauka;” Mingiladi banyuvulanga vo: “Ongeye u musi Eferaime?” Avo ovovele vo, “Ve!”
6 bamvovese vo: “Vova vo, Sibolete.” Oyandi ovovele vo, “Zibolete,” kadi ke balendanga toma vova mvovo wau ko. Bambakidi yo kumvondela kuna masau ma Yodani. Ozevo, muna kolo kiakina, 42.000 ma Aneferaime bavondwa.
7 Yefeta mvu sambanu kafundisa Isaele. I bosi, Yefeta wa Mungiladi ofwidi yo zikwa muna mbanza andi, muna Ngiladi.
8 Ibesani wa musi Beteleme yandi wanlandila muna fundisa Isaele.+
9 Wana 30 amakala kakala yau yo wana 30 amakento. Wasindika wan’andi amakento basompwa kwa akala a makanda mankaka yo twasa ndumba 30 za makanda mankaka basompana yo wan’andi amakala. Mvu nsambwadi kafundisa Isaele.
10 I bosi, Ibesani ofwidi yo zikwa muna Beteleme.
11 Elone wa musi Zebulune yandi wanlandila muna fundisa Isaele; mvu kumi kafundisa Isaele.
12 Elone wa musi Zebulune ofwidi yo zikwa muna Ayalone muna nsi a Zebulune.
13 Abedone wa mwan’a Ilele wa musi Piratone yandi wanlandila muna fundisa Isaele.
14 Wana 40 amakala kakala yau, 30 m’atekelo ana bayendelanga muna 70 lwa mabuluku. Mvu nana kafundisa Isaele.
15 Abedone wa mwan’a Ilele wa musi Piratone ofwidi yo zikwa muna Piratone muna nsi a Eferaime vana mongo a Aneyamaleke.+
Mvovo vana yand'a lukaya
^ Nanga, “baviokele kuna node.”
