Zasoneka Luka 23:1-56
23 E ndonga yawonso itelamene, banete Yesu kwa Pilato.+
2 I bosi bayantikidi kumfunda,+ oku vo: “Tusolwele muntu ndioyo ovukumunanga e zula kieto yo sima wantu balembi futa e mpaku kwa Kaisa+ ye okukiyikilanga vo Kristu wa ntinu.”+
3 Pilato unyuvuidi vo: “Ngeye i Ntinu a Ayuda e?” Ovutwidi vo: “Ngeye kibeni ovovele wo.”+
4 Pilato ovovese nganga zambuta ye ndonga vo: “Kimwene diambu diambi ko ndenda tumbila muntu ndioyo.”+
5 Kansi, basiamanene vova vo: “Nkangu kevukumunanga wau kelongelanga muna Yuda yawonso, tuka muna Ngalili yakwaku.”
6 Pilato wau kawidi wo, oyuvuidi kana vo Yesu Mungalili.
7 Vava kazaya wo vo mu zunga kiakala muna wisa kia Erodi+ katuka, untumini kuna kwa Erodi, ona wakala muna Yerusaleme muna lumbu yayina.
8 Vava Erodi kamwene Yesu, oyangalele kikilu. Kadi kolo kiayingi kazola mona Yesu, wau kawanga e nsangu zandi,+ wakala mpe ye vuvu kia mona sinsu kevanga.
9 Dianu vo, oyantikidi kunyuvula mambu mayingi, kansi kamvene mvutu ko.+
10 Nganga zambuta ye asoneki batelamene yo siandama kumfunda.
11 Erodi yo makesa mandi bamvezele,+ bansakanene+ muna kumvuika mvuatu ukezimanga, i bosi, umvutwidi kwa Pilato.
12 Tuka muna lumbu kiakina, Erodi yo Pilato bakituka se akundi, kadi mbeni bateka kala.
13 Pilato obokelese nganga zambuta kumosi ye akuluntu yo nkangu,
14 ubavovese vo: “Nuntwasidi o muntu ndioyo vo nkangu kevukumunanga watelamena luyalu. Omono imfimpidi vana ndose eno, kansi kimwene kuma numfundidi ko.+
15 Erodi mpe kamwene kuma ko, kadi utuvutulwidi yandi, nze una numwene, kavangidi diambu ko dina kafwete zengelwa tumbu kia lufwa.
16 Dianu vo, ikunwanda*+ yo kunyambula.”
17 * ——
18 Kansi ndonga yawonso bakazidi, oku vo: “Vonda o muntu ndioyo,* utuyambulwila Baraba!”+
19 (Muntu ndioyo wasiwa muna pelezo mu kuma kia nkindu ina yanikuka muna mbanza yo muntu kavonda.)
20 Pilato ubavovese diaka, kadi wazola vo kayambula Yesu.+
21 Kansi oyau, bakazidi, oku vo: “Kamanikwa vana nti! Kamanikwa vana nti!”*+
22 Muna nkumbu ina yatatu ubavovese vo: “Nkia diambu diambi kavangidi o muntu ndioyo? Kimwene kuma ko kina kafwete zengelwa tumbu kia lufwa; dianu, ikunwanda* yo kunyambula.”
23 Oyau basiamanène lomba muna nding’angolo vo kavondwa,* e ndinga zau zisundidi.+
24 Dianu vo, Pilato obakidi e nzengo za vanga dina balombele.
25 Oyambwidi ona balombele, ona wasiwa muna pelezo mu kuma kia nkindu yo vonda muntu, kansi ubayekolwele Yesu mun’owu wa luzolo lwau.
26 Vava banetenge, babakidi Simone wa musi Kurene, ona otukidi kuna mpatu, bamvene nti ampasi* kimana kanata wo kuna nim’a Yesu.+
27 Nkangu ayingi unlende, kumosi ye akento ana bayayananga ye ntantu yo kundila.
28 Yesu ovilukidi kwa akento, ubavovese vo: “E wan’amakento a Yerusaleme, nuyambula kundila. Nuyidila yeno kibeni yo wan’eno;+
29 kadi vena ye lumbu ikwiza ina wantu bevova vo: ‘Kiese kwa akento bena vo sita ye vumu ina yalembi wuta ye ntulu zina zalembi yemeka!’+
30 I bosi beyantika vovesa miongo vo: ‘Nutubwila!’ Kuna kwa kundubulu vo: ‘Nutufuka!’+
31 Avo i wau bevanganga muna nti wau una wankunzu, adieyi bevanga vava uyuma?”
32 Wantu wole akaka bakala vo yimpumbulu, batweso mu vondwa kumosi yo yandi.+
33 Vava balweke vana fulu kiyikilwanga vo Valanganza kia ntu,+ bankomene muna nti vana ndambu a yimpumbulu, mosi kuna lunene, wankaka kuna lumonso.+
34 Yesu ovovele vo: “E Tata, ubaloloka, kadi dina bevanganga ke bazeye dio ko.” Kuna kwalanda, bakayane mvuatu miandi yo tela mio nkas’a mienze.+
35 O wantu batelamene vavana, batalanga. Kansi, akuluntu bansevanga, oku vo: “Wavuluza akaka; yambula kakivuluza, avo yandi i Kristu a Nzambi, Ndiona Wasolwa.”+
36 Makesa mpe bansakanenanga, bamfinama yo kumvana vinyu ya ngani,+
37 bavovele vo: “Avo nge i Ntinu a Ayuda, uyivuluza.”
38 Vakedi mpe ye sono vana ntandu a ntu andi vo: “Ondioyu i Ntinu a Ayuda.”+
39 I bosi, mosi muna yimpumbulu ana bakomeno yandi oyantikidi kuntianguna,+ oku vo: “Nga ka ngeye ko i Kristu e? Ukivuluza yo yeto mpe!”
40 Ndiona wankaka untumbidi, oku vo: “Nga kuvumina Nzambi ko wau otumbilu tumbu kiau kimosi?
41 Oyeto ditufwanukini, kadi tutambwidi o nsendo wa mavangu meto; kansi o muntu ndioyo, kavangidi diambu diambi ko.”
42 I bosi, ovovele mpe vo: “E Yesu, unsungamena vava okota muna Kintinu kiaku.”+
43 Umvovese vo: “Kieleka, o unu ivovese wo vo, okala yame muna Paradiso.”+
44 Se tezo kia ola ina yasambanu,* muna nsi yawonso mukedi tombe yamuna ola yavua,*+
45 kadi mwini a ntangwa uzimini; i bosi, e rido a nzo avauka+ utiazukini vana kati.+
46 Yesu okazidi muna nding’angolo vo: “E Tata, vana moko maku ngiekekele mwand’ame.”+ Vava kavovele wo, ofwidi.*+
47 Mfidi a makesa vava kamwene mambu mama mavangamene, oyantikidi kembelela Nzambi, oku vo: “Kieleka, ondioyo muntu ansongi kakala.”+
48 E ndonga yawonso ina ilungalakane vavana mu tala mambu mama, vava bamwene mambu mavangamene, bavutukidi kuna nzo zau, babundi e tulu yau ye ntantu.
49 Akundi andi awonso ye akento mpe, ana banlendenge tuka kuna Ngalili, batelamene kuna kwandá yo tala mambu mama.+
50 Muna Mbazi a Nkanu* ya Ayuda mwakala muntu mosi nkumbu andi Yosefe, muntu ambote ye nkwa unsongi kakala.+
51 (Kayikama e kani ye vangu diau ko.) Musi Arimataya, e mbanz’a Ayuda, Kintinu kia Nzambi kavingilanga.
52 Wele kuna kwa Pilato, olombele e vimbu dia Yesu.
53 Okulumuini dio+ yo zinga dio vana nlele a lino, osidi dio muna ziami kiazokwa vana nsenzele,+ muna ke mwasiwa muntu ko.
54 I lumbu kia Nkubama,+ e Lumbu kia Vundu+ se kiyantika.
55 Akento ana bayiza yandi tuka kuna Ngalili, balende kuna nima mu mona e ziami ye una vimbu diandi dilekeselo,+
56 bavutukidi mu kubika e lekwa yansunga ye mazi mansunga. Kansi muna Lumbu kia Vundu,+ bavundidi mun’owu wa nkanikinu.
Mvovo vana yand'a lukaya
^ Mvovo wa sina: “ikuntumba.”
^ Mvovo wa sina: “Katula muntu ndioyo.”
^ Yovo “Kavondelwa vana nti! Kavondelwa vana nti!”
^ Mvovo wa sina: “ikuntumba.”
^ Yovo “kavondelwa vana nti.”
^ Tala Nsas’a Mvovo.
^ Tezo kia ola ya 12 mu mwini.
^ Tezo kia ola ya 15.
^ Yovo “oyambwidi fulumuna.”
^ Mvovo wa sina: “Sanedina.” Tala Nsas’a Mvovo.
