Zasoneka Maku 11:1-33
11 Vava bafinamene muna Yerusaleme, kuna Betefangi ye Betania,+ kuna Mongo a Olive, otumini alongoki andi wole,+
2 ubavovese vo: “Nuenda muna vata dina kuntwala, vava nuluaka mo, nuwana mwan’a buluku wakangidilwa, ona kafongelo nkutu kwa muntu ko. Nunkutulula yo kuntwasa.
3 Avo muntu unuvovese vo, ‘Adieyi nuvanganga?’ nuvova vo: ‘Mfumu ovuidi dio mfunu,’ vutula kevutula dio.’”
4 Bele, bawene mwan’a buluku wakangidilwa vana mwelo a nzo yakala vana ndambu a nzila, bakutulwidi dio.+
5 Kansi, akaka batelamene vo, babayuvuidi vo: “Ekuma nukutulwilanga mwan’a buluku?”
6 Babavovese una Yesu kabazayisi, babayambwidi benda kwau.
7 Batwese mwan’a buluku+ kwa Yesu, bantensekele mvuatu miau, ovuende vana buluku.+
8 Ayingi bayadidi mpe mvuatu miau muna nzila, akaka bazengele makaya muna mpatu.+
9 Awana bakedi kuna ntwala ye awana bakedi kuna nima, bakazidinge vo: “E Nzambi, tudodokele, umvuluza!+ Nkwa nsambu ndiona okwizilanga muna nkumbu a Yave!*+
10 Kiansambu e Kintinu kikwiza, kina kia se dieto Davidi!+ Tudodokele kuna kayengele, umvuluza!”
11 Okotele muna Yerusaleme, muna tempelo, otadidi lekwa yawonso, wau vo se masika, wele kuna Betania ye alongoki yau Kumi ye Zole.+
12 Muna lumbu kialanda, una batukidi kuna Betania, omwene nzala.+
13 Kuna vala omwene nsanda una yo makaya, wele tala kana vo olenda mo wana bundu. Kansi, una kalweke, kawene mo bundu ko, makaya mankatu kaka, kadi ke nsungi a bundu ya nsanda ko.
14 Ovovese wo vo: “Omu ngeye ke mudiwa diaka bundu ko.”+ Alongoki andi bawidi wo.
15 Balweke kuna Yerusaleme. Okotele muna tempelo, ovaikisi awana batekelenge yo sumba muna tempelo, okindwidi o meza ma asobi a nzimbu* ye kunda ya awana batekelenge mayembe,+
16 kayambwidi muntu ko kavioka ye salanganu yandi muna tempelo.
17 Ubalongele, ubavovese vo: “Nga ke diasonama ko vo: ‘E nzo ame iyikilwa vo nzo a sambu kwa zula yawonso’?+ Kansi oyeno nukitwidi yo se nzo a mivi.”+
18 E nganga zambuta ye asoneki bawidi wo, bayantikidi vava una balenda kumvondela;+ kadi wonga bamwene wau vo ndonga yawonso isivikidi e longi diandi.+
19 Vava kuma kwafwa, bavaikidi kuna mbazi a mbanza.
20 Muna mene-mene, ekolo baviokelenge, bamwene nsanda uvuidi yuma yamuna mianzi.+
21 Petelo osungamene wo, umvovese vo: “E Rabi,* tala o nsanda una osibidi, uvuidi yuma.”+
22 Yesu ubavutwidi vo: “Nukala yo lukwikilu muna Nzambi.
23 Kieleka inuvovese wo vo, konso ona ovovesa mongo wau vo: ‘Katuka yo tubwa muna mbu,’ kalembi katikisa muna ntim’andi, yo kwikila vo dina kavovele vangama divangama, divangama kikilu.+
24 I kuma inuvovesele vo, yawonso nulomba muna sambu, nukala yo lukwikilu vo nutambwidi yo kala, nuvua yo.+
25 Konso ntangwa nutelamene muna samba, nuloloka konso muntu nubakanene yandi e diambu, kimana o Se dieno una kuna zulu kaloloka mpe makuzuka meno.”+
26 * ——
27 Balweke diaka muna Yerusaleme. Ekolo kekiyanga muna tempelo, nganga zambuta, asoneki ye akuluntu bezidi,
28 bamvovese vo: “Mu nkia wisa ovangilanga e mambu mama? Yovo nani uvene wisa kia vanga e mambu mama?”+
29 O Yesu ubavovese vo: “Diambu ikunuyuvula. Numvutula, ozevo mono mpe ikunuvovesa kana mu nkia wisa ivangilanga mambu mama.
30 E mvub’a Yoane,+ ku zulu yatuka yovo kwa wantu? Numvutula.”+
31 Bayantikidi vovaziana, oku vo: “Avo tuvovele vo, ‘Ku zulu,’ okutuyuvula vo, ‘Ekuma nualembi kunkwikidila?’
32 Nga twavova vo: ‘Kwa wantu yatuka e?” Bamwene o wonga wa ndonga, kadi yau awonso bekwikilanga vo Yoane ngunza kikilu kakala.+
33 Bavutwidi kwa Yesu vo: “Ke tuzeye ko.” Yesu ubavovese vo: “Omono mpe kikunuvovesa ko kana mu nkia wisa ivangilanga e mambu mama.”
