Zasoneka Matai 13:1-58
-
YINGANA YA KINTINU (1-52)
-
Nkuni (1-9)
-
Ekuma Yesu kasadilanga yingana (10-17)
-
Nsas’a kingana kia nkuni (18-23)
-
Masa ye mbongo ambi (24-30)
-
Mbongo yake-kete ye mfuna (31-33)
-
O sadila yingana dilunganese ungunza (34, 35)
-
Nsas’a kingana kia masa ye mbongo ambi (36-43)
-
Lusalu lwaswekama ye pelola yambote (44-46)
-
Konde (47-50)
-
Lusalu lwampa ye lwankulu (51, 52)
-
-
Yesu obembwelo muna zunga kiandi (53-58)
13 Muna lumbu kiakina, o Yesu wau kavaikidi muna nzo, wele vuanda vana ndambu a mbu.
2 Ndong’ayingi ikutakene vana kena, oyandi okotele muna nzaza, ovuende, e ndonga yawonso itelamene vana kumu.+
3 I bosi, ubalongele mambu mayingi muna yingana,+ oku vo: “Tala! O nkuni wele kuna e mbongo.+
4 Ekolo kakunininge, e mbongo yankaka ibwididi vana mbel’a nzila, e nuni zizidi, zididi yo.+
5 Yankaka ibwididi vana matadi, vana ke vena ntoto wayingi ko, vana vau imenene kadi o ntoto ke wasina ko.+
6 Kansi vava mwini uvaikidi, e mbongo ilengele yo zina, kadi ke ina ye mianzi ko.
7 Yankaka ibwididi vana vena e nsende, e nsende zimenene, zifinangese yo.+
8 Kansi, yankaka ibwididi vana ntoto ambote, iyantikidi yima mbongo, eyi nkama-nkama, eyina makumasambanu-makumasambanu, eyaka makumatatu-makumatatu.+
9 Ndiona una ye matu, yambula kawá.”+
10 Muna kuma kiaki, alongoki bezidi, banyuvudi vo: “Ekuma okubalongelanga muna yingana?”+
11 Ubavutwidi vo: “Kwa yeno diavewa edi dia bakula mbumb’avauka+ ya Kintinu kia zulu, kansi ke diavewa kwa yau ko.
12 Konso ona wina yo umbakuzi, wayingi kevewa. Kuna kulanda, umbakuzi wandi uwokela diaka. Kansi konso ona okondelo umbakuzi, kana nkutu una wakete kena wau, Nzambi okunkatula wo.+
13 Kiaki i kuma ikubalongelanga muna yingana; kadi betalanga, yau ke bamoni, betambang’o matu, yau ke bawe, ngatu bakula.+
14 Muna yau mulunganene o ungunza wa Yesaya, uvovanga vo: ‘Wá nuwá, kansi yeno ke nubakudi, tala nutala, kansi yeno ke numoni.+
15 Kadi e ntima mia nkangu wau mivuidi bâla, bawidi muna matu mau, yau ke bavani mvutu, bavuidi zima o meso mau yo kaka o matu mau kimana balembi mona muna meso yo wá muna matu, ngatu bakula muna ntima miau, bavutuka kwa mono, omono yabawuka.’+
16 “Kansi, kiese kwa yeno wau numonanga yo wá mambu mama.+
17 Kieleka inuvovese wo vo, ngunza zayingi ye wantu ansongi bazola mona mambu numonanga, kansi ke bamona mo ko,+ bazola wá mambu nuwanga, kansi ke bawá mo ko.
18 “Ozevo, nuwa e nsas’a kingana kia nkuni.+
19 Avo muntu owidi e diambu dia Kintinu, kansi kabakwidi dio ko, o kimpumbulu*+ wizidi, okatwidi dina dikuninu muna ntim’andi; eyayi i mbongo ikuninu vana mbel’a nzila.+
20 Vo i ina ikuninu vana vena matadi, i ndiona owidi e diambu dia Nzambi, vana vau otambulwidi dio kuna kiese.+
21 Kansi, wau vo kena ye mianzi ko muna yandi kibeni, kolo kiandwelo kaka kazingidi, vava kizidi mpasi yovo lubangamu mu kuma kia diambu dia Nzambi, vana vau otele sakuba.
22 Ina ikuninu vana vena nsende, i ndiona owidi e diambu, kansi o ntelamw’a moyo wa tandu*+ kiaki yo nkum’a umpukumuni wa kimvuama ufinangese e diambu yo lembi yima e mbongo.+
23 Ina ikuninu vana ntoto ambote, i ndiona owidi e diambu dia Nzambi yo bakula dio, oyimini e mbongo, eyi nkama-nkama, eyina makumasambanu-makumasambanu, eyaka makumatatu-makumatatu.”+
24 Ubatelele diaka kingana kiankaka, oku vo: “E Kintinu kia zulu kilenda tezaneswa yo muntu okunini mbongo ambote muna mpatu andi.
25 Ekolo wantu balele, mbeni andi wizidi, okunini e mbongo ambi vana vena masa, wele kwandi.
26 Vava masa makudidi yo yima e mbongo, e mbongo ambi mpe imonekene.
27 Muna kuma kiaki, e ntaudi za mfumu a nzo zizidi, zinyuvuidi vo, ‘E Mfumu, nga ke mbongo ambote ko wakunini muna mpatu aku e? Ozevo, akweyi kutukidi e mbongo ambi?’
28 Ubavutwidi vo, ‘Mbeni ame ovangidi wo.’+ E ntaudi bamvovese vo, ‘Nga ozolele twenda yo vuza e?’
29 Ovovele vo, ‘Ve, kadi nkwa kala vo vava nuvuza e mbongo ambi, nuvuza mpe masa kumosi.
30 Yambula yakudila kumosi yamuna nkutika, muna nsungi a nkutika ivovesa asadi vo: Nuteka kutika e mbongo ambi muna mafuku yo yoka yo; i bosi nukutika masa yo sia mo muna lundilu diame.’”+
31 Ubatelele diaka kingana kiankaka, oku vo: “E Kintinu kia zulu kina nze mbongo yakete-kete,* ina o muntu kabongele yo kuna yo muna mpatu andi.+
32 Kieleka, i dilutidi keva vana vena mbongo zawonso, kansi ovo imenene, iviokele mvûdi ya mpat’a nsengo yo kituka se nti, e nuni za zulu zizidi vundila muna tayi yandi.”
33 Ubatelele diaka kingana kiankaka, oku vo: “E Kintinu kia zulu kina nze mfuna, ina yabongwa kwa nkento yo sanga yo muna nzongo ntatu mianene mia mfumfu, yavana yafunisa mbumba wawonso.”+
34 Yesu olongele mawonso mama kwa ndonga muna yingana. Kieleka, kasidi kubalonga diambu ko kondwa kingana,+
35 kimana dialungana dina diavovua muna ngunza vo: “Ivovela muna yingana; isamuna mambu maswekama tuka kuna semo dia nza.”+
36 I bosi, vava kasindikidi e ndonga, okotele muna nzo. Alongoki andi bezidi kwa yandi yo vova vo: “Utusasila e kingana kia mbongo ambi muna mpatu.”
37 Ubavutwidi vo: “O nkuni a mbongo ambote i Mwan’a muntu;
38 e mpatu i nza.+ E mbongo ambote i wan’a Kintinu, e mbongo ambi i wan’a kimpumbulu,+
39 o mbeni ona wakuna e mbongo ambi i Nkadi ampemba. E nsungi a nkutika i mbaninu a tandu, asadi i ambasi.
40 Nze una ukutikilwanga e mbongo ambi yo yokwa vana tiya, i una mpe ukala kuna mbaninu a tandu.*+
41 Muna Kintinu kiandi o Mwan’a muntu otuma e mbasi zandi, bakutakesa yawonso itesanga ankaka e sakuba, ye awana bevanganga o umpumbulu,
42 yo kubatuba vana soka dia tiya.+ I kûna bedidila yo kwetesa o meno.
43 Muna ntangwa yayina, ansongi bekezima nze ntangwa+ muna Kintinu kia Se diau. Ndiona una ye matu, yambula kawá.
44 “E Kintinu kia zulu kina nze lusalu lwaswekama muna mpatu, luna muntu kasolwele yo fukidila lo diaka; muna kuma kia kiese, wele teka lekwa yawonso kakedi yau yo sumba e mpatu yoyo.+
45 “Diaka, e Kintinu kia zulu kina nze nkiti ovavanga pelola zambote.
46 Vava kasolwele pelola imosi yantalu, vana vau wele teka lekwa yawonso kakedi yau yo sumba yo.+
47 “Diaka, e Kintinu kia zulu kina nze konde diatubwa muna mbu yo baka e mbizi za mpila mu mpila.
48 Vava diazala, bavolele dio kuna kumu, bafongele, bakutikidi zina zambote+ muna yitunga, kansi zina zambi+ bavetele zo.
49 I wau wuwu ukala kuna mbaninu a tandu. Ambasi bevaika yo vambula wantu ambi vana vena ansongi
50 yo kubatuba muna soka dia tiya. I kûna bedidila yo kwetesa o meno.
51 “Nga nubakwidi e nsas’a mambu mama mawonso e?” Bamvutwidi vo: “Ingeta.”
52 I bosi, ubavovese vo: “Wau vo i wau, konso nlongi olongwanga mambu ma Kintinu kia zulu, una nze mfumu a nzo, ona ovaikisanga muna lundilu dia lusalu lwandi, lekwa yampa ye yankulu.”
53 O Yesu vava kamene tá yingana yayi, okatukidi ko.
54 Vava kalweke kuna zunga kiandi,+ oyantikidi kubalonga muna sambilu diau, muna kuma kiaki basivikidi yo vova vo: “O muntu ndioyo akweyi kutukanga e ngangu zandi ye mavangu mama mankuma?+
55 Ke yandi ko i mwan’a mvadi a nti e?+ O ngudi andi, e nkumbu andi ke Maria ko e? Aleke andi ke Yakobo, Yosefe, Simone yo Yuda ko e?+
56 E nsanga zandi, yau awonso ke bena yeto ko e? Ozevo, ondioyu akweyi kebakilanga mawonso mama?”+
57 Batele sakuba mu kuma kiandi.+ Kansi, Yesu ubavovese vo: “O ngunza ke zitiswanga ko muna zunga kiandi ye muna nzo andi.”+
58 Muna kuma kia kondwa kwau kwa lukwikilu, kavangidi mo mavangu mayingi mankuma ko.
Mvovo vana yand'a lukaya
^ I sia vo, Satana.
^ Tala Nsas’a Mvovo.
^ Yovo “mbongo a mutade.” E mbongo yayi ikunuanga kuna Palestina. Ikulanga vioka meta 4 yo vaikisa tayi yayingi.
^ Tala Nsas’a Mvovo.
