Ngana 4:1-27
4 E wan’ame, nuwá longi dia se;+Nuwunikina kimana nuakala ye umbakuzi,
2 Kadi ikunuvana longi diambote;Ke nubembola malongi mame* ko.+
3 Yakala se mwan’ambote kuna kwa se diame+Yatoma zolwanga kwa ngudi ame.+
4 Wandonga yo kumpovesa vo: “Yambula ntim’aku wasimbinina e mvovo miame.+
Lunda nkanikinu miame kimana wakwamanana zinga.+
5 Baka ngangu yo umbakuzi.+
Kuvilakani ko, ngatu vengomoka e mvovo mia nu’ame.
6 Kuyambula ngangu ko, kadi tanina zikutanina.
Zola zo, kadi zikulunga-lunga.
7 E ngangu i diambu disundidi o mfunu, ozevo baka ngangu,+Vana ntandu a mawonso obaka, baka mpe umbakuzi.+
8 Toma zo yangalela, zikutundidika.+
Avo obimbakene zo, zikuzitisa.+
9 E ngangu zisia nzingu awete kuna ntu aku;Zikuviengesa ye kolow’a nkembo.”
10 E mwan’ame, tambulwila e mvovo miame,E mvu mia zingu kiaku mikala miayingi.+
11 Ikulongela muna nzil’a ngangu;+Ikudiatisila muna mayendelo ma unsongi.+
12 Vava okangala, e tambi yaku ke ikukakalakesa ko;Avo wele tikuna, kuta sakuba ko.
13 Simbinina e longi; kuyambula dio ko.+
Tatidila dio, kadi i moyo aku kikilu.+
14 Kukoti muna yendelo dia yimpumbulu ko,Ngatu landa nzila za wantu ambi.+
15 Venga zo, kuviokela mo ko;+Vavuka zo, lutakana zo.+
16 Kadi ke belekanga ko avo ke bavangidi diambu diambi ko.
O tulu twau tuvunzananga avo ke babwisidi muntu ko.
17 Mbolo a umpumbulu bediangaYo nua vinyu a nsoki.
18 Kansi, e nzil’a nsongi ina nze ntemo a kuma kukiangaUna unungunukanga temoka yavana ntangwa ivaika.+
19 E nzil’a yimpumbulu ina nze tombe;Ke bazeye kina kikubatesesa sakuba ko.
20 E mwan’ame, wá mambu mame;Toma winikina mvovo miame.*
21 Kukatula mio vana meso maku ko;Toma mio lunda muna nsi a ntim’aku,+
22 Kadi i moyo kwa awana besolola mio+Yo mavimpi muna nitu au yawonso.
23 Vana ntandu a mawonso, toma lunga-lunga o ntim’aku,+Kadi i nto a moyo.
24 Katula mvovo miabendomoka vana wina,+Vavuka mvimba mvovo mialuvunu.
25 Meso maku mafwete tala kaka kuna ntwala,Elo, tala kaka kuna ntwal’aku.+
26 Leleka nzil’a malu maku,+E nzila zaku zawonso zisikila.
27 Kuvengomoki kulunene ko ngatu kulumonso.+
Katula malu maku muna mambu mambi.
