Ntalu 11:1-35
11 Owau, o nkangu uyantikidi yidima ye makasi vana ndose a Yave. Vava o Yave kawidi wo, makasi mandi mafusukidi, o tiya tutukidi kwa Yave tubalemene yo bomona akaka mun’awana bakedi muna nsuka za ndo.
2 Vava o nkangu uyantikidi kaza kwa Mose, oyandi ododokele Yave,+ o tiya tuzimini.
3 Muna kuma kiaki, e fulu kiokio kiyikilu vo Tabera,* kadi o tiya tutukidi kwa Yave tubalemene.+
4 E nzenza*+ zakala vana kati kwau basongele zolela ya loko,+ Aneyisaele mpe bayantikidi diaka dila yo vova vo: “Nani okutuvana e mbizi twadia?+
5 Ekwe tima dia mbizi za maza zina twadianga e ngovo muna Engipito ye tobe, nsudia za nzenzo, ndembe, niaza ye ayi!+
6 Kansi owau, tumene* yovoka. Ke tumonanga diaka lekwa kiankaka ko avo ke mâna yayi kaka ko.”+
7 E mâna+ yakala nze nginga zakete-kete zampembe,*+ yakala nze dimbu a bedeliume.*
8 O nkangu wamwangananga mu tota yo, banikanga yo muna nikinua ya moko yovo tuta yo muna dibuka. I bosi, balambanga yo muna nzungu yovo bavangilanga yo mbolo zavindumuka;+ o ntomo andi nga yimbolo-mbolo yanzenzo yasangwa o mazi.
9 Vava e wunge diabwanga muna ndo muna fuku, e mâna mpe yabwanga vana ntandu a wunge.+
10 Mose owidi nkangu udilanga muna nzo zawonso, konso muntu vana mwelo a saba kiandi. Yave ofungidi kikilu makasi,+ Mose mpe okendalele kwayingi.
11 I bosi, Mose ovovese Yave vo: “Ekuma omwesesele selo kiaku e mpasi? Ekuma kimweneno dienga ko ova meso maku, wau oyekekele e zitu dia nkangu wau wawonso kwa mono?+
12 Nga mono yayimita o nkangu wau wawonso? Nga mono yabawuta, kimana wampovesa vo: ‘Ubanata muna nkata, wauna o ndezi* kelunga-lungilanga o mwana oyemanga,’ yamuna nsi ina wadila e ndofi kwa mase mau?+
13 Akweyi ibakila e mbizi ivana kwa nkangu wau wawonso? Kadi bekwamanananga dila vana ndose ame vo: ‘Utuvana e mbizi twadia!’
14 Kilenda nata nkangu wau wawonso ko mono mosi; e zitu diadi dingi kwa mono.+
15 Avo i wau wuwu okwamanana kumpanga, dodokolo, umponda owau.+ Avo mbweno e dienga ova meso maku, kungiambula ko yamona diaka konso mpasi.”
16 Yave ovutwidi Mose vo: “Unkutikila 70 lwa wan’amakala vana vena akuluntu a Isaele, wantu ana ozeye vo* akuluntu ye mbanda-mbanda za nkangu,+ ubanata kuna saba kia wananina, batelama yaku kwakuna.
17 Ikulumuka+ yo mokena yaku kwakuna,+ ibonga ndambu a mwanda+ wina omu ngeye yo sia wo muna yau. Oyau bekusadisa mu nata e zitu dia nkangu kimana walembi dio nata ngeye mosi kaka.+
18 Zayisa o nkangu vo: ‘Nuyivaula mu kuma kia lumbu kia mbazi,+ kadi mbizi kieleka nudia, wau nudididi muna matu ma Yave+ vo: “Nani okutuvana e mbizi twadia? Kuna Engipito+ twambote kweto twakala.” Yave okunuvana kieleka e mbizi, oyeno nudia yo.+
19 Nudia yo, ke mu lumbu kimosi ko, ke mu lumbu 2 ko, ke mu lumbu 5 ko, ke mu lumbu 10 ko, ke mu lumbu 20 ko,
20 kansi mu ngonde amvimba, yavana ivaika muna mazunu meno yo kituka se lekwa kiankele kwa yeno,+ kadi nubembwele Yave, ona wina ova kati kweno, nudididi vana ndose andi vo: “Ekuma twavaikila muna Engipito?”’”+
21 I bosi, Mose ovovele vo: “Va kati kwa 600.000 za makesa+ ngina, ongeye oku vo: ‘Ikubavana e mbizi, bedia yo mu ngonde amvimba’!
22 Kana nkutu vo makambi mawonso ma mameme ye ngombe mavondelo, nga mekubafwana e? Yovo, avo mbizi zawonso za kalunga zibakamene, nga zikubafwana e?”
23 I bosi, Yave ovovese Mose vo: “Nga koko kwa Yave kwa nkufi e?+ Owau, omona kana vo dina mpovele divangama kwa ngeye yovo ve.”
24 Muna kuma kiaki, Mose ovaikidi yo zayisa e mvovo mia Yave kwa nkangu. Okutakese 70 lwa wana’makala vana vena akuluntu a nkangu, ubatelamese muna kinzieta kia saba.+
25 I bosi, Yave okulumukini muna tuti+ yo vovana yandi,+ obongele ndambu a mwanda+ wakala muna Mose, osidi wo muna 70 lwa akuluntu. Vava o mwanda ukulumukini muna yau, vana vau bayantikidi sala se angunza,*+ kansi mu nkumbu wau kaka bavanga wo.
26 Nzole muna akuluntu awaya basidi muna ndo. E nkumbu zau Eledade ye Medade. Kana una vo bakala muna buka kia wantu basonekwa e nkumbu, ke bayenda ko kuna saba. O mwanda ukulumukini mpe muna yau, muna kuma kiaki, bayantikidi sala se angunza muna ndo.
27 Mwan’a toko mosi ozawidi yo zayisa kwa Mose vo: “O Eledade yo Medade mu sala bena se angunza muna ndo!”
28 Muna kuma kiaki, Yosua+ wa mwan’a Nuni, wa selo kia Mose tuka muna kileke kiandi, ovovele vo: “E mfumu ame Mose, ubasima!”+
29 Kansi, Mose ovovese Yosua vo: “Nga kimpala omona vana fulu kiame? Kumoni kimpala ko, yadi zola nkutu vo nkangu awonso a Yave wakala se angunza, Yave kasia o mwand’andi muna yau!”
30 Kuna kwalanda, Mose ovutukidi muna ndo kumosi ye akuluntu a Isaele.
31 I bosi, e tembwa kia Yave kivevomokene, kiyantikidi twasa yimbimbi tuka muna mbu yo bwisa yo muna kinzieta kia ndo,+ ikedi muna yanzala kilenda diatwa lumbu kiamvimba oku ndambu eyi ye kilenda diatwa lumbu kiamvimba kuna ndambu yankaka, muna kinzieta kiawonso kia ndo, ikundakene tezo kia yinkoso yole* tuka vana ntoto.
32 Muna kuma kiaki, o nkangu ke waleka ko, ukutikidi yimbimbi muna lumbu kiakina kiawonso ye muna fuku wauna wawonso ye muna lumbu kiawonso kialanda. Yau awonso bakutikidi kome kumi* yovo vioka, bayanikini yo muna kinzieta kiawonso kia ndo.
33 Kansi, ekolo e mbizi yakala muna nua miau, una ke batafwini yo ko, makasi ma Yave mafusukidi muna nkangu, Yave oyantikidi vonda o nkangu e mponda yangolo.+
34 Muna kuma kiaki, bavene fulu kiokio e nkumbu a Kiberote-atava,*+ kadi i vana bazikidi o nkangu una wasonga e zolela ya loko.+
35 O nkangu uyalukidi vana Kiberote-atava yo kwenda kuna Kaserote, bakwamanene vana Kaserote.+
Mvovo vana yand'a lukaya
^ Ina ye nsasa vo: “Yoka,” i sia vo, tiya tuyandangiane.
^ Yovo “E ndonga yasangalakana.” Nanga wantu ke bakala Aneyisaele ko uyikanga.
^ Yovo “mioyo mieto mimene.”
^ E bedeliume i dimbu wa nsunga utukanga mu nti miakete mimenanga muna zunga ya mini miangolo.
^ Mvovo wa sina: “nga nginga za koriande.”
^ Yovo “ndezi wa yakala.”
^ Yovo “ana osungamene vo; ana bazayakene kwa ngeye vo.”
^ Yovo “bayantikidi sakula.”
^ Ina ye nsasa vo: “Ziami ya Zolela.”
