Ntalu 21:1-35
21 O ntinu a Aradi,+ wa musi Kenani, ona wazingilanga muna Nengebe vava kawidi vo Isaele olweke muna nzil’a Atari, onuanisi Isaele yo nata akaka muna yau muna kinkole.
2 Muna kuma kiaki, Isaele osidi o nsilu kwa Yave, oku vo: “Avo oyekwele nkangu wau vana moko mame, ifwasa kikilu e mbanza zau.”
3 Muna kuma kiaki, Yave owidi e nding’a Isaele, oyekwele Anekenani vana moko mau, babafwasidi kumosi ye mbanza zau. Muna kuma kiaki, bayikidi e fulu kiokio vo Korema.*+
4 Ekolo bakwamanene mu nkangalu au, vava bakatukidi vana Mongo a Ore+ yo kwendela muna nzil’a Mbu Ambwaki kimana bakondoloka e nsi ya Edome,+ o nkangu* uyantikidi yoya mu kuma kia nkangalu.
5 O nkangu ukwamanene vovela Mose yo Nzambi e mbi,+ oku vo: “Ekuma watuvaikisila muna Engipito twafwila mu makanga? Ke muna ye madia ko ngatu maza,+ oyeto tumengene* mbolo yayi yakondwa o mfunu.”+
6 Muna kuma kiaki, Yave otwikidi nioka zina ye manga miampondi* vana kati kwa nkangu, e nioka zitatikidi o nkangu, Aneyisaele ayingi bafwidi.+
7 Muna kuma kiaki, nkangu wizidi kwa Mose yo vova vo: “Tusumukini wau tuvovele Yave yo ngeye e mbi.+ Dodokela Yave kimana kakatula e nioka ova kati kweto.” Mose ododokele mu kuma kia nkangu.+
8 I bosi, Yave ovovese Mose vo: “Vanga fwaniswa kia niok’a manga ampondi,* manika yo muna nti. Avo muntu otatikilu, kafwete yo tala kimana kakwamanana zinga.”
9 Vana vau Mose ovangidi niok’a nsongo+ yo manika yo vana nti,+ vava nioka yatatikanga muntu, o muntu ndioyo watalanga e niok’a nsongo yo kwamanana zinga.+
10 I bosi, Aneyisaele balondokele yo kwenda sikidisa e ndo kuna Obote.+
11 Bakatukidi kuna Obote, bele sikidisa e ndo kuna Iye-abarimi,+ muna makanga mena mantalani ye Moabe, kuna este.
12 Bakatukidi kwakuna, bele sikidisa e ndo muna Ndimb’a Zerede.+
13 Tuka kwakuna, bele sikidisa e ndo muna zunga kia Arenone,+ kina muna makanga mayalangene tuka muna mwingilu wa Aneyamore, kadi Arenone i mwingilu a zunga kia Moabe, vana vena Moabe ye Aneyamore.
14 Ekiaki i kuma o nkand’a Vita za Yave uvovelanga vo: “E Vakebe muna Sufa ye Ndimba mia Arenone,
15 ye nkulumuk’a* ndimba ina iyalangene yakuna mbanz’a Are, yamuna mwingilu a Moabe.”
16 I bosi, bele kuna Beya. Ekiaki i sima kina Yave kavovesela Mose vo: “Kutakesa o nkangu, omono yabavana o maza.”
17 Muna ntangwa yayina, Isaele oyimbidi o nkunga owu:
“Fusuka o maza, e sima!—Numvutula!*
18 E sima kiatimwa kwa amfumu, kina kiazokwa kwa akwa tunda a nkangu,Yo nkau a kimfumu ye nkau mia yau kibeni.”
I bosi, bakatukidi muna makanga, bele kuna Matana,
19 bakatukidi muna Matana, bele kuna Naliele, bakatukidi muna Naliele, bele kuna Bamote.+
20 Bakatukidi muna Bamote, bele kuna ndimba una muna zunga kia* Moabe,+ vana mbat’a Pisenga,+ una watalana ye Yesimone.*+
21 Isaele otumini anati a nsangu kwa Sikone wa ntinu a Aneyamore, oku vo:+
22 “Yambula twaviokela mu nsi aku. Ke tukota mu konso kiana ko yovo mpatu a vinyu. Ke tunua maza ma konso sima ko. Tusingama kaka muna Bala-bal’a Ntinu yavana tuvioka e zunga kiaku.”+
23 Kansi, Sikone kayambwidi Isaele ko kaviokela muna zunga kiandi. Sikone okutakese nkutu o nkangu andi wawonso yo kwenda nuanisa Isaele muna makanga. Vava kalweke kuna Yaza, oyantikidi nuana yo Isaele.+
24 Kansi, Isaele umvondele muna nsosolo,+ obakidi e nsi andi+ tuka kuna Arenone+ yakuna Yaboke,+ lukufi ye Aneyamone, kadi e Yaze+ muna mwingilu a zunga kia Aneyamone ina.+
25 Isaele okutumwini e mbanza zazi zawonso, bayantikidi zingila muna mbanza zawonso za Aneyemore,+ muna Kesebone yo mavata mandi mawonso.*
26 Kadi e Kesebone i mbanz’a Sikone wa ntinu a Aneyamore, ona wanuana yo ntinu a Moabe yo kutumuna e nsi andi yawonso yakuna Arenone.
27 Ediadi i tuku dia kingana kialuvezo kivovanga vo:
“Nuiza ku Kesebone.
Yambula e mbanz’a Sikone yatungwa yo toma sikidiswa.
28 Kadi o tiya tutukidi muna Kesebone, o nlaku muna mbanz’a Sikone.
Uzinisi Are ya Moabe, e mfumu za fulu yazanguka ya Arenone.
29 Nkenda kwa ngeye, Moabe! Fwaswa nufwaswa, o yeno nkangu a Kemose!+
Oyandi okitwidi wan’andi amakala se mintayila, o wan’andi amakento se abakami a Sikone wa ntinu a Aneyamore.
30 Yambula twabanonga;E Kesebone ifwaswa yakuna Dibone;+Yambula twasisa yo e nkatu yakuna Nofake;O tiya tusayana yakuna Medeba.”+
31 Muna kuma kiaki, Isaele oyantikidi zingila muna nsi ya Aneyamore.
32 I bosi, Mose otumini wantu benda langa e Yaze.+ Bakutumwini mavata mandi* yo yinga Aneyamore ana bakala mo.
33 I bosi, bavilukidi yo tombokela muna nzil’a Basani. O Onge+ wa ntinu a Basani ovaikidi kumosi yo nkangu andi awonso mu wanana yau muna kubanuanisa kuna Ederei.+
34 Yave ovovese Mose vo: “Kumoni wonga wandi ko,+ kadi iyekola Onge vana moko maku kumosi yo nkangu andi awonso ye nsi andi.+ Ongeye ovanga kwa yandi wauna wavanga kwa Sikone wa ntinu a Aneyamore, ona wazingilanga muna Kesebone.”+
35 Muna mpila yayi, bamvondele kumosi yo wan’andi yo nkangu andi wawonso, yavana ke vasala kana mosi ko muna nkangu andi,+ babakidi e nsi andi.+
Mvovo vana yand'a lukaya
^ Ina ye nsasa vo: “Kiavambulwa Kimana Kiafwaswa.”
^ Yovo “moyo a nkangu.”
^ Yovo “e mioyo mieto mimengene.”
^ Yovo “nioka zatiya.”
^ Yovo “niok’a tiya.”
^ Mvovo wa sina: “nua.”
^ Mvovo wa sina: “Nunyimbidila.”
^ Nanga, “makanga.”
^ Mvovo wa sina: “muna nzanz’a.”
^ Yovo “mandi manzungidi.”
^ Yovo “mavata manzungidi.”
