Ntalu 3:1-51
3 Awaya i wan’a* Arone yo Mose muna lumbu kina o Yave kamokena yo Mose vana Mongo a Sinai.+
2 Ezazi i nkumbu za wan’a Arone: Nadabi wa mwan’antete, i bosi Abiu,+ Elaza+ yo Itama.+
3 Ezazi i nkumbu za wan’a Arone, e nganga zakuswa o mazi ana batumbikwa* mu sala se anganga.+
4 Kansi, Nadabi yo Abiu bafwa vana ntadisi a Yave+ vava batambika tiya vana ndose a Yave tuna ke bavaninua nswa ko muna makanga ma Sinai, ke bawuta wana ko. Vo i Elaza+ yo Itama,+ bakwamanana sala se anganga kumosi yo Arone wa se diau.
5 I bosi, Yave ovovese Mose vo:
6 “Twasa e kanda dia Levi,+ ubatelamesa vana ndose a Arone wa nganga, oyau besadila+ Arone.
7 Belungisa e kiyekwa kiau mu kuma kiandi ye mu kuma kia nkangu awonso vana ntwal’a saba kia wananina, muna salanga e salu kiau mu kuma kia saba.
8 Belunga-lunga e salanganu yawonso+ ya saba kia wananina yo lungisa e kiyekwa kiau mu kuma kia Aneyisaele, muna salanga e salu mu kuma kia saba.+
9 Vana Anelevi kwa Arone ye kwa wan’andi. Oyau baveno kwa yandi se lukau lutukidi vana vena Aneyisaele.+
10 Ofwete tumbika Arone yo wan’andi, balungisa e salu yau ya kinganga,+ konso muntu ona kavewa nswa ko* ofinama e nzo avauka, kafwete vondwa.”+
11 Yave okwamanene vovesa Mose vo:
12 “Tala! Vo i mono, mbongele Anelevi vana vena Aneyisaele vana fulu kia wan’antete awonso a Aneyisaele,*+ Anelevi bekala se bame.
13 Kadi o wan’antete awonso i bame.+ Muna lumbu kina yavonda wan’antete awonso muna nsi ya Engipito,+ yakivaulwila wan’antete awonso muna Isaele, tuka muna wantu ye muna bulu.+ Oyau bekala se bame. Mono i Yave.”
14 Yave ovovese diaka Mose muna makanga ma Sinai+ vo:
15 “Soneka wan’a Levi mun’owu wa nzo za mase mau ye vumu yau. Ofwete soneka wan’amakala awonso a kimbuta kia ngonde mosi yovo vioka.”+
16 Muna kuma kiaki, Mose ubasonekene mun’owu wa lutumu lwa Yave, wauna kakanikinua.
17 Ezazi i nkumbu za wan’a Levi: Ngeresone, Koate yo Merare.+
18 Ezazi i nkumbu za wan’a Ngeresone mun’owu wa vumu yau: Libene yo Simei.+
19 O wan’a Koate mun’owu wa vumu yau: Amerame, Yisa, Keberone yo Uziele.+
20 O wan’a Merare mun’owu wa vumu yau: Makele+ yo Musi.+
Eyayi i vumu ya Anelevi mun’owu wa nzo za mase mau.
21 Muna Ngeresone mwatuka e vumu kia Anelibene+ ye vumu kia Anesimei. Eyayi i vumu yatuka muna Anengeresone.
22 O lutangu lwawonso lwa wan’au amakala a kimbuta kia ngonde mosi yovo vioka, ana basonekeno, 7.500.+
23 E vumu ya Anengeresone kuna nim’a saba+ basikidisilanga e ndo, kuna weste.
24 O Eleyasafe wa mwan’a Laele i mfumu a nzo a se dia Anengeresone.
25 E kiyekwa kia wan’a Ngeresone+ muna saba kia wananina i lunga-lunga e saba+ ye fukilwa yandi yawonso,+ rido+ ya mwelo a saba kia wananina,
26 nlele mia yanzala,+ rido+ ya mwelo a yanzala kiazieta e saba ye ziku, nsinga mia yanzala ye salu yawonso yasadilwanga muna lekwa yayi.
27 Muna Koate mwatuka e vumu kia Anemerame, vumu kia Aneyisa, vumu kia Anekeberone ye vumu kia Aneuziele. Eyayi i vumu ya Anekoate.+
28 O lutangu lwa wan’amakala awonso a kimbuta kia ngonde mosi yovo vioka, 8.600; yau bakala ye kiyekwa kia lunga-lunga e fulu kiavauka.+
29 E vumu ya wan’a Koate kuna sude ya saba+ basikidisilanga e ndo.
30 O Elisafane wa mwan’a Uziele+ i mfumu a nzo a se dia vumu ya Anekoate.
31 E kiyekwa kiau i lunga-lunga e Nkela,+ meza,+ zangikilwa kia minda,+ maziku,+ salanganu+ yasadilwanga vana fulu kiavauka, rido+ ye salu yawonso yasadilwanga muna lekwa yayi.+
32 O mfidi a mfumu za Anelevi i Elaza+ wa mwan’a Arone wa nganga. Yandi wakala nkengi a wantu basalanga e salu ya fulu kiavauka.
33 Muna Merare i mwatuka e vumu kia Anemakele ye vumu kia Anemusi. Eyayi i vumu ya Merare.+
34 O lutangu lwa wan’amakala awonso a kimbuta kia ngonde mosi yovo vioka ana basonekeno, 6.200.+
35 O Suriele wa mwan’a Abikaile i mfumu a nzo a se dia vumu ya Merare. Kuna node a saba+ basikidisilanga e ndo.
36 O wan’a Merare yau bakala ye kiyekwa kia lunga-lunga e valanganza ya mabaya+ ya saba, mbindi zandi,+ malunzi mandi,+ telamesenua yandi, sadilwa yandi yawonso,+ ye salu yawonso yasadilwanga muna lekwa yayi,+
37 kumosi yo malunzi mawonso makala muna kinzieta kia yanzala ye telamesenua yau,+ mpalu zau ye nsinga miau.
38 Mose, Arone yo wan’andi kuna este basikidisilanga e ndo vana ntwal’a saba, vana ntwal’a saba kia wananina, kuna kuvaikilanga ntangwa. Yau bakala ye kiyekwa kia lunga-lunga e nzo avauka, eyayi yakala se mbebe au muna wete dia Aneyisaele. Konso muntu ona kavewa nswa ko* wafinamanga e nzo avauka, wavondwanga.+
39 Wan’amakala awonso a Anelevi a kimbuta kia ngonde mosi yovo vioka, ana Mose yo Arone basonekene mun’owu wa vumu yau muna lutumu lwa Yave, 22.000.
40 I bosi, Yave ovovese Mose vo: “Soneka wan’antete awonso amakal’a Aneyisaele a kimbuta kia ngonde mosi yovo vioka,+ ubatanga yo soneka e nkumbu zau.
41 Umbongela Anelevi vana fulu kia wan’antete awonso a Aneyisaele,+ bonga twelezi ya Anelevi vana fulu kia wan’antete awonso a twelezi ya Aneyisaele.+ Mono i Yave.”
42 I bosi, Mose osonekene wan’antete awonso vana vena Aneyisaele, wauna Yave kankanikina.
43 O lutangu lwa wan’antete awonso amakala ana basonekeno e nkumbu, ana bena ye kimbuta kia ngonde mosi yovo vioka, 22.273.
44 Yave okwamanene vovesa Mose vo:
45 “Bonga Anelevi vana fulu kia wan’antete awonso vana vena Aneyisaele, bonga mpe twelezi ya Anelevi vana fulu kia twelezi ya Aneyisaele, Anelevi bekala se bame. Mono i Yave.
46 Muna futa e ntalu a lukûlu+ lwa 273 lwa wan’antete a Aneyisaele ana balutakene lutangu lwa Anelevi,+
47 otambula sekele tanu* muna muntu,+ mun’owu wa sekele ya fulu kiavauka.* E sekele mosi, 20 ma ngera.*+
48 Van’e nzimbu zozo kwa Arone yo wan’andi se ntalu a lukûlu lw’awana balutakene lutangu lwa Anelevi.”
49 Muna kuma kiaki, Mose otambwidi e nzimbu za lukûlu kwa awana balutakene lutangu lwa Anelevi.
50 Otambwidi e nzimbu kwa wan’antete a Aneyisaele, 1.365 za sekele, mun’owu wa sekele ya fulu kiavauka.
51 I bosi, Mose ovene e nzimbu za lukûlu kwa Arone yo wan’andi mun’owu wa mvovo* a Yave, wauna Yave kakanikina Mose.
Mvovo vana yand'a lukaya
^ Mvovo wa sina: “Ezazi i mbandu za.”
^ Mvovo wa sina: “ana bazadiswa o moko.”
^ Mvovo wa sina: “nzenza,” i sia vo, muntu una vo katuka mu vumu kia Arone ko.
^ Mvovo wa sina: “kia konso mwan’antete oziula e vumu muna Aneyisaele.”
^ Mvovo wa sina: “nzenza,” i sia vo, muntu una vo ke Nlevi ko.
^ Yovo “mun’owu wa sekele yavauka.”
^ Mvovo wa sina: “nua.”
