Ntalu 31:1-54
31 I bosi, Yave ovovese Mose vo:
2 “Landa Anemidiani+ e kunda+ mu kuma kia Aneyisaele. I bosi, ofwa.”+
3 Muna kuma kiaki, Mose ovovese nkangu vo: “Nuvana e nuaninua kwa wan’amakala bena va kati kweno kimana banuana e vita ye esi Midiani, balanda e kunda kia Yave kwa Midiani.
4 Muna konso kanda muna makanda mawonso ma Isaele, nufwete tuma 1.000 dia wan’amakala kuna vita.”
5 Muna kuma kiaki, muna mafunda ye mafunda ma Isaele,+ basolele 1.000 muna konso kanda: bavene nuaninua kwa 12.000 banuana e vita.
6 I bosi, Mose ubatumini kuna vita, 1.000 muna konso kanda, benda kumosi yo Finekase+ wa mwan’a Elaza wa nganga, ona wakala ye salanganu yavauka ye mpungi+ za vita vana koko kwandi.
7 Banuene vita ye Midiani wauna Yave kakanikina Mose, bavondele wan’amakala awonso.
8 Vana kati kw’awana bavondelo vakedi ye atinu a Midiani, i sia vo, Evi, Rekeme, Suro, Kure yo Reba, atinu tanu a Midiani. Bavondele mpe Bilami+ wa mwan’a Beo muna nsosolo.
9 Kansi, Aneyisaele banete muna kinkole akento a Midiani kumosi yo wan’au. Basanzidi mpe e twelezi yau yawonso, makambi mau mawonso ye mavua mau mawonso.
10 E mbanza zau zawonso bazingilanga ye ndo zau zawonso* bayokele zo muna tiya.
11 Babongele yawonso basanzidi ye yawonso bakangidi, kiakala wantu yovo bulu.
12 I bosi, o wantu ye sanzu ye ina babakidi batwese yo kwa Mose yo Elaza wa nganga ye kwa nkangu awonso a Isaele muna ndo, muna makanga ma Moabe,+ lukufi ye Yodani kuna Yeriko.
13 I bosi, Mose yo Elaza wa nganga ye mfumu zawonso za nkangu bavaikidi mu wanana yau kuna mbazi a ndo.
14 Kansi, Mose ofungidi afidi a makesa makasi, i sia vo, mfumu za mafunda ye mfumu za nkama ana batukidi muna vita.
15 Mose ubavovese vo: “Ekuma nuvuluzidi mioyo mia wan’amakento awonso?
16 Yau bavukumuna Aneyisaele muna mvovo mia Bilami kimana bakondwa e kwikizi+ muna Yave muna dina diavangama kuna Peo+ yo twasa e vuku kwa nkangu a Yave.+
17 Owau nufwete vonda wan’amakala awonso vana vena yingiana-ngiana, nuvonda mpe wan’amakento awonso ana bavukana kala yo yakala.
18 Kansi, nuvukisa e dumbelele yawonso ana ke basidi vukana yo yakala ko.+
19 Nufwete kala kuna mbazi a ndo lumbu nsambwadi. Konso muntu mu yeno ovondele muntu* ye konso muntu mu yeno osimbidi muntu afwa,+ kafwete kuyivelelesa+ muna lumbu kiatatu ye muna lumbu kiansambwadi, oyeno ye abakami eno.
20 Nufwete velelesa e mvuatu miawonso, lekwa yawonso ya nkand’a bulu, lekwa yawonso yavangilwa muna mika mia nkombo ye lekwa yawonso ya mabaya.”
21 O Elaza wa nganga ovovese makesa ana bayenda kuna vita vo: “Owau i nsiku kakanikini o Yave kwa Mose:
22 ‘Wolo kaka ye palata ye nsongo ye sengwa ye lanta* ye mbodi,
23 konso lekwa ke kivianga ko avo kiviokele vana tiya, nufwete kio viokesela vana tiya muna kio velelesa. Kansi, nufwete kio velelesa mpe muna maza ma luveleleso.+ E lekwa yawonso ivianga avo iviokele vana tiya, nufwete yo viokesela muna maza.
24 Nufwete sukula e mvuatu mieno muna lumbu kiansambwadi, nukala nuavelela, i bosi nulenda kweno kota muna ndo.’”+
25 I bosi, Yave ovovese Mose vo:
26 “Tanga e lekwa isanzilu, tanga abakami, kiakala wantu yovo bulu; tanga yo kumosi yo Elaza wa nganga ye ntu mia nzo za mase ma nkangu.
27 Kayanesa e lekwa isanzilu mu kunku yole: kunku kimosi mu kuma kia makesa ana bele kuna vita, e kunku kiankaka kia nkangu.+
28 Tambula e mpaku a Yave kwa makesa ana bele kuna vita, bonga mosi* vana vena 500, kiakala wantu, ngombe, mabuluku, mameme yovo nkombo.
29 Nubongela e mpaku muna kunku kiau yo vana yo kwa Elaza wa nganga se lukau lwa Yave.+
30 Muna kunku kia Aneyisaele, bonga mosi vana vena 50, kiakala wantu, ngombe, mabuluku, mameme yovo nkombo ye twelezi ya mpila zawonso, vana yo kwa Anelevi+ ana belunga-lunganga e salu ya saba kia Yave.”+
31 Muna kuma kiaki, Mose yo Elaza wa nganga bavangidi wauna Yave kakanikina Mose.
32 E lekwa ina bakangidi, e lekwa ina isuvidi muna sanzu dina makesa bakutumuna kuna vita, 675.000 ma mameme ye nkombo,
33 72.000 ma ngombe,
34 ye 61.000 ma mabuluku.
35 O lutangu lwa akento ana ke basidi vukana yo yakala ko,+ 32.000 ma akento.
36 E kunku kiveno kw’awana bayenda kuna vita, 337.500 za mameme ye nkombo.
37 E mpaku a Yave muna mameme ye nkombo, 675.
38 Vakedi ye 36.000 ma ngombe, e mpaku a Yave muna ngombe, 72.
39 Vakedi ye 30.500 za mabuluku, e mpaku a Yave muna mabuluku, 61.
40 Vakedi ye 16.000 ma wantu, e mpaku a Yave muna yau, 32 ma wantu.
41 I bosi, Mose ovene e mpaku se lukau lwa Yave kwa Elaza wa nganga,+ wauna Yave kakanikina Mose.
42 Vo i kunku kia Aneyisaele, kina Mose kavambula ye kunku kia awana bayenda muna vita,
43 o lutangu lwa mameme ye nkombo, 337.500,
44 olu lwa ngombe, 36.000,
45 olu lwa mabuluku, 30.500,
46 olu lwa wantu, 16.000.
47 I bosi, muna kunku kina vo kia Aneyisaele, Mose obongele mosi vana vena 50, kiakala wantu yovo bulu, ovene yo kwa Anelevi,+ ana belunga-lunganga e salu ya saba kia Yave,+ wauna Yave kakanikina Mose.
48 I bosi, afidi a makesa ana basolwa mu fila e buka ya vu,+ i sia vo, mfumu za mafunda ye mfumu za nkama, bafinamene kwa Mose,
49 bavovese Mose vo: “E selo yaku batangidi makesa ma vita ana bena mu wisa kieto, batuzayisi vo ke vakondelo muntu ko.+
50 Muna kuma kiaki, yambula konso muntu muna yeto kasunzula se lukau kuna kwa Yave kina kasolwele, lekwa ya wolo, nsanga mia malu, nlunga mia moko, mpeto ya sila dimbu, lunga ya matu ye nsanga miankaka, mu lomba luyambulwilu lwa masumu meto* vana ndose a Yave.”
51 Muna kuma kiaki, Mose yo Elaza wa nganga batambwidi wolo kwa yau, nsanga miawonso.
52 O lutangu lwawonso lwa wolo una e mfumu za mafunda ye mfumu za nkama bavene kwa Yave, 16.750 ma sekele.*
53 Konso kesa dia vu obongele sanzu mu kuma kiandi.
54 Mose yo Elaza wa nganga batambwidi wolo kwa mfumu za mafunda ye mfumu za nkama, batwese wo muna saba kia wananina se luyindulu vana ndose a Yave mu kuma kia nkangu a Isaele.
Mvovo vana yand'a lukaya
^ Yovo “ndo zazungwa e yaka.”
^ Yovo “moyo.”
^ Yovo “foya.” I sia vo, sengwa kina nga mbodi.
^ Mvovo wa sina: “moyo mosi.” Tala Nsas’a Mvovo.
^ Yovo “lwa mioyo mieto.”
