Kuna kwa Esi Roma 15:1-33
15 Ozevo, oyeto tuna vo twakumama tufwete natanga lutovoko lw’awana bakondelo e ngolo,+ yo lembi kuyiyangidika.+
2 Konso muntu, yambula kayangidika nkwandi muna wete diandi yo kunkasakesa.+
3 Kana nkutu Kristu kakiyangidika ko,+ kansi wauna wasonama vo: “O luvezo lw’awana bekuvezanga lumbwididi.”+
4 Kadi mawonso mateka sonekwa, masonekwa muna kutulonga,+ kimana muna luzindalalu lweto+ ye muna lufiaulwisu lwa Sono, twakala ye vuvu.+
5 O Nzambi ona ovananga luzindalalu ye lufiaulwisu, yambula kanuvana nyindu mosi vovo wina una wakala ye Kristu Yesu,
6 kimana yo nua mosi nuakembelela Nzambi wa Se dia Mfumu eto Yesu Kristu kumosi.+
7 Dianu vo, nutambulanga* muntu yo nkwandi+ wauna Kristu kanutambulwila+ muna nkembo a Nzambi.
8 Kadi inusamunuini wo vo Kristu okitukidi se selo ki’awana bazengwa+ mu kuma kia ludi kia Nzambi, kimana kasikidisa e nsilu kasila mase mau,+
9 esi zula mpe bakembela Nzambi muna nkenda zandi.+ Wauna wasonama vo: “Muna kuma kiaki ikukembelela vana vena zula yo yimbidila e nkumbu aku.”+
10 Ovovele diaka vo: “Nuyangalala, yeno zula yo nkangu andi.”+
11 Diaka: “Nukembela Yave,* yeno zula yawonso, e nkangu miawonso yambula miankembelela.”+
12 Diaka, Yesaya ovovele vo: “Vekala o mwanzi a Yisai,+ ndiona oyala e zula;+ e zula ibunda e vuvu kiau muna yandi.”+
13 O Nzambi ovananga e vuvu, yambula kanuzadisa ye kiese kiawonso yo luvuvamu wau numbundidi e vuvu, kimana nuazala ye vuvu muna nkum’a mwand’avelela.+
14 E mpangi zame, ngina ye ziku mu kuma kieno, i sia vo yeno kibeni mpe nuzele yo wete yo zayi, nuafwana longa* muntu yo nkwandi.
15 Kansi, inusonekene mambu mankaka ye ziku kiawonso, kimana yanususumuna diaka mu kuma kia nsambu zina yavewa kwa Nzambi,
16 yakala se selo kia Kristu Yesu kuna kwa zula.+ Yasala e salu kiavauka kia nsangu zambote za Nzambi,+ kimana zula yayi yakala se lukau lwa tondakana yo vaulwa muna mwand’avelela.
17 Dianu vo, ngina ye kuma kia kuyisanina muna Kristu Yesu muna salu kiame kwa Nzambi.*
18 Kadi kivova mambu mankaka ko, mana kaka Kristu kavangila omu mono, kimana e zula yatumama, muna mvovo ye mavangu mame,
19 muna ngolo za sinsu ye masivi,+ muna ngolo za mwand’a Nzambi, muna zunga yawonso, tuka kuna Yerusaleme yakuna Ilureko ntomene samuna e nsangu zambote mu kuma kia Kristu.+
20 Dianu vo, yakala ye kani dia lembi samunuina e nsangu zambote muna fulu ina vo e nkumbu a Kristu yazayakana kala, kimana yalembi tungila vana nkubilw’a muntu ankaka;
21 kansi wauna wasonama vo: “Awana balembi samunuinua nsangu zandi bemona, awana balembi wá, bebakula.”+
22 Ekiaki i kuma yakakidilwa nkumbu miayingi yalembi kwiza kunukingula.
23 Kansi owau, ke vena diaka vata ko omu zunga yayi dina ndembele samunuina e nsangu zambote, kadi se mvu miayingi ngina ye tima dia kwiza kunukingula.
24 Dianu vo, vava ikwenda kuna Sepania, ngina ye vuvu vo se yamonana yeno, nuenda kunsindika kimana yakala ye kiese kia kangala yeno mu fikolo.
25 Kansi owau nzolele kwenda kuna Yerusaleme, ngienda sadila avauki.+
26 Kadi awana bena muna Makedonia ye Akaya bayangalele mu vana e lekwa yau se tukau kw’asukami vana vena avauki muna Yerusaleme.+
27 Kieleka, bayangalele wo vanga, kadi mfuka bena yau kw’aveledi muna Yerusaleme; avo esi zula kwa yau batambula mambu ma mwanda, mfuka mpe bena yau kwa yau muna kubasadisa muna mambu ma kinitu.+
28 Dianu vo, avo mfokwele e salu kiaki yo kubatambika lukau lwalu,* se yamonana yeno vava ikwenda kuna Sepania.
29 Nzeye wo mpe vo vava ikwiza kwa yeno, se ngiza ye ulolo wa nsambu za Kristu.
30 Ampangi, inuwondelele muna Mfumu eto Yesu Kristu ye muna zola kwa mwanda, nuasiamanana samba kwa Nzambi mu kuma kiame wauna ivanganga,+
31 kimana yavuluzwa+ muna moko ma mindembi kwikila kuna Yuda, o uselo wame muna Yerusaleme watondwa kw’avauki,+
32 muna luzolo lwa Nzambi ikwiza kwa yeno kuna kiese, yakumikwa kumosi yo yeno.
33 O Nzambi ona ovananga luvuvamu yambula kakala yo yeno awonso.+ Amen.
Mvovo vana yand'a lukaya
^ Yovo “nutondanga.”
^ Yovo “ludika.”
^ Yovo “mambu ma Nzambi.”
^ Mvovo wa sina: “mbongo yayi.”
