Kuna kwa Esi Roma 3:1-31
3 Ozevo, o Nyuda aweyi kasundidi akaka? O mfunu wa zengwa, aweyi?
2 Wayingi muna mawonso. Entete, Ayuda yau baveno mambu mavauka ma Nzambi.+
3 Ozevo, aweyi? Avo ankaka ke bena ye lukwikilu ko, nga o kondwa kwau kwa lukwikilu kukulula e kwikizi kia Nzambi e?
4 Ke wau ko! Yambula Nzambi kakala waludi,+ kana nkutu vo wantu awonso akwa luvunu,+ wauna wasonama vo: “Kimana wasonga vo u nkwa unsongi muna mvovo miaku yo sunda vava ofundiswa.”+
5 Dianu vo, avo vilwa weto unsongi wa Nzambi usengomonanga, adieyi tuvova? Nga Nzambi vilwa kevanganga vava kesonganga makasi mandi e? (Mu ngindu za wantu mpovele.)
6 Ke wau ko! Kala vo i wau, ekuma Nzambi kefundisila e nza?+
7 Kansi, avo muna luvunu lwame e ludi kia Nzambi kitoma zayakananga muna nkembo andi, ozevo, ekuma itumbilwanga nze nsumuki?
8 Ekuma tulembele vovela: “Yambula twavanga mambu mambi kimana mambu mambote meza”? Akaka bekutukumbanga vo i wau tuvovanga. Kieleka, e tumbu kia wantu awaya kiansongi.+
9 Ozevo, adieyi tuvova? Nga tusundidi akaka e? Ve kikilu! Kadi tusongele e ziku vo Ayuda ye Mingerekia, yau awonso kuna nsi a sumu bena;+
10 wauna wasonama vo: “Ke vena muntu ansongi ko, kana nkutu mosi;+
11 ke vena muntu ko una ye umbakuzi; ke mosi ko ovavanga Nzambi.
12 Awonso bavuidi bendomoka, yau awonso ke bena diaka mfunu ko; ke vena muntu ko osonganga ngemba, kana nkutu mosi.”+
13 “E malaka mau i ziami kiaziuka; bevunginikanga muna tubini twau.”+ “E mvovo miau mina nze mang’a mpidi.”+
14 “E nua miau mizele ye sibu ye ndudi.”+
15 “O malu mau nzaki mekwendanga mu bungula menga.”+
16 “Lufwasu ye mpasi zina muna nzila zau,
17 ke basidi zaya nzil’a luvuvamu ko.”+
18 “O vumi wa Nzambi ke una muna meso mau ko.”+
19 Owau tuzeye wo vo mawonso mevovuanga muna Nsiku, awana bena kuna nsi a Nsiku mevovelanga, kimana e nua miau miawonso miabutama, e nza yawonso yayeleswa+ vana ndose a Nzambi.
20 Kadi ke mosi ko olungisilwa muna mavangu ma nsiku+ vana ndose andi, kadi muna nsiku i tuzayidi e sumu.+
21 Kansi owau, o unsongi wa Nzambi usengomokene+ kondwa kwa nsiku, wauna wasilwanga umbangi muna Nsiku ye kwa Angunza,+
22 elo, o unsongi wa Nzambi muna lukwikilu muna Yesu Kristu, kuna kw’awonso ana bekwikilanga. E kuma kadi kavena nswaswani ko.+
23 Kadi awonso basumuka yo funga muna songa o nkembo a Nzambi,+
24 mu lukau lwa ngovo+ bebadikilwanga vo ansongi muna nkenda zandi,+ muna lukûlu lwafutwa kwa Kristu Yesu.+
25 Nzambi wansunzula se kimenga kia vutulwisa e ngwizani*+ muna lukwikilu muna menga ma Yesu.+ Nzambi wavanga wo muna songa unsongi wandi, e kuma kadi muna ntim’andi a vunda waloloka masumu mateka vangama.
26 Wavanga wo kimana kasonga unsongi+ wandi muna tandu kiaki, yandi kibeni kakala wansongi yo lungisa ona una yo lukwikilu muna Yesu.+
27 Ozevo, nga vena ye kuma kia kuyisanine? Ke vena ye kuma ko. Muna nkia nsiku? Nga wa mavangu e?+ Ve, kansi muna nsiku a lukwikilu.
28 Kadi tubadikidi wo vo muntu olungisilwa muna lukwikilu, ke mu mavangu ma nsiku ko.+
29 Yovo, nga Nzambi wa Ayuda kaka e?+ Nga ke Nzambi a esi zula mpe ko e?+ Elo, Nzambi a esi zula mpe.+
30 Wau vo Nzambi mosi kaka,+ olungisa awana bazengwa+ ye mindembi-zengwa+ muna diambu dia lukwikilu lwau.
31 Ozevo, nga tuvunzwini nsiku muna lukwikilu lweto e? Ke wau ko! Tutatididi nsiku.+
Mvovo vana yand'a lukaya
^ Yovo “lembekelwa; lubakanisu.”
